TINChLIK – ENG ULUGʻ, ENG OLIY QADRIYaT
El-yurt tinchligi, oilalar obodligi, farzandlar sogʻlomligi, millat onalarining omonligi va xotirjamligi – bularning bari har bir koʻngilning hayotdan, Vatandan roziligining eng muhim shartlaridir. Hayotini toʻkislik, baxt bezab turgan xalq eng avvalo, mamlakatda tinchlik hokim boʻlishini istaydi, oʻz Vatani tuprogʻining toptalishini, farzandlarining baxtli davroniga chetdan tosh otilishini istamaydi!
Ming shukurki, bizning xalq ana shunday baxtga musharraf. Farzandlar sogʻ-omon voyaga yetayotir, onalar koʻngli tinch. Har kuni oila aʼzolarini bexavotir oʻqishga, ishga kuzatib, shodon qarshi olayotgan oila bekalarining koʻngillari xotirjam.
Muhtaram Prezidentimiz Sh.M.Mirziyoyev rahbarligida mamlakatimizda xalqimiz baxt-saodati va kelajagini oʻzida mujassam etgan Qonunlarning hayotga izchil tatbiq etilayotgani, Birinchi Prezidentimiz I.A.Karimov asos solgan tinchlikparvar ichki va tashqi siyosatni amalga oshirish, dunyoda tinchlikni taʼminlash toʻgʻrisidagi tashabbuslarni dadil koʻtarib chiqayotgani xalqaro maydonda Oʻzbekiston davlatining nufuzini tobora oshirmoqda.
Gap mamlakatimizning tinchlikparvar siyosati haqida ketar ekan, "Oʻzbekiston Respublikasining tashqi siyosiy faoliyati kontseptsiyasini tasdiqlash toʻgʻrisida”gi Oʻzbekiston Respublikasi Qonuni tinchlikni taʼminlash va kafolatlashda muhim ahamiyatga ega boʻlganini taʼkidlash lozim. Ushbu Qonunga koʻra, Oʻzbekiston tinchlikparvar siyosat olib borishi, hech qanday harbiy-siyosiy bloklarda ishtirok etmasligi, har qanday davlatlararo tuzilma harbiy-siyosiy blokka aylangan taqdirda undan chiqib ketish huquqini oʻzida saqlab qolishi aniq qayd etib qoʻyilgan.
Qonunga muvofiq, Oʻzbekiston Respublikasi oʻzining qoʻshni davlatlar bilan savdo-iqtisodiy, madaniy va gumanitar aloqalarini mustahkamlaydi. Har qanday qurolli ziddiyatlarga va tang vaziyatlarga tortilishining oldini olish maqsadida zarur choralarni koʻradi. Oʻz hududida xorijiy davlatlarning harbiy bloklari va obʼektlari joylashtirilishiga aslo yoʻl qoʻymaydi. Oʻzbekiston Respublikasining Konstitutsiyasiga, "Mudofaa toʻgʻrisida”gi Qonunga va mamlakatimiz Qurolli Kuchlari Harbiy doktrinasiga asosan chet ellardagi tinchlik oʻrnatuvchi operatsiyalarda ishtirok etmaydi. Bu meʼyor, qoida va tamoyillar – xalqimizning xohish-irodasini ifoda etadi.
Xalqning xohish-irodasi – bu xalqimizning eng ulugʻ istagi – tinchlik va omonlik! Bu nafaqat xalq istagi, balki eng buyuk maqsadi, eng toʻgʻri va qatʼiy qaroridir!
Oʻzbekistondek jannatmakon yurtni oʻzlariga ona Vatan qilib, ahillikda yashayotgan 136 millat va elatlar baxt-saodati mujassam boʻlgan mamlakatimizning ichki va tashqi siyosat sohasida tutgan yoʻlini Prezidentimiz Sh.Mirziyoyevning ilk davlat tashriflarini Turkmaniston, Qozogʻiston hamda Tojikiston va Rossiya davlatlariga amalga oshirib, ishni mazkur davlatlar bilan iqtisodiy, siyosiy, madaniy va gumanitar aloqalarni yanada mustahkamlashdan boshlaganidan ham anglash mumkin. Bu tashriflar chogʻida Oʻzbekiston atrofida mustahkam "Farovonlik kamari”ni shakllantirish, tashrif davomida imzolangan, uzoq yillarga moʻljallangan oʻzaro iqtisodiy hamkorlik strategiyasini izchil amalga oshirish orqali qondosh va qardosh davlatlar aro doʻstlik hamda barqaror tinchlikni taʼminlash ustuvor vazifa qilib belgilangan.
Azaldan bir-birlari bilan yonma-yon yashagan qozoq, turkman, tojik, qirgʻiz va rusiyzabon xalqlarning oʻzaro ahil va totuv yashab, yaxshi qoʻshnichilik tamoyillari asosida turli sohalarda hamkorlik qilishlariga qulay sharoitlar yaratib berilayotgani oʻzaro manfaatlarni tan olish va har qanday masalani hal etishda hamkorlik printsipiga amal qilinishi yurtimiz atrofida yuqorida aytganimizday, "farovonlik kamari”ni shakllantirish, pirovardida mintaqada barqarorlikni yanada mustahkamlash, xalqlarimiz uchun munosib turmush sharoitlari yaratishga xizmat qiladi. Bu esa mamlakatlarning yuqori surʼatlarda ravnaq topishiga keng yoʻl ochadi.
Muxtasar qilib aytganda, jon qadar aziz, hayot qadar shirin eng oliy neʼmat – tinchlik, totuvlik, omonlik – xalqimiz uchun eng oliy qadriyat. Zotan, eng avvalo inson tinch boʻlsa, oila, oila tinch boʻlsa, millatlar, mamlakat tinch. Bir soʻz bilan aytganda, tinchlik bor joyda – inson albatta baxtli boʻladi.
TAHRIRIYaT.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
