TOMORQADA HIKMAT KOʻP

Xalqimiz azal-azaldan tilsiz zamin bagʻridan oʻz rizqini undirib, tirikchilik qilib kelgan. Afsuski, qariyb bir asrga yaqin hukm surgan sobiq ittifoq tuzumi davrida qishloq odami tongdan shomgacha paxta dalasidan chiqa olmadi, hovlisi atrofini oʻylagulik fursati boʻlmadi, oʻzimizda yetishtirish imkoniyati yetarli boʻlgan poliz mahsulotlari, sabzavotlarning chetdan keltirilganini bir kun sotib ololsa, bir kun ololmay, boriga qanoat qilib yashadi, yerga ixlosi qoʻllab-quvvatlanmadi.

Shukurki, bular bari oʻtmishda qoldi. Oilada daromad manbalarini yaratish, daromadni oshirish tufayli xalqimiz turmushi tobora farovonlashmoqda. Tomorqa oila iqtisodini yuksaltiruvchi, rizq-roʻzini ziyoda qiluvchi manba ekanligi bugun barchaga birdek ayon.

Joriy yilda tumanimiz boʻyicha 410 yuridik maqomga ega boʻlgan dehqon xoʻjaliklari va 32 ming 570 nafar tomorqa yer egalarining 5 ming 217,4 gektar ekin maydonlarining barchasidan unumli foydalanish va yuqori hosil yetishtirish boʻyicha chora-tadbirlar ishlab chiqildi.

Aholi oʻrtasida tushuntirish-targʻibot ishlari olib borilib, dehqon xoʻjaliklari va tomorqa yer uchastkasidan samarali foydalanish, oila daromadini oshirish, shuningdek, issiqxona barpo etish, chorva mollari, parrandalar parvarishlash, asalarichilik bilan shugʻullanishni tashkil etish qoʻshimcha daromad manbai ekani aniq misollar asosida tushuntirilmoqda. Bunda tomorqasida arzon, sifatli meva-sabzavot va poliz mahsulotlari yetishtirayotgan oilalar tajribasi keng ommalashtirilayapti.

Aholi bilan oʻtkazilayotgan muloqotlarda Oʻzbekiston Respublikasi Soliq kodeksining 291-moddasiga asosan yakka tartibdagi uy-joy qurish va uy-joyni obodonlashtirish uchun berilgan yer uchastkalarining tomorqa qismiga qishloq xoʻjaligi ekinlari ekilmagan yoki obodonlashtirilmagan hollarda 3 barobar miqdorda yer soligʻi toʻlanishini belgilovchi qoʻshimchalar kiritilgani haqida maʼlumotlar berilmoqda.

Dehqon xoʻjaliklari ekin maydonlaridan samarali foydalanmaslik endilikda yer uchastkasiga boʻlgan huquqni qonun hujjatlarida belgilangan tartibda bekor qilish boʻyicha choralar koʻrilishiga olib kelishi mumkinligi tushuntirilayapti.

Tomorqa! Ostona hatlab uyimizdan chiqishimiz bilan nazarimiz tushadigan bu daxlsiz hududimiz bizdan endi oqilona munosabatni, ekin ekib moʻl hosil undirishda ilm-fan yutuqlaridan omilkorlik bilan foydalanishni talab qilmoqda. Axir, uning qay yoʻsinda koʻz oʻngimizda namoyon boʻlishi oʻz saʼy-harakatimizga bogʻliq.

Ishning oʻzini emas, koʻzini bil, deydi donolar. Oʻz tomorqa yeriga qanday ishlov berishni, qanday oziqlantirishni, ekindan qanday hosil olishning hadisini olgan yurtdoshlarimiz joriy yil hosili uchun ekish ishlariga allaqachon kirishib ketishdi. Beda, ertagi kartoshkalari unib chiqa boshladi.

Farzandlarini qaygʻurgan, yaxshi koʻrgan odam tomorqasidan samarali foydalanadi. Kartoshka, piyoz, pomidor, bodring, sabzi, mevalar oʻz tomorqasida yetilib tursa, roʻzgʻorda yetar-yetmaslik boʻlmaydi. Bu neʼmatlarni farzandlaring oʻz qoʻli bilan uzib yesa, bu qanchalar baxt.

Tomorqada rizqimiz unibgina qolmay, bizga oʻz mehnatimizdan zavqlanish baxtini ham beradi, butun oila hamjihatlikda mehnat qilish koʻnikmasini shakllantiradi, mehnatni qadrlashga oʻrgatadi.

Ha, tomorqada hikmat koʻp.

Oygul RAJABOVA.