70-sonli maktabda iqtidorli yoshlar tarbiyalanmoqda

Bugungi kunda xalq taʼlimi tizimida har tomonlama yetuk, barkamol avlodni tarbiyalash, xorijiy davlatlar tajribalari asosida innovatsion texnologiyalarni qoʻllash va taʼlim sifati hamda samaradorligini oshirish borasida koʻpgina ishlar amalga oshirilmoqda.

Zero, har tomonlama yetuk kadrllar tayyorlash, umumtaʼlim maktablarida ijtimoiy-maʼnaviy muhitni yanada sogʻlomlashtirish, oʻquvchilar ongida vatanparvarlik hissini rivojlantirish maʼsuliyatli vazifadir. Bunda esa umumtaʼlim maktablari va ustoz-murabbiylarning roli katta ahamiyat kasb etadi.  

Hozirda tumanimizdagi 70-sonli umumiy oʻrta taʼlim maktabida 50 ta pedadog xodimlar 472 nafar oʻquvchi-yoshlarlarga taʼlim-tarbiya berib kelmoqda. Umumtaʼlim maktabida har bir fan boʻyicha toʻgaraklar tashkil qilingan boʻlib, bu toʻgaraklarga 300 ga yaqin oʻquvchilar jalb etilgan.

Bundan tashqari, Prezidentimizning yoshlar maʼnaviyatini yuksaltirish va boʻsh vaqtlarini samarali tashkil etish maqsadida ilgari surgan 5 ta muhim tashabbusi doirasida ushbu umumtaʼlim maktabida “Yosh informatik”, “Yosh dasturchi”, “Sheʼriyat”, “Futbol”, “Shashka”, “Oʻzbek jang sanʼati”, “Isteʼdod gʻunchalari”, “Qizlarjon”, “Maʼnaviyat” kabi toʻgaraklar ham faoliyat yuritmoqda.

Mazkur maktabning ingliz tili fani oʻqituvchisi Norgul Habanova va rus tili fani oʻqituvchisi Dilnoza Abdullayevalar darslarini qiziqarli, turli metdodlar va eng soʻnggi pedtoxnologiyalar asosida olib boradi.

Maktabning informatika fani oʻqituvchisi Farxod Qodirov oʻz kasbiga masʼuliyat bilan yondashgan holda har bir darsini oʻzgacha ruhda va mazmunli tarzda oʻtkazishi natijasida maktab oʻquvchilarining informatika faniga boʻlgan qiziqishlarini yanada oshirmoqda.

Musiqa fani oʻituvchisi Jonibek Turminov iqtidorli hamda ijodkor oʻquvchilarning qiziqishlari va qobiliyatlarini qoʻllab-quvvatlash, ularga musiqa fanining sir-asrorlarini chuqurroq oʻrgatish maqsadida “Yosh havaskor” toʻgaragini yoʻlga qoʻygan. Bu toʻgarakga ushbu maktabning turli yosh toifasidagi 25 nafar qobiliyatli va musiqa fanini sevuvchi oʻquvchilari aʼzo boʻlgan hmda ular bu yerda sahna madaniyati, oʻzbek xalq cholgʻularini chalish sirlarini oʻrganishmoqda. 

Maktab oʻquvchilarining sportga va jismoniy tarbiya faniga boʻlgan ishtiyoqi juda katta. Yaqinda jismoniy tarbiya fani oʻqituvchisi Ilhom Bektursunov “Quvnoq startlar” musobaqasini oʻtkazdi. Musobaqada oʻquvchilar oʻzlarining epchillik va chaqqonliklarini, jismoniy tarbiya fanidan olgan bilimlarini sinovdan oʻtkazdilar. Shu bilan birga haftada ikki marotaba faoliyat yuritayotgan “Oʻzbek jang sanʼati” toʻgaragi ham oʻquvchilarning, ayniqsa, oʻgʻil bolalarning sevimli toʻgaraklaridan biriga aylangan. Murabbiy Ilhom Bektursunov boshchiligidagi bu toʻgarakda 15 nafar oʻgʻil-qizlar oʻzbek jang sanʼatini oʻrganishmoqda.

Barcha taʼlim muassasalari va mahallalarda yosh qizlarning maʼnaviyatini yuksaltirish, iqtidorli qizlar safini kengaytirish, ularni qoʻllab-quvvatlash maqsadida jamoatchilik asosida “Qizlarjon” klublari tashkil etilgan va shu qatorda 70-sonli maktabda ham har juma kuni “Qizlarjon” klubi oʻz faoliyatini olib boradi. Klub rahbari Dilnoza Abdullayeva mashgʻulotlarda oʻquvchi-qizlarga ularning boʻsh vaqtlarini mazmunli tashkil etish, pazandalik, bichish-tikish singari roʻzgʻor yumushlarini, shuningdek, gigiyena qoidalariga amal qilish, mustaqil hayotga tayyorgarlik borasida bilim va koʻnikmalar berib, qiziqarli seminar va treninglar oʻtkazadi.

21-oktyabr – “Oʻzbek tiliga davlat tili maqomi berilgan kun” munosabati bilan ona tili va adabiyot fani oʻqituvchilari Zulxumor Yerimbetova va Rayxon Jumaniyozovalar tomonidan  bayram tadbiri oʻtkazildi. Tadbirda maktab oʻquvchilari tomonidan sahna koʻrinishlari, sheʼrlar, va kuy-qoʻshiqlar yangradi. Ona tilmizning naqadar boyligi va uning sofligi haqida maʼruzalar qilindi.

Ushbu maktabda oʻqib, taʼlim-tarbiya olgan oʻquvchilardan biri, adabiyot olami sari qadam qoʻygan yosh iqtidorli ijodkor qiz Mohira Yoʻldosheva oʻzi taʼlim olgan maktab jamoasiga ulkan tashakkur bildirib, ustoz-murabbiylaridan ularning bergan saboqlari uchun benihoya minnatdorligini izhor qildi va maktab kutubxonasiga yaqinda chop etilgan oʻzining ilk kitobini – “Hayratlar rangi” nomli sheʼrlar toʻplamini sovgʻa qildi.

Albatta, umumtaʼlim maktablarida olib borilayotgan buningdek ishlar oʻquvchilarni Vatanparvarlik ruhida tarbiyalashda, ularni maʼnan va jismonan sogʻlom oʻsishlarida oʻz natijasini koʻrsatadi.

Biz esa 70-sonli umumtaʼlim maktabi jamoasiga masʼuliyatli va hayrli ishlarida omadlar tilab qolamiz!

Iroda Erdosheva