Prezident davlat maslahatchisining oʻrinbosari Amudaryoda sayyor qabul oʻtkazdi (+video)

16-may kuni Amudaryo tumani hokimligida Oʻzbekiston Pespublikasi Prezidenti devonining Jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati tomonidan tuman aholisi uchun sayyor qabul tashkil etildi. Unda Oʻzbekiston Pespublikasi Prezidentining Davlat maslahatchisi oʻrinbosari A.Usmanov, Qoraqalpogʻiston Pespublikasi Joʻqorgʻi Kengesi Paisi M.Yerniyazov, Pespublika Vazirlar Kengashi raisi Q.Sariyev, sud, prokuratura va ichki ishlar organlari masʼullari, vazirlik va idoralar rahbarlari hamda keng jamoatchilik vakillari ishtirok etdi.

Sayyor qabulda Oʻzbekiston Pespublikasi Prezidentining Virtual qabulxonasi va Xalq qabulxonalariga tuman aholisi tomonidan yoʻllangan murojaatlar koʻrib chiqildi.

Aytish kerakki, Oʻzbekiston Pespublikasi Prezidentining Amudaryo tumanidagi Xalq qabulxonasiga joriy yil boshidan shu kunga qadar jismoniy va yuridik shaxslardan 162 ta murojaatlar kelib tushgan. Shundan 94 tasi hududiy, 7 tasi yuqori tashkilotlarga koʻrib chiqish va hal qilish uchun yuborilgan. Murojaatlarning 61 tasi xalq qabulxonasida koʻrib chiqilgan.

Kelib tushgan murojaatlarning 125 tasi qanoatlantirilgan. Shundan 39 tasi ijobiy yechimini topib, murojaat qiluvchilarning foydasiga hal qilingan. 48 tasi esa huquqiy maslahat va maʼlumot berish orqali hal qilingan. Qanoatlantirilgan murojaatlarning 38 tasi asosli deb topilgan va qoʻshimcha hujjat, muddat va oʻrganish evaziga hal etilgan. 19 ta holatda esa murojaat qiluvchilarga tushuntirishlar berilgan.

Oʻtkazilgan sayyor qabul jarayonida fuqarolar vazirliklar va tegishli idora rahbarlariga toʻgʻridan-toʻgʻri oʻz muammolari bilan murojaat qildilar hamda javob oldilar. Murojaatlarning aksariyati shu joyning oʻzida yechimini topdi, baʼzi muammolarni esa batafsil oʻrganish boʻyicha mutasaddi idora va tashkilot masʼullariga tegishli topshiriqlar berildi.

Fuqarolar murojaatlarining aksariyati sogʻlikni saqlash, taʼlim, bandlik va boshqa ijtimoiy, bank-moliya tizimiga oid iqtisodiy masalalar hamda uy-joy, kommunal xoʻjaligiga oid maishiy muammolar xususida boʻldi.

Boʻzyop ovulida yashovchi fuqaro Oʻ.Yermekenov va Qangli ovulidan fuqaro J.Pajapovlar mazkur ovullar hududida suyultirilgan gaz ballonlari tarqatish boʻyicha servis shoxobchasini qurish masalasida murojaat qildi. Ushbu masala “Oʻztransgaz” AJning “Qoraqalpogʻiston gaz” filiali maʼmuriyati tomonidan koʻrib chiqildi va shu joyning oʻzida ijobiy hal qilinadigan boʻldi. Yaqin vaqt ichida Boʻz yop va Qangli MMTP balansidagi mavjud foydalanilmay turgan binolar tuman hokimligi kelishimiga binoan “Qoraqalpogʻiston gaz” filiali balansiga oʻtkazilib, tumanning bu ikkala chekka ovulida ham suyultirilgan gaz ballonlarini tarqatish shoxobchalari ish boshlaydi.

Amir Temur nomli ovulda istiqomat qiluvchi bir guruh fuqarolarning “Musofir” aholi punktida isteʼmolchilar sonining oshishi natijasida mavjud transformatorning kuchlanishi yetmayotganligi, shuning uchun yangi transformator oʻrnatishda amaliy yordam berishni soʻrab qilgan murojaati ham ijobiy hal qilindi. “Qoraqalpoq hududiy elektr tarmoqlari korxonasi” aktsiyadorlik jamiyati tomonidan shu kunning oʻzida mazkur aholi punktidagi 63 kVa kuchlanishli transformator 160 kVa kuchlanishli yuqori quvvatli transformatorga almashtirildi.

Sayyor qabul davomida jismoniy shaxslar hamda yuridik shaxslarning vakillari tomonidan bildirilgan 63 ta murojaat koʻrib chiqildi. Murojaatlarning barchasi toʻliq oʻrganib chiqilishi, ularni hal qilish boʻyicha tegishli choralar koʻrilishi va natijalari haqida murojaat egalariga yozma ravishda xabardor qilinishi maʼlum qilindi.

Gʻ.Yeshniyozov