Deputatlikka nomzodlar saylovchilar bilan uchrashdi

Saylov demokratik huquqiy davlat, erkin fuqarolik jamiyatining muhim belgisi, xalqning oʻz xohish-irodasini erkin ifoda etishi, fuqarolarning mamlakatimiz siyosiy hayoti, jamiyat va davlat boshqaruvida, davlat hokimiyatini shakllantirishda bevosita ishtirokining asosiy shaklidir.

Yaqinlashib kelayotgan Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi, xalq deputatlari shahar hamda tuman kengashlari deputatligiga saylov jarayoniga tayyorgarlik ishlari qizgʻin tus olmoqda. Partiyalardan koʻrsatilgan nomzodlar hamda ularning ishonchli vakillari saylovchilar bilan uchrashuvlar, yigʻilishlar tashkil qilishmoqda. Bunday uchrashuvlarda saylovchilar nomzodlarning tarjimai hollari hamda saylovoldi dasturlari bilan tanishmoqdalar. Qolaversa, oʻzlarini qiziqtirgan savollarga javoblar olishmoqda.

Tumanimizda shunday tadbirlardan biri 13-dekabr kuni Choykoʻl madaniyat uyida boʻlib oʻtdi. Uchrashuvda 26-Choykoʻl saylov okrugidan xalq deputatlari tuman Kengashi deputatligiga Tadbirkorlar va ishbilarmonlar harakati – Oʻzbekiston Libera-demokratik partiyasidan koʻrsatilgan nomzod – tuman hokimi Sultonboy Yoʻldoshevning ishonchli vakili Muqaddas Beknazarova, “Millik tiklanish” demokratik partiyasidan koʻrsatilgan nomzod Rahmatullo Matqurbonov, Oʻzbekiston Xalq demokratik partiyasidan koʻrsatilgan nomzod Sayyora Jumammuratova, “Adolat” sotsial-demokratik partiyasidan koʻrsatilgan nomzod Bahodir Rajabov hamda uning ishonchli vakili Sanobar Nurmonova, Oʻzbekiston Ekologik partiyasidan koʻrsatilgan nomzod Shukurullo Yusupovlar ishtirok etdilar.

Uchrashuvda nomzodlarning ishonchli vakillari soʻzga chiqib, ularning mehnat faoliyati va saylovoldi dasturlari haqida maʼlumotlar berdi. Nomzodlar esa oʻz maʼruzalarida kelgusida amalga oshirijak ishlari haqida batafsil maʼlumotlar berdi.

Taʼkidlash kerakki, mamlakatimizda saylov huquqi Oʻzbekiston Respublikasining Konstitutsiyasi, saylov toʻgʻrisidagi qonunlar va boshqa hujjatlarda oʻz ifodasini topgan. Shuningdek, ushbu qonun hujjatlarida fuqarolarning saylov huquqi umumiy, teng, toʻgʻridan toʻgʻri va yashirin ovoz berish printsiplari asosida amalga oshirilishi belgilangan.

Saylash huquqiga Oʻzbekiston Respublikasi Konstitutsiyasining 117-moddasi 2-bandiga binoan, 18 yoshga yetgan barcha Oʻzbekiston fuqarolari egadirlar. Teng saylov huquqi deganda Oʻzbekiston Respublikasi fuqarolarining jinsi, irqiy va milliy mansubligi, tili, dinga munosabati, ijtimoiy kelib chiqishi, eʼtiqodi, shaxsiy va ijtimoiy mavqei, maʼlumoti, mashgʻulotining turi va xususiyatidan qatʼi nazar, teng ovoz berishda ishtirok etishi tushuniladi.

Joriy yilgi saylovlarni ham Konstitutsiya, Saylov Kodeksi va qonunlarda koʻrsatilgan tamoyillar asosida, xalqaro huquqning umumeʼtirof etilgan normalariga binoan oʻtkazish boʻyicha barcha choralar koʻrilmoqda. Choykoʻl ovulida oʻtkazilgan uchrashuv ham saylovchilarning nomzodlar faoliyati bilan yaqindan tanishishlari hamda ularning saylov qonunchiligidan xabardorligini oshirishda muhim vosita boʻldi. Saylovchilar mazkur siyosiy jarayonning ahamiyati hamda saylov tizimi haqida kerakli maʼlumotlarga ega boʻlibgina qolmay, oʻzlarini qiziqtirgan savollarga javoblar oldilar. Nomzodlar saylovchilarni mamlakatimiz tarixida muhim oʻrin tutadigan siyosiy jarayonda oʻz sisyosiy huquqlaridan oqilona foydalangan holda faol ishtirok etishga chaqirdi. Zero, saylovlarda har bir saylovchining ovozi muhim ahamiyatga ega.

Charos ARSLONOVA, tuman hokimligi axborot xizmati rahbari.