BU YeRDA ILMLI, IQTIDORLI YoShLAR KAMOLGA YeTMOQDA

Rivoyat qilishlaricha, 1860-yillar boshida Qozogʻiston tomonlardan savdo – sotiq ishlari bilan kelgan 5 nafar qozoq Amudaryoning sohilida joylashgan, Jumurtovning shundoqqina etagidagi soʻlim va xushmanzara yerlarni koʻrib, shu yerga oʻtov tikishgan va keyinchalik oʻtirimli boʻlib qolishgan. Beshta qozoq oilasi oʻsib- unib, keyinchalik bu yerda ulkan qishloq vujudga kelgan.

Oq oltin ovulining markazi qadim – qadimdan Beshtom qishlogʻi deb yuritilib keladi. Beshtom atamasi beshta xonadondan iborat degan maʼnoni bildiradi.Bu oʻsha qozogʻistonlik besh nafar qozoq millatiga mansub kishilar avlodlaridan tashkil topgan qishloq.

Tumanimizning chekka hududlaridan sanalmish bu qishloq ham mustaqillik yillarida oʻzgacha qiyofa kasb etdi. Ozoda, orasta koʻchalari turli dov- daraxtlar, anvoyi gullar bilan bezanib,fusunkor , fayzli manzilga aylangan. Koʻchalardagi obod, biri – biridan chiroyli hovlilar, hovlilar oldida turgan turli rusumdagi mamlakatimizda ishlab chiqarilgan avtomashinalar aholi hayoti farovon, toʻkin – sochinligidan darak beradi.

Qishloq aholisining farzandlari shu hududda faoliyat koʻrsatayotgan 50 – sonli umumiy oʻrta taʼlim maktabida taʼlim olishadi. Chekka hudud boʻlsa-da maktabda oʻquvchilarning taʼlim – tarbiya olishlari uchun yaratilgan sharoitlar kishining havasini keltirgulik. Muassasaga tashrif buyurgan kishi eng avvalo hududning oʻziga xos did bilan obodonlashtirilib, koʻkalamzorlashtirilganiga guvoh boʻladi. Kuz oxirlab borayotgan ayni shu kunlarda ham qulf urib ochilib turgan gullar kimning zavqini keltirmaydi, deysiz? Koridorlari, sinfxonalari oʻziga xos bezatilgan, quvvati 220 oʻquvchi oʻrniga moʻljallangan maktabda joriy oʻquv yilida 427 nafar oʻquvchi 2 smenada taʼlim – tarbiya olmoqda. Ularga 42 nafar malakali ustozlar dars mashgʻulotlari ni olib borishayotir. Jami oʻqituvchilarning 90 foizi oliy maʼlumotli.

Muassasada Sayyora Tojiboyeva, Guloyim Asqarova, Quvvat Niyozimbetov, Muhabbat Yusupova, Feruza Ajmagʻambetova, Xushroʻy Oʻrozimbetova, Ozoda Boltaboyeva kabi koʻp yillik tajribaga ega oʻqituvchilar keyingi avlod vakillari Xursand Shomurodrv, Xurshid Abdukarimov, Inomjon Qurbonboyev, Ahmadjon Abdijamilov, Goʻzal Rahimova, Farrux Rajabov kabi yosh oʻqituvchilarga ustoz – shogird anʼanasi asosida oʻzlarining tajribalarini oʻrgatib, taʼlim – tarbiya sifati oshishiga harakat qilishayapti.Maktabda boshlangʻich sinflarda 14 ta, keyingi sinflarda 27 ta fan toʻgaraklari , shuningdek, Prezidentimizning yoshlar maʼnaviyatini yuksaltirish borasida ilgari surgan beshta tashabbusi ijrosini taʼminlash borasida ham beshta toʻgarak faoliyati yoʻlga qoʻyilgan.

Oʻqituvchilar mehnati samarasi oʻquvchilar yutuqlarida aks etadi, albatta. Shu maʼnoda olib qaraydigan boʻlsak,oʻtgan oʻquv yilida maktab bitiruvchilaridan 11 nafarining turli oliygohlarga oʻqishga kirgani quvonarlidir. Shuningdek, oʻquvchilar turli koʻrik – tanlovlarda, sport musobaqalarida va bilimlar sinovlarida ham tuman, Qoraqalpogʻiston bosqichlarida sovrindorlar safida kelishayapti, avvalgi yillardan birida mahallalar tarixini oʻrganishga bagʻishlangan “Qadriyatlar beshigisan, aziz mahallam”, deb nomlangan koʻrik- tanlovda ular mamlakat bosqichi gʻolibi boʻlishgan edi.

Maktab hayotiga chuqurroq razm solsangiz - ular erishayotgan yutuqlarda uzoq yillar shu maktabda oʻqituvchilik qilib, ulkan tajriba va mahoratga ega boʻlgan , ayni kunda keksalik nafaqasidagi faxriy ustozlarning ham hissasi borligini sezasiz. Ular maktabga tez -tez tashrif buyurib, taʼlim - tarbiya jarayonini kuzatib, kerakli yoʻl- yoʻriqlarni berib turisharkan .Yana bir aytishga arzigulik maʼlumot – maktab oʻqituvchilarining deyarli 70 foizi oʻz bitiruvchilaridir.

Muassasada 21-oktyabr - Oʻzbek tili bayrami va oktyabr oyi oʻzbek tili va adabiyoti fan oyligi boʻlganligi munosabati bilan oʻtkazilgan “Til millat va taraqqiyot koʻzgusi” deb nomlangan maʼnaviy – maʼrifiy kechada ham oʻquvchilarning dars mashgʻulotlarini qay darajada egallayotgani, ularning intellektini rivojlantirishga qanday eʼtibor berilayotgani va ona tilimizga boʻlgan mehr- muhabbati yaqqol namoyon boʻldi. Oʻzbek tili va adabiyot fani oʻqituvchilari Guloyim Asqarova, Nafisa Nurlonova, Nafisa Abdullayevalar rahbarligida tayyorlangan ushbu tadbirda oʻzbek tili tarixi, rivojlanish pillapoyalari va bugungi dunyo miqyosida tutgan nufuzi haqida maʼruzalar oʻqildi, tilimizning sofligini saqlashga , hurmat bilan qarashga daʼvat etuvchi sheʼrlar oʻqildi, oʻzbek tili asoschisi , buyuk mutafakkir bobomiz Alisher Navoiy ijodidan sahna koʻrinishlar namoyish etildi.

Ruhshunoslar aslida qobiliyatsiz bola boʻlmaydi, faqat ularni anglay bilish va rivojlantirish zarur , deb hisoblaydilar. 50-sonli umumiy oʻrta taʼlim maktabiga safarimiz davomida buni yaqqol anglaganday boʻldik va yosh avlod kamoli yoʻlida sidqidildan mehnat qilayotgan ustoz murabbiylarga tolmas kuch- quvvat tiladik.

Oygul RAJABOVA.