SAYLOV UChASTKALARIDA TAYYoRGARLIK JARAYoNI QANDAY?

Joriy yilning 20-sentyabrida boshlangan Oliy Majlis Qonunchilik palatasi va mahalliy Kengashlar deputatlari saylovi kampaniyasi ayni kunlarga kelib qizgʻin pallaga kirdi.

Butun mamlakatimizda boʻlgani kabi tumanimizda faoliyat yuritayotgan Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari tuman Kengashi deputatlari saylovini oʻtkazuvchi saylov uchastkalari toʻliq tayyor holatga keltirildi.

Saylovlarni qonun talablari asosida, namunali tarzda tashkil etish yuzasidan 50-sonli maktabda joylashgan 121-sonli uchastka saylov komissiyasi aʼzolari ham qator ishlarni amalga oshirdi.

Saylov boʻlib oʻtadigan joy va uchastka saylov komissiyasi aʼzolari uchun ajratilgan xonalar saylov qonunchiligiga doir koʻrgazmali qurollar, inventarlar bilan taʼminlandi. Komissiya aʼzolari kampaniya boshlanganidan beri uyma-uy yurib, targʻibot-tashviqot ishlarini olib borish bilan bir qatorda saylovchilarning elektron roʻyxatiga aniqlik kiritishdi.

Ayni kunda saylov uchastkasiga tashrif buyurgan odam saylovga doir barcha axborotlar, shuningdek, hududdan Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari tuman Kengashi deputatligiga koʻrsatilgan nomzodlar haqida kerakli maʼlumotlarga ega boʻlish imkoniyatiga ega.

– Ilk bor yangi Kodeksga asosan oʻtkaziladigan saylovga saylovchilar faol munosabat bildirishmoqda. Ular saylovda oʻzlarining munosib deb bilgan nomzodlariga ovoz berishni fuqarolik burchi ekanini teran his qilishmoqda. Bunga maʼlum sabablarga koʻra 22-dekabr kuni yashash manzilida boʻla olmasligini aytib, muddatidan oldin ovoz berish uchun uchastka saylov komissiyasiga murojaat qilayotgan odamlar bilan suhbatlashish jarayonida amin boʻlish mumkin, – deydi 121-sonli uchastka saylov komissiyasi raisi Alisher Eshniyozov.

Aytish joizki, mazkur saylov uchastkasida 5 nafardan ortiq saylovchi saylov kunida yashash joyida boʻla olmasligi sababli muddatidan oldin ovoz berishgan. Bu fuqarolarning saylov qonunchiligidagi yangiliklardan xabardor qilingani, saylovlar doir targʻibot-tashviqot ishlari yaxshi olib borilgani samarasidir.

***

86-sonli maktabda joylashgan 118-saylov uchastkasida 2770 nafar saylovlar 22-dekabr kuni oʻzlari tanlagan eng munosib nomzodlarga ovoz beradilar. Ayni kungacha saylovni qonunchiligimizga amal qilingan holda, demokratik tamoyillar asosida oʻtkazish uchun barcha chora-tadbirlar amalga oshirilgan. Saylov uchastkasida muntazam navbatchiliklar tashkil etilgan boʻlib, oʻzlarini qiziqtirgan saylovga oid savollariga javob olish uchun kelgan fuqarolar bilan suhbatlar olib boriladi. Saylov uchastkasi saylov jarayonini boshlash uchun taxt holga keltirildi.

Shuning uchun ham biri xizmat safariga, yana biri maʼlum sababga koʻra xorijiy davlatga ketayotgan fuqarolar muddatidan oldin oʻz nomzodlariga ovoz berishida hech bir muammoga duch kelishmadi.

Saylov uchastkasida 22-dekabr kuni ovoz berish jarayonini tartibli va namunali tashkil etishning barcha choralari koʻrilmoqda.

O.RAJABOVA.