Paxta yigʻim-terimi avjida (+Video)

Bu yil ham tumanimizda dehqonlarimizning mashaqqatli mehnati evaziga yetishtirilgan paxta hosilini yogʻin-sochinli kunlarga qoldirmay, tez va sifatli yigʻib-terib olish uchun barcha sharoitlar koʻrildi. Navbatdagi dolzarb masala - yetishtirilgan hosilni yogʻin-sochinli kunlarga qoldirmay terib olishdir. Barcha joylarda boʻlgani kabi tumanimizda ham yigʻim-terim ishlari tizimli ravishda tashkil qilingan. Paxta terimi mavsumini uyushqoqlik bilan oʻtkazish boʻyicha doimiy faoliyat yurituvchi «Paxta shtabi» tashkil qilinib, barcha masalalarni muvofiqlashtirish, yuzaga kelgan muammolarni tezkor hal etish, yigʻim-terimning kunlik borishi boʻyicha monitoring yuritish yoʻlga qoʻyildi.

Natijada yigʻim-terim ishlari tizimli ravishda yoʻlga qoʻyilib, mehnat zafariga erishayotgan fermer xoʻjaliklari safi kun sayin ortmoqda. Qilichboydagi "Zarifboy Toʻlgʻonoy” fermer xoʻjaligi ham shular jumlasidan. Fermer xoʻjaligida davlatga paxta sotish boʻyicha yillik shartnomaviy reja bajarilgani munosabati bilan xoʻjalik ishchilari va hasharchilar uchun dasturxon yozilib, ilgʻor terimchilar ragʻbatlantirildi.

Bu yilgi paxta yigʻim-terimi mavsumida fuqarolar yigʻinlari tomonidan jalb qilingan uyushmagan aholi, tumandagi xoʻjalik hisobidagi korxona, muassasa va tashkilotlar ishchi-xizmatchilari, "Fidoyi yoshlar otryadi” aʼzolaridan iborat minglab hasharchilar dehqonlarga beminnat yordam bermoqdalar.

Terim ishlarini uyushqoqlik bilan oʻtkazishda har gektarga talab etiladigan terimchilar sonini toʻgʻri belgilash ham muhim ahamiyatga ega. Aks xolda, paxta terimida yuqori natijalarga erishib boʻlmaydi. Har bir konturdagi hosil dalaning katta-kichikligidan qatʼiy nazar 2-3 kunda terib olinishini taʼminlash maqsadida terim ishlari otryad usulida olib borilmoqda.

Bu maqsadda tashkil qilingan terim otryadlari aʼzolariga barcha sharoitlar yaratib berilgan. Xususan, shahardan jalb qilingan terimchilar yotoqxonalar bilan taʼminlangan. Har bir terimchi paxta tozalash zavodi tomonidan fartuk va sholchalar bilan taʼminlangan boʻlib, ularga har kuni terim pulini dalaning oʻzida tarqatish maqsadida fermer xoʻjaliklariga bank xodimlari biriktirilgan. Terilgan paxtalar esa kuniga 2 mahal oʻlchab olinmoqda va qabul maskanlariga yetkazilmoqda.

Bu yilgi mavsumda oʻziga xos tizim asosida ishsiz aholi ixtiyoriy ravishda paxta yigʻim-terimiga jalb qilinmoqda. Bu birinchidan paxtani yogʻin-sochinli kunlarga qoldirmay terib olish mikonini bersa, ishsiz aholi uchun daromad manbaidir. Qolaversa, turli davlat va jamoat tashkilotlari paxtakorlarni qimmatbaho esdalik sovgʻalari bilan ragʻbatlantirib kelmoqda.