Uchastkalar saylovga tayyor!

Mamlakatimiz muhim siyosiy jarayon – Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi, xalq deputatlari viloyat, tuman, shahar Kengashlariga saylovlar boʻlib oʻtadigan sana tobora yaqinlashmoqda.

Aytish mumkinki, saylovlar mamlakatimizda faoliyat yuritayotgan siyosiy partiyalarning dastur va rejalari nechogʻlik hayotiyligini, qolaversa, yurtdoshlarimizning amalga oshirilayotgan demokratik islohotlarga haqqoniy munosabatini ham koʻrsatib beradi. Har bir saylovchining huquq va burchlarini chuqur anglagan holda bu siyosiy jarayonda faol ishtirok etishi saylovlarning qonuniy asosda oʻtishini taʼminlaydi.

Shu boisdan ham tumanimizda tashkil etilgan Oliy Majlis Qonunchilik palatasi va Qoraqalpogʻiston Respublikasi Joʻqorgʻi Kengesi, xalq deputatlari tuman Kengashiga saylov oʻtkazuvchi okrug va uchastka saylov komissiyalari tomonidan targʻibot-tashviqot ishlari munatazam olib borilayapti.

Choykoʻl Madaniyat markazi binosida joylashgan 127-sonli uchastka saylov komissiyasi tarkibi 11 kishidan iborat. Komissiya aʼzolari hududdagi 1 ming 401 nafar saylovchilar bilan muntazam ish olib borishmoqda. Xonadonma-xonadon yurib, aholi xatlovdan oʻtkazildi va ularning yagona elektron roʻyxati shakllantirildi. Komissiyaning  har bir aʼzosi oʻziga biriktirilgan hududdagi saylovchilarni saylov qonunchiligimizdagi yangiliklar bilan tanishtirib, saylov kunida oʻzlarining eng munosib deb bilgan nomzodlariga ovoz berishi ularning fuqarolik burchi ekanligini tushuntirdilar.

Hozir saylov uchastkasida tayyorgarlik jarayoni qizgʻin pallaga kirgan. Binoda saylov jarayonini oʻtkazish uchun barcha sharoitlar yaratilgan. Ovoz berish kabinalari, qutisi, siyosiy partiyalar kuzatuvchilari, ommaviy axborot vositalari xodimlari uchun joy hozirlangan. Uchastkada tibbiyot xonasi ham tashkil etilgan. Saylovga doir targʻibot materiallari joy olgan burchakka deputatlikka nomzodlarning plakatlari ham oʻrnatilgan.

86-sonli uchastka saylov komissiyasi 82-sonli maktab binosida joylashgan. Mazkur binoda saylovlar kunida 2 ming 150 nafar saylovchilar oʻzlarining munosib nomzodlari uchun ovoz berishadi. Ushbu jarayonni tartibli, haqqoniy, saylovchilar faolligida oʻtkazish uchun puxta tayyorgarlik koʻrildi. Saylov uchastkasi saylov qonunchiligimizga oid materiallar, uchastka saylov komissiyasi faoliyati toʻgʻrisida axborot beruvchi stendlar bilan bezatilgan. Binoda saylovchilarning ovoz berish kabinalari, saylov qutisi, siyosiy partiyalar kuzatuvchilari va ommaviy axborot vositalari xodimlari uchun barcha sharoitlar yaratilgan.

Saylov uchastkasi hududidagi aholining yagona elektron roʻyxati shakllantirilib, ular bilan muntazam ish olib borilayapti.

Uchastka saylov komissiyasi aʼzolarining unumli ishlash uchun barcha sharoitlar yaratilgan. Saylovchilarning huquqiy bilimlarini oshirish maqsadida 15 nafar komissiya aʼzolari tinimsiz ish olib borishayapti. Har kuni uchastkaga kelib saylovlarga doir savollar bilan murojaat qilayotganlar ham koʻpchilikni tashkil qiladi.

2019-yil 22-dekabr. Oʻtayotgan daqiqalar bizni ushbu sanaga – Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va Xalq deputatlari tuman Kengashiga saylovlar kuniga tobora yaqinlashtirmoqda.

Xalqimiz ovoz berish jarayonida yangi qabul qilingan saylov Kodeksiga muvofiq  jamoatchilik nazorati, ochiqlik va oshkoralik taʼminlanishiga ishonadi.

Oygul RAJABOVA.