YoSh-U KEKSALARI BIRDAY EʼZOZLANADIGAN YuRT

Jamiyatning kichik bir boʻgʻini hisoblanmish oilaning zimmasiga farzandni dunyoga keltirishgina emas, ularni yuksak maʼnaviyatli, maʼrifatli qilib tarbiyalash, jamiyatda oʻz oʻrnini mustaqil ravishda topishiga shart-sharoit yaratib berishdek vazifa ham yuklangan.

"Ona toʻgʻrisida, uning farzandi toʻgʻrisida gʻamxoʻrlik qilish davlatimizning muqaddas burchidir” deya  yozgan edi Birinchi Prezidentimiz I.A.Karimov.

Ha, darhaqiqat, mustaqillik yillarida ona va bolaga gʻamxoʻrlik, sogʻlom oilalarda sogʻlom farzandlarning dunyoga kelishi va ularni zamonaviy taʼlim asoslarini puxta egallab, barkamol insonlar boʻlib voyaga yetishlariga erishish asosiy vazifalardan biriga aylandi.

Bu asosiy Qonunimiz – Konstitutsiyamizda ham oʻz ifodasini topgan. Xususan, 64-moddada: "Ota-onalar oʻz farzandlarini voyaga yetgunlariga qadar boqish va tarbiyalashga majburdirlar.

Davlat va jamiyat yetim bolalarni va ota-onalarining vasiyligidan mahrum boʻlgan bolalarni boqish, tarbiyalash va oʻqitishni taʼminlaydi, bolalarga bagʻishlangan xayriya faoliyatlarni ragʻbatlantiradi”, deya koʻrsatilgan.

Ha, chindan-da bolalar bizning mamlakatimizda oʻz ota-onasi mehri ogʻushida ulgʻayadi, oʻz manfaatlari taʼminlanishi, insoniy qadr-qimmati hurmat qilinishi huquqiga ega.

Xalqimizda oʻzaro mehr-oqibat, doʻst-birodarlik, bagʻrikenglik kabi xislatlar azal-azaldan juda qadrlanib kelingan. Bu xislatlarning bari har birimizga onalarimiz mehri ila singgan. Buningdek olijanob, insoniy fazilatlar qoʻni-qoʻshnilarimiz bilan oʻzaro munosabatda, har bir bola tarbiyasiga qoʻni-qoʻshnilarning  ham oʻzini masʼul hisoblashida, yoshlar kamoli uchun hamjihatlikda harakat qilinishida oʻz ifodasini topadi.

Hukumatimizning, xalqimizning dunyoga kelayotgan har bir goʻdakning  emin-erkin, shodon ulgʻayishi yoʻlidagi cheksiz gʻamxoʻrligini 1-iyun – Xalqaro bolalarni himoya qilish kuni munosabati bilan tashkillashtirilayotgan turli koʻngilochar tadbirlar misolida ham his qilish mumkin.

Bizning qon-qonimizga singib, qadriyat darajasiga koʻtarilgan shunday odatlarimiz borki, ularning zamirida inson hamisha yorqin orzular yoʻlida mehnat qilib, farzand oʻstirib, ularning kamolidan quvonib yashashi, keksalik  davrini ham farogʻatda, eʼzozda oʻtkazishdek olijanob maqsadlar mujassam.

Ha, bizning yurtimiz keksalari baxtiyor, koʻngil xotirjamligiga erishgan, oʻz hayotiy tajribalari asosida kelgusi avlodlarni toʻgʻri yoʻlga boshlaguvchi maʼnaviy ustozlardir. Har bir farzand voyaga yetib, mehnatga layoqatli boʻlgach, Asosiy Qonunimizning 66-moddasida ifodalanganiday, oʻz ota-onalari toʻgʻrisida gʻamxoʻrlik qiladilar, keksaligining har bir kuni rohat-farogʻatda oʻtishi uchun intiladilar. Mehr-eʼtibor, eʼzoz topgan, ardoqlangan inson oʻz umridan mamnun yashashi, uzoq umr koʻrishi tabiiydir. Keyingi yillarda mamlakatimizda umr koʻrish davomiyligi oshganligi ham bejiz emas.

Bizning mustaqil va ozod, obod yurtimizning kichiklari izzatda, keksalari hurmatda.    

Oygul RAJABOVA.

(Foto: OʻzA)