“Savodxonlik bayrami” taassurotlarga boy boʻldi

Maktab ostonasiga ilk qadam qoʻygan kunlaridan boshlab ona tilimizni oʻrganib, bir muncha ulgʻayib qolgan bolajonlar uchun “Savodxonlik bayrami” tadbirlari xuddi ilk imtihon singari. Sababi ana shu tadbirda ular “Alifbe” kitobini qay darajada oʻzlashtirgani, boshlangʻich taʼlim boʻyicha egallagan dastlabki bilimlari namoyon boʻladi, intellektual oʻyinlar, qiziqarli savol-javoblar va  sheʼr, qoʻshiq, raqslar ijro etish orqali ustozlari taʼlimini qay darajada oʻzlashtirganliklarini koʻrsatishadi.
Oʻquvchilarning erishgan yutuqlarining yakuni hisoblanmish bayram tadbirini mazmunli, esda qolarli qilib oʻtkazish har bir boshlangʻich sinf oʻqituvchisining orzusidir.

Tumanimizdagi 57-sonli maktabning  boshlangʻich sinf oʻqituvchisi Adolat Hasanova oʻz muallimlik faoliyatida 2019-2020 oʻquv yili boshida ikkinchi bora 1-sinfga bolalarni qabul qilib oldi. Oʻquv yilining ikkinchi choragi oxirgi kunlarida u ham oʻz sinfida taʼlim olayotgan 19 nafar oʻquvchilarning “Savodxonlik bayrami”ni koʻngildagidek oʻtkazish uchun astoydil intildi. Bu haqda oʻquvchilarining ota-onalarini ham xabardor qildi. Birgalikda tayyorgarliklar koʻrishdi. Bayram oʻtkaziladigan kun sinfxona oʻquvchilar chizgan eng chiroyli qish manzaralari, yasagan buyumlari, qish bezaklari bilan yasatildi.

Bolalarning har birining turli  harflar timsolida davraga kirib kelib, qanday soʻzlar, qanday jismlar aynan shu harf bilan boshlanishini sheʼriy ifodalab berganlarida ota-onalar ham, ustozlari ham qizgʻin olqishlab, xursand boʻldilar. Oʻquvchilar harflarni oʻqish, yozishni oʻrganib olganliklari uchun “Alifbe” kitobiga minnatdorchilik bildirib xayrlashdilar, ona tili va oʻqish kitobi bilan tanishib, doʻst, inoqlikda ilm olishni davom ettirishga soʻz berdilar. Shundan soʻng, bolajonlar yangi yil bilan barchani qutlab, sheʼriy tabriklar aytishdi.

Sahnada kichkintoy oʻgʻil-qizlar ishtirokida “Tulki va turna”, “Rostgoʻy bola” ertaklari asosida namoyish etilgan sahna koʻrinishlari ayniqsa, barchani quvontirdi. “Qoraqalpogʻim” qoʻshigʻiga raqs ijro etilganidan soʻng sahnaga ilmli, zukko va oqil bolajonlarni Yangi yil bilan qutlash uchun tashrif buyurgan Qorbobo va Qorqiz koʻtarildi. Alifbeni yaxshi oʻzlashtirganliklari uchun bolajonlarga sovgʻalar ulashdi va chiroyli qilib bezatilgan archa atrofida sheʼrlar aytishib, raqsga tushishib, xursandchilik qilishdi.
Savodxonlik bayrami tadbirida ayniqsa Anora Sherifboyeva, Komila Kenjaboyeva, Jasurbek Saʼdullayev, Shoxruh Maxsudovlar faol qatnashdilar.

Tadbirda ishtirok etgan maktab oʻqituvchilari, ota-onalar 1-sinf oʻquvchilarini oʻquv yili yarim yilligigacha ana shunday zukko, hozirjavob, bilimdon qilib tarbiyalagan ustozi Adolat Hasanovaga ulkan minnatdorchilik bildirishdi. Savodxonlik bayrami 1-sinf oʻquvchilarining barchasi uchun ham unutilmas taassurotlar qoldirdi

Oygul RAJABOVA.