OZODLIK, BAXT, IQBOL TANTANASI

Mustaqillik bayrami keng nishonlandi (Fotogalereya, 1-qism)

Mustaqillik bayrami keng nishonlandi (Fotogalereya, 2-qism)

Mustaqillik! Xalqimiz uchun milliy davlatchiligini, oʻzligini, insoniy haq-huquq va qadr-qimmatini tiklash, urf-odat, anʼanalarini, muqaddas dinini, buyuk ajdodlarimizning tabarruk nomlarini ulugʻlash va ularning maʼnaviy merosini chuqur oʻrganish, sogʻlom va barkamol avlodni shakllantirish borasida ilgari tasavvur ham qilib boʻlmaydigan imkoniyatlarni bergan bu ulugʻ va muqaddas neʼmatning qadr-qimmati va ahamiyati tobora ortib bormoqda. Bosib oʻtilgan 27-yillik ogʻir va mashaqqatli davridagi ertagi kunimizga yuksak ishonch bilan amalga oshirilgan ezgu maqsadlar yoʻlidagi saʼy-harakatlar bugun bizga ozod, obod va farovon, inson shaʼni-qimmati yuksak tutiluvchi baxtiyor zamonga yetkazdi.

Shu boisdan ham har yili mamlakatimiz mustaqilligi kuni – 1-sentyabr butun yurtimiz boʻylab ulkan tantana qilinadi. Milliy bayramimiz shukuhi kirib bormagan xonadon qolmaydi.

Shu yilning 29-avgustida Amudaryo tumanida ham “Aziz va yagonamsan, jonajon Oʻzbekistonim” shiori ostida ulkan teatrlashtirilgan bayram tomoshalari boʻlib oʻtdi. Avvalo oʻz ovul, mahallalarda, mehnat jamoalarida istiqlol tantanalarini nishonlab, bu kun tuman miqyosidagi bayram namoyishiga tashrif buyuruvchilarning barchasining koʻzlarida quvonch, tillarida shukrona.

Oʻrta Qalʼa ovulining Vaxum aholi punktida joylashgan oʻyingoh bayram tomoshasiga oshiqayotganlarni oʻz bagʻriga chorlamoqda. Oʻyingohning oʻziga xos bezatilishi ham kishi ruhini koʻtarib yuboradi. Oʻyingohning gullar qulf urib turgan kiraverishi joriy yilimizning oʻtgan davrida amalga oshirilgan ulkan bunyodkorliklar aks etgan bannerlar, chaqiriqlar, bayroqlar, sharlar bilan bezatilgan.

Bayram tomoshalariga taklif qilingan rasmiy mehmonlar non-tuz bilan qarshi olindi. Ular tuman hokimi S.Yoʻldashev boshchiligida dastlab tumanimiz fermer xoʻjaliklarida yetishtirilgan qishloq xoʻjaligi mahsulotlari koʻrgazmasini tomosha qildilar.

Har biri oʻz oldiga oʻtov tiklab, oʻz mahsulotlarini peshtaxtalarga did bilan terib qoʻygan hech bir ovul, mahalla dehqonlari koʻrgazmasiga qoyil qolmay iloj yoʻq.

Ha, bu – bugun Amu eli fermerlari faqat dehqongina emas, dunyo tajribasini oʻrganib, oʻz faoliyatiga tatbiq etayotgan, dehqonchilikni ilmiy asosda tashkil etayotgan uddaburon, ishbilarmon ekanligini mana shu koʻrgazma ham isbotlay oladi.

Aziz mehmonlar tumanimiz hunarmandlari namoyish etgan mahsulotlarni ham qiziqib tomosha qildilar.

Oʻyingohda yigʻilgan tomoshabinlar rasmiy mehmonlarning tashrifini qarsaklar bilan olqishladilar, musiqiy chorlov yangradi.

Tuman hokimi Sultonboy Yoʻldashev yigʻilganlarni, butun tumanimiz xalqini xalqimizning asriy orzularini roʻyobga chiqargan Mustaqillik bayrami bilan qizgʻin qutladi. Tabrikdan soʻng mamlakatimiz madhiyasi yangradi. Oʻyingohda saf tortgan oʻquvchi-yoshlar, sanʼatkorlar koʻngillarida olamga faxr, gʻurur bilan madhiyamizni olqishladilar.

Bayram shodiyonasini “Ofarin” folklor etnografik xalq jamoasi aʼzolari “Bayram shodiyonasi” kuyi bilan boshlab berdilar.

Tantanada shuningdek, “Uchqun” ashula va raqs xalq ansambli, oʻzbek milliy asboblar ijrochi sozandalaridan tashkil topgan cholgʻu ansambli hamda tumanimizning turli hududlarida faoliyat koʻrsatayotgan madaniyat markazlaridagi havaskorlik toʻgaraklari aʼzolari hamkorlikda tayyorlagan ulkan teatrlashtirilgan bayram tomoshasidagi qoʻshiqlar, kompozitsion chiqishlar, sahna koʻrinishlarining barcha-barchasida istiqlolimiz, istiqlol tufayli erishgan dorilomon kunlarimiz, yurtimizda ezgu niyatlar bilan amalga oshirilayotgan bunyodkorlik, taraqqiyotimiz aks etdi.

Tumanimiz sport sharafini yuqori koʻtarayotgan sportchilarning chiqishlari, shuningdek, milliy sport musobaqalarini yigʻilganlar zavq bilan tomosha qildilar.

Erk, ozodlik! Bu bebaho neʼmatlar inson baxt-saodati uchun naqadar muhim ekanligi mustaqillikning 27-yilida erishilgan asrlarga tatigulik yuksalishlarda ham ayon. Oʻtkazilgan bayram tomoshasi buni qalblarimizga yanada teranroq joyladi.

O. PAJABOVA.