68-sonli maktabda oʻzbek tili kuni munosabati bilan tadbir oʻtkazildi

Dunyodagi qadimiy va boy tillardan biri boʻlgan oʻzbek tili asrlar osha xalqimizning ichki maʼnaviy dunyosi, insoniylik olamini ifodalab kelayotgan milliy boyligimizdir. Xalq dostonlaridagi timsollarimiz, maqol va topishmoqlar olamidagi sir- u asrorlar, kitobxonni hayratga soladigan afsonalar, sehrli baytlar, oʻtli misralar, pandnomalar ana shu jozibali ona tilimizda bitilgan, uning boʻy-bastini dunyoga tarannum etgan. Ona tilimiz sofligi va goʻzalligini saqlab avlodlarga yetkazmoq har bir insonning muqaddas burchidir.

Bu yil oʻzbek tiliga davlat tili maqomi berilganiga 30-yil toʻlishi munosabati bilan barcha hududlarda keng miqyosdagi bayram tadbirlari boʻlib oʻtdi. Tumanimizdagi barcha umumtaʼlim muassasalarida ushbu sana munosabati bilan koʻplab tadbirlar, adabiy-badiiy kechalar, mushoiralar, sheʼrxonlik kechalari oʻtkazildi.

Tuman xalq taʼlimi boʻlimiga qarashli 68-sonli maktabda 19-oktyabr kuni “Til bor ekan, millat barhayot” shiori ostida katta bayram tadbiri oʻtkazildi. Tadbirda soʻzga chiqqanlar oʻz ona tilimiz imkoniyatlaridan oʻrinli foydalanish borasida olib borilayotgan ishlar, Oʻzbekiston Pespublikasi Konstitutsiyasining 4-moddasida “Oʻzbekiston Pespublikasining Davlat tili oʻzbek tilidir”deb belgilab qoʻyilganligi toʻgʻrisida soʻz yuritdilar. Oʻzbek tilining boy imkoniyatlari va jozibasini singdirish, uni boshqa tillar bilan aralashtirmasdan sof holda saqlash, hurmat qilishga oʻrgatish mavzusidagi maʼruzalar tinglandi va ona tilimizni ulugʻlovchi sheʼrlar, adiblarimizning ibratli soʻzlari ijro etildi.

Tadbirda ushbu maktabda ancha yillar mehnat qilgan faxriy ustozlardan biri Mahmud Oʻrazimbetov, Boʻzyop OFY mutaxassisi Gulzoda Kubayevalar ham ishtirok etishdi.

Tadbir davomida maktabning kichik sinf oʻquvchilari ona tilimizni madh etuvchi sheʼrlarni ifodali yod aytdilar, Vatan haqida qoʻshiqlar kuylab, raqslar ijro etdilar. Ona tili haqidagi hikmatli soʻzlar, maqollar va goʻzal sheʼrlarni aytishdi. Maktab badiiy havaskorlari ijrosidagi til bayramiga bagʻishlangan maxsus kontsert dasturi barchaga xush kayfiyat bagʻishladi. Yuqori sinf oʻquvchilari ona tilimizni madh etuvchi kuy-qoʻshiqlar ijro etishdi.

Iroda Erdosheva.