Maktabgacha taʼlim muassasalari xodimlari uchun seminar tashkil qilindi

Bugungi kunda mamlakatimizda maktabgacha taʼlim sohasiga katta eʼtibor qaratilib kelinmoqda.Tuman miqyosida maktabgacha taʼlim muassasalariga bolalarni qamrab olishni oshirish, muassasaning moddiy-texnik bazasini yaxshilash hamda taʼlim-tarbiya jarayoniga ilgʻor pedagogik texnologiyalarni tadbiq qilish boʻyicha qator ishlar amalga oshirilmoqda.

2019-yil 2-fevral kuni 9-sonli bolalar musiqa va sanʼat maktabi hamda Amudaryo akademik litseyi majlislar zalida Qoraqalpogʻiston Respublikasi Maktabgacha taʼlim vazirligi bir guruh xodimlari ishtirokida seminar tashkil qilindi. Seminarga tumandagi barcha  maktabgacha taʼlim muassasalari mudirlari, tarbiyachi xodimlari hamda maktabgacha taʼlim boʻlimi xodimlari ishtirok qildilar.

9-sonli bolalar musiqa va sanʼat maktabi Musiqa maktabining majlislar zalida   maktabgacha taʼlim muassasalari mudirlari va tarbiyachi xodimlariga maktabgacha taʼlim tizimida olib borilayotgan islohotlar boʻyicha maʼlumotlar berildi. Seminar davomida muassasalarda taʼlim-tarbiya jarayonini tashkil qilish, ijro intizomi va muassasa hujjatlarini yuritish, ota-onalar badal toʻlovlarini oʻz vaqtida hisob-kitob qilish ishlari boʻyicha toʻliq tushunchalar berib oʻtildi.

Maktabgacha taʼlim muassasalari uchun yangidan joriy  qilingan Davlat talablari  hamda  “Ilk qadam” oʻquv dasturini maktabgacha taʼlim muassasalarida amaliyotga tadbiq qilish, maktabgacha taʼlim muassasalariga bolalar qamrovini oshirish va bu borada olib borilayotgan ishlar boʻyicha ham batafsil maʼlumot berildi.

Oʻzbekiston Respublikasi Sogʻliqni saqlash vazirligi tomonidan 2018-yil 27-aprelda qabul qilingan sanitariya normalari va qoidalari boʻyicha Akademik litseyning majlislar zalida muassasalarning xoʻjalik ishlari boʻyicha mudiri, hamshira va oshpaz xodimlari uchun seminar oʻtkazildi.

Muassasalarda tarbiyalanuvchilarning sogʻlom ovqatlanishini tashkil qilish masalalariga ham alohida toʻxtalib oʻtildi. Qoraqalpogʻiston Respublikasi Maktabgacha taʼlim vazirligi xodimlari Shamshiddin Mamutov va Baxtigul Abdullayevalar  maktabgacha taʼlim muassasalarda sogʻlom ovqatlantirishni toʻgʻri tashkil qilish, oziq-ovqat mahsulotlarini sifatli saqlash, kundalik menyularni toʻgʻri tuzish hamda bu borada sanitariya qoidalari va meʼyorlariga amal qilish yuzasidan tushunchalar berib oʻtdilar.

Qiziqarli va foydali maʼlumotlarga boy boʻlgan seminarda mavzular slaydlar hamda koʻrgazmali vositalar orqali yanada chuquurroq yoritib berildi.

Seminar oxirida ishtirokchilar oʻzlarini qiziqtirgan savollarga toʻliq javob oldilar. Bunday seminarlarning tashkil qilinishi maktabgacha taʼlim muassasalari faoliyatini yanada rivojlantirish va yosh avlodga zamonaviy  taʼlim-tarbiya berishda muhim ahamiyat kasb etadi.

A.Nasirillayev, tuman Maktabgacha taʼlim boʻlimining maʼnaviy-axloqiy tarbiya masalalari boʻyicha shoʻʼbasi metodisti.