ISLOMBEK MATKARIMOV “OʻZBEKISTON RESPUBLIKASI QIShLOQ XOʻJALIGI FIDOYISI” KOʻKRAK NIShONI SOHIBI BOʻLDI

Oʻzbekiston Respublikasi Vazirlar Mahkamasining 2018-yil 28-iyunda qabul qilgan 87-sonli Qaroriga muvofiq qabul qilingan “Oʻzbekiston Respublikasi qishloq xoʻjaligi fidoyisi” koʻkrak nishoni toʻgʻrisida”gi Nizomda ushbu koʻkrak nishoni bilan mehnat tajribasi va kasbiy malakaga ega, faoliyatida yuqori natijalarga erishgan, sohada fidokorona mehnati bilan namuna boʻlgan Oʻzbekiston Respublikasi Qishloq xoʻjaligi vazirligi markaziy apparati, uning hududiy va  tarkibiy boʻlinmalari rahbar xodimlari, shuningdek, qishloq xoʻjaligi mahsulotlarini qayta ishlash korxonalari, xizmat koʻrsatuvchi tashkilotlar, davlat va xoʻjalik boshqaruvi idoralari hamda joylardagi ijro hokimiyati organlari xodimlari taqdirlanishi belgilangan edi.

Mamlakatimizda dekabr oyining ikkinchi yakshanbasida nishonlangan Qishloq xoʻjaligi xodimlari kuni arafasida “Oʻzbekiston Respublikasi qishloq xoʻjaligi fidoyisi” koʻkrak nishoni bilan taqdirlangan yurtdoshlarimiz nomlari eʼlon qilindi. Ularning safida tumanimiz Qishloq xoʻjaligi boʻlimi boshligʻi Islombek Matkarimov ham bor.

1982-yilda Toʻlqin ovulida ziyolilar oilasida tugʻilgan, 2003-yilda Toshkent kimyo-texnologiya institutini tugatib, tumanimizda oʻz mehnat faoliyatini boshlagan Islombek 2003-2004-yillar mobaynida Mangʻit qishloq xoʻjalik kasb hunar kollejida ishlab chiqarish taʼlimi ustasi, 2004-2005-yillarda 7-sonli maktabda laborant, 2005-2007-yillarda tuman Qishloq va suv xoʻjaligi boʻlimi suvdan foydalanuvchilar birlashmalari ishlarini muvofiqlashtirish boʻyicha bosh mutaxassis, 2007-2009-yillarda tuman Qishloq va suv xoʻjaligi boʻlimi shartnoma boʻyicha bosh mutaxassisi, 2009-2010-yillarda “Oʻzargosugʻurta” davlat aktsiyadorlik sugʻurta kompaniyasi Qoraqalpogʻiston Respublikasi direktsiyasi Amudaryo tuman boʻlinmasi boshqaruvchi menejeri, 2010-2013-yillarda Oʻzbekiston Respublikasi “Kamolot” yoshlar ijtimoiy harakati tuman Kengashi raisi, 2013-2014-yillarda tuman hokimligi jamoat va diniy tashkilotlar bilan aloqalar boʻyicha bosh mutaxassisi, 2014-2015-yillarda “Oʻzbekiston pochtasi” ochiq aktsiyadorlik jamiyati Qoraqalpogʻiston fililali Mangʻit pochta aloqa tarmogʻi boshligʻi, 2015-2018-yillarda “Toʻlqin” muqobil mashina-traktor parki raisi, 2018-yildan esa tuman Qishloq xoʻjaligi boʻlimi boshligʻi lavozimlarida fidoyilik bilan mehnat qilib kelmoqda. Shu bilan birga 2011-yil boshidan beri “Amudaryo sohili” fermer xoʻjaligini mohirlik bilan boshqarib, barcha sohalar boʻyicha mahsulot yetishtirish rejalarini ortigʻi bilan ado etib, fermerlikni rivojlantirish, chorva mahsulotlarini koʻpaytirishda samarali mehnat qilib kelmoqda.

U rahbarlik qilayotgan “Amudaryo sohili” fermer xoʻjaligi asosan chorvachilikka – goʻsht va sut mahsulotlari yetishtirishga ixtisoslashgan. Xoʻjalik tashkil qilingan yili bank krediti mablagʻlari hisobidan Gollandiya texnologiyasi asosida yangidan zamonaviy uslubda chorva kompleksi qurilib ishga tushirildi va chetdan naslli mollar keltirildi. Birgina 2017-yilning oʻzida Polsha davlatidan umumiy bahosi 172,6 ming AQSh dollarlik 66 bosh naslli mollar olib kelinib, hozirgi kunda zotdor mollar soni 180 boshga yetkazildi.

Xoʻjalikda olinayotgan daromad hisobiga yer haydash, ekish, oʻrim-yigʻim texnikalari, oʻt oʻrish, ozuqa maydalash-tayyorlash agregatlari olinib, deyarli barcha ishlar oʻz texnikalari yordamida amalga oshiriladi.

Tinib-tinchimas yigit 2011-yilda baliqchilikni ham yoʻlga qoʻyib, bu borada oʻz bilimlarini oshirish, dunyo ilgʻor tajribalarini oʻrganish maqsadida Vetnam davlatida Oʻzbekiston Respublikasi delegatsiyasi safida seminarda boʻlib qaytdi, “Amu Toʻlqin baligʻi” masʼuliyati cheklangan jamiyatini tashkil etib, umumiy qiymati 58 million soʻmlik kichik inkubatsiya tsexini ishga tushirdi. Har yili mazkur tsexda 5 tonnadan ziyod baliq yetishtirilmoqda.

Tadbirli, izlanuvchan, intiluvchan yigit qishloq xoʻjaligi mahsulotlari yetishtirishni koʻpaytirishga qoʻshayotgan hissasi uchun 2014-yilda “Tashabbus” koʻrik-tanlovining “Eng yaxshi fermer” yoʻnalishida Qoraqalpogʻiston boʻyicha gʻoliblikni qoʻlga kiritib, mamlakat bosqichida ishtirok etishga muvaffaq boʻldi va “Oziq-ovqat sanoatidagi eng yaxshi yil tadbirkori” nominatsiyasi gʻolibi boʻldi.

Islombekning chorvachilik sohasida erishayotgan muvaffaqiyatlarini Qoraqalpogʻiston miqyosida ommalashtirish uchun naslchilik fermer xoʻjaliklari raislari, mutaxassislari ishtirokida keyingi uch yilda 5-marta mazkur fermer xoʻjaligida koʻrgazmali seminar oʻtkazilgani ham bejiz emas.

Xoʻjalik daromadlari hisobidan 2016-yilda sut va goʻshtni qayta ishlashga moʻljallangan tsex, 1 ta maishiy xizmat koʻrsatish shoxobchasi, zamonaviy uslubda kichik futbol maydonchasi qurilib ishga tushirildi va natijada 25 ta yangi ish oʻrni yaratildi.

Islombek Matkarimov hududdagi ishsiz aholini ish bilan taʼminlab, ularning ham oilasi iqtisodi yuksalishiga hissa qoʻshayotgan tashabbuskordir.

Uning bu savobli xizmatlari eʼtirof etilib, yaqinda, Qishloq xoʻjaligi xodimlari kuni arafasida “Oʻzbekiston Respublikasi qishloq xoʻjaligi fidoyisi” koʻkrak nishoni bilan taqdirlangani koʻpchilikni quvontirdi.

Tabiatan tirishqoq bu yigitning hali koʻplab xayrli ishlar qilishiga ishonamiz.

Oygul RAJABOVA.