MEHNATDAN KELSA BOYLIK...

Qilichboy ovulida obroʻ-eʼtiborli insonlar va fayzli xonadonlar haqida gap ketganida, albatta, odamlar “Olim brigadir” nomi bilan elga tanilgan mehnatkash, jonkuyar, fidoyi inson – Olimboy Rajabov va uning halol mehnatlari evaziga yaralgan bogʻ-rogʻli, fayzli xonadoni haqida soʻzlashadi.

Haqiqatan ham ushbu xonadonga tashrif buyursangiz inson mehnati qanchalar farovonlik va goʻzallik yaratishga qodir ekanligiga, “Mehnatdan kelsa boylik, turmush boʻlar chiroylik”, degan naqlning nechogʻlik toʻgʻri aytilganiga guvoh boʻlasiz.

Olimboy aka ovuldagi 7 yillik maktabni (hozirgi 15-sonli) tugatishi bilanoq biror bir kasb-korga ega boʻlishga harakat qildi. U shu maqsadda 1959-yilda 25-sonli Toʻrtkoʻl bilim yurtida, 1966-69-yillarda Toshkent industrial texnikumida va 1974-1977-yillarda Toshhovuz qishloq xoʻjaligi texnikumida tahsil oldi.

Olimboy aka mehnat faoliyatini sobiq M.Gorkiy nomli davlat xoʻjaligida traktorchi boʻlib ishlashdan boshladi.

Xoʻjalik rahbarlari Olimboy Rajabovdagi qishloq xoʻjaligi texnikalariga boʻlgan qiziqishni hisobga olishib, uni bosh mexanik vazifasiga tayinlashdi. Bu vazifada 3-yil muvaffaqiyatli faoliyat koʻrsatgach, u brigada boshligʻi vazifasiga oʻtkazildi.

Olimboy Rajabov bu vazifada salkam oʻttiz yil, nafaqaga chiqquniga qadar faoliyat koʻrsatdi. U bu davr mobaynida haqiqiy qishloq xoʻjaligi xodimiga, aniqrogʻi, haqiqiy paxtakorga aylandi. Shu davrda u nafaqat M.Gorkiy nomli davlat xoʻjaligida, balki, Amudaryo tumanida paxtachilik sohasining yuqori hosil ustasi sifatida tan olindi. Bunday fidokorona mehnatlari uning koʻksini qator davlat mukofotlari bilan bezadi. Dongdor paxtakor sifatida tanilgan Olimboy Rajabov 1987-yilda bir qancha chet mamlakatlarga sayohatlarga yuborildi.

Olimboy aka oʻzining bunday muvaffaqiyatlarida oilasining oʻrni benihoya katta boʻlganligi haqida takror va takror soʻzlaydi. U 1960-yilda Toʻlgʻonoy opa bilan turmush qurib, mustahkam oila qoʻrgʻonini yaratdi.

Olimboy akaning baxtiga umr yoʻldoshi Toʻlgʻonoy opa ham mehnatkash, tinib-tinchimaydigan, oilam deb yelib yuguradigan ayol boʻlib chiqdi. Opa ham fidokorona mehnatlari tufayli sobiq M.Gorkiy nomli davlat xoʻjaligining ilgʻor pillakori Toʻlgʻonoy Mangliyevaga aylandi.

Oilada dunyoga kelgan 8 nafar farzand – Erkinoy, Rohatoy, Malohat kabi biri-biridan chaqqon qizlar, Matnazar, Masharif, Qudrat, Shuhrat va Shavkat kabi zabardast oʻgʻillar ota va onaga qoʻl-qanot boʻlishib, oilada farovon va toʻkis hayot hukmron boʻlishiga oʻzlarining hissalarini qoʻshdilar.

Xalqimizda “Qush uyasida koʻrganini qiladi”, degan hikmatli bir gap bor. Aytmoqchi boʻlganimiz – ushbu oilada dunyoga kelib, tarbiya topgan farzandlar uyli-joyli boʻlganlaridan keyin oʻz oilalarida ham ota-ona uyidagi tartib-intizomga, urf-odatlarga rioya qilishadi.

Hozirgi kunda Olimboy aka va Toʻlgʻonoy opa kichik farzandlari Shuhrat va Shavkat, kelinlari Dilorom va Salomatlar bilan birga yashashadi.

Ichki ishlar boʻlimida 11-yil xizmat qilib, nafaqaga chiqqan farzandi Shuhrat bugungi kunda Olimboy aka maslahatlari asosida xonadon, tomorqa yumushlarini bajarib kelayapti. Ukasi Shavkat ham tadbirkorlik qiladi, ham tomorqa ishlariga qaraydi.

– Hozir bizning oilamiz hisobida 40 sotix yer bor, – deydi Olimboy aka bizni tomorqada amalga oshirilayotgan ishlar bilan tanishtirar ekan. – Mana shu yerning bir qismida bogʻ yaratganmiz. Bogʻimizda bugungi kunda 20 xil mevali daraxtlar hosil berayapti.

Olimboy aka xonadoni bilan yaqindan tanishar ekanmiz, ularning mehnatsevarligini, har birining oila farovonligi, dasturxoni toʻkinligi uchun jon kuydirishlarini koʻrib qoyil qoldik.

Bugungi kunda ushbu xonadonda 15 ta qoramol, 100 ta parranda va 12 quti asalari ham boqilayapti. Bular, albatta, moʻl daromad manbaiga aylanib, har yili 25-30 million soʻm foyda koʻrilishiga omil boʻlayapti.

– Biz muhtaram Prezidentimiz Shavkat Mirziyoyevning tomorqadan unumli foydalanishga eʼtiborni kuchaytirish masalasidagi topshiriqlarini chin qalbimizdan qoʻllab-quvvatlaymiz, – deydi Olimboy aka Rajabov. – Tomorqadan unumli foydalansak, hayotimiz farovon, dasturxonimiz toʻkin boʻladi.

25 nafar nevaraning, 3 nafar evaraning bobosi va buvisi boʻlgan Olimboy aka va Toʻlgʻonoy opaga sihat-salomatlik, uzoq umr tilab, xonadonlaridan qut-baraka arimasin, deymiz.

Allambergan JUMANIYoZOV,

“Mening oilam” gazetasi muxbiri.