FARZANDLARIMIZ OTA-ONA NAZORATIDA TAʼLIM OLGANI YaXShI

Har bir ota-ona uchun farzandining sogʻligi qanchalik muhim boʻlsa, oʻqib, ilm olishi, kasb-hunar egallashi undan-da muhimroq. Bekorga xalqimiz: "yoshlikda olingan bilim – toshga oʻyilgan naqsh”, degan maqolni yaratmagan.

Mening farzandlarim umumtaʼlim maktabining 11-sinfini tamomlab, turli kasb egalari biri – chevar tikuvchi, biri – kutubxona ishlari boʻyicha mutaxassis, yana biri sanʼatkor boʻlib yetishdilar. Hammalari hayotda oʻz oʻrinlarini topishdi. Nevaralarim esa...

Toʻgʻrisi, katta nevaram oʻrta maxsus, kasb-hunar kollejiga oʻqishga kirganida juda quvongan edim. Tanlagan yoʻnalishi boʻyicha yaxshi kasb egasi boʻlib yetishsa, ishlasa, el-yurtga nafi tegsa – qanday yaxshi! Lekin bunday boʻlmadi. Nevaram oʻqishga bir kun borsa, 2-3 kunlab darsdan qoladigan, hatto oʻqishga biron oʻquv qurolisiz ketadigan kunlari koʻp boʻldi. "Nega darslik yoki daftar-qalamsiz oʻqishga borayotirsan?” – desam, "hamma shunday borishadi, oʻqish unchalik boʻlmaydi”, – deb javob berardi. Oʻzim oʻqituvchi boʻlib ishlab, nafaqaga chiqqanim uchun kollejlarning moddiy-texnika bazasini  mustahkamlash maqsadida davlatimiz tomonidan yillar davomida ajratilayotgan milliardlab soʻmlik mablagʻlar, barpo etilayotgan kollej binolari, bundan ham muhimi, ayni oʻqib-oʻrganadigan, kasb-kor egallaydigan yoshdagi farzandlarimizning havoga sovurilgan qimmatli vaqtlariga achinib ketardim, har gal nevaramning bunday gaplarini eshitganimda.

Muhtaram Prezidentimiz Sh.Mirziyoyev oʻrta-maxsus, kasb-hunar taʼlimi tizimi sohasini oʻrganib, taʼlimning bu yoʻnalishida yoʻl qoʻyilayotgan kamchiliklarga haqqoniy munosabat bildirdilar, 11-yillik majburiy taʼlim tizimini qaytadan joriy etish taklifini ilgari surganlarida, ochigʻi, quvonchdan koʻzlarim namlandi. Axir bizning "Choykoʻl” ovulimizdan tumanimiz markazidagi va Qipchoq ovulidagi kasb-hunar kollejlariga 3-yil davomida chala-chulpa qatnab oʻqib, qoʻlida kollej diplomi bilan ishsiz yurgan qancha yoshlar bor: ularning deyarli  barchasi ishsiz, ishlayotganlari ham yollanma ishchilar ekanligini hisobga olsak, farzandlarimizning ota-onasi bagʻrida, oʻz uyidan kirib-chiqib, umumtaʼlim maktabida tahsil olgani, haftaning maʼlum kunlarida  kasb yoʻnalishlari boʻyicha oʻquv kurslari mashgʻulotlarida qatnashib, zarur malaka va koʻnikmaga ega boʻlganlari hamma ota-onalar uchun maʼqul. Shaxsan men nevaralarimning umumtaʼlim  maktabida 11 yillik maʼlumot olish asnosida kasb-kor egallashlaridan juda xursandman. Oʻquvchi haftaning belgilangan kunlarida duradgor-ustakorlik, chevarlik, avtomobillarga texnik xizmat koʻrsatish, buxgalteriya hisobi, haydovchilik, toʻquvchilik yoki kompyuter mutaxassisligi kabi hunarlarni belgidangan qisqa muddat ichida oʻzlashtirib olaveradi. Buning uchun kollejga 3-yil qatnashi shart emas. Muhimi, farzandlarimiz oʻzimizning nazoratimiz ostida boʻladi. 11-yillik maktab taʼlimi qayta tiklangani, menimcha, har bir oila, ota-ona uchun ayni muddao boʻldi.

Gulsara KAMOLOVA,

"Choykoʻl” ovuli, faxriy oʻqituvchi.