Matematika fanidan oʻtkazilgan bellashuvda oʻquvchilarning bilimlari sinab koʻrildi

Umumtaʼlim maktablarida muntazam ravishda har bir oʻquv predmeti boʻyicha fan oyliklari oʻtkazib kelinmoqda. Fan oyligini oʻtkazishdan maqsad – dars va darsdan tashqari oʻtkaziladigan tadbirlarning taʼlim-tarbiyadagi ahamiyati, oʻquvchilarning mazkur fanga boʻlgan qiziqishlarini oshirish, bilim samaradorligini oshirish, hozirgi zamon fan va texnikasi yutuqlari bilan doimo tanishib borish, oʻrganishga boʻlgan intilishlarini oʻstirish, oʻqituvchi va oʻquvchining ijodiy hamkorligini targʻib etishdan iboratdir.

Shu maqsadda har oyda taʼlim muassaslarida fan oyligi tadbirlari tashkil qilinib kelinmoqda. Tumanimizdagi 57-sonli umumtaʼlim maktabida ham matematika va informatika fanlari oyligi munosabati bilan tadbir tashkil qilindi. Ushbu tadbirni tashkil qilishda maktabning matematika fani oʻqituvchisi Mahliyo Xudayberganova faollik koʻrsatdi. Fan oyligi doirasidagi mazkur tadbir oʻquvchilarning matematika fanidan olgan bilimlarini sinash maqsadida bellashuv tarzida oʻtkazildi. Bellashuvda yuqori sinf oʻquvchilarining bilimlari hamda qobiliyatlari yettita shart asosida sinovdan oʻtkazildi.

Maktab direktori Masharif Roʻzmetov bellashuvni kirish soʻzi bilan ochib, matematika fanini oʻrganishning inson hayotidagi ahamiyati haqida gapirib, biz buyuk matematik olimlar avlodi ekanimizni, ularga munosib farzand boʻlishimiz lozimligini alohida taʼkidladi. U oʻquvchilarni matematika fanini chuqurroq oʻrganishga, uning ochilmagan qirralarini ochishga, respublika va xalqaro olimpiadalarda ishtirok etib, yurtimiz bayrogʻini koʻklarga koʻtarishga daʼvat qildi. Shuningdek, maktab direktori oʻrinbosarlari Jasur Oʻrozboyev, Jahongir Yusupovlar, ruhshunos Anora Jumanova hamda tarix fani oʻqituvchisi Rasul Bozorboyevlar ham fan oyligi doirasida oʻtkazilayotgan tadbirlarning ahamiyati haqida oʻz fikr-mulohazalarini bildirdilar.

Shundan keyin shartlar maʼlum qilinib, bellashuv boshlab yuborildi. Bellashuvda barcha jamoalar faol ishtirok etib, bir-biridan ortda qolmaslikka harakat qildilar. Oʻquvchilar oʻzlarining matematika fanidan olgan bilimlarini toʻlaqonli namoyish etdilar. Tabiiyki, oʻquvchilarning fan boʻyicha egallagan chuqur bilimlari matematika fani oʻqituvchilarining mashaqqatli mehnatlari samarasidir. Ustozlarning mehnatlari mahsulini namoyon qilishlari uchun esa fan oyliklari tadbirlarini tashkil qilish ayni muddao boʻladi.

Shu oʻrinda taʼkidlash kerakki, fan oyliklari doirasida amalga oshirilishi lozim boʻlgan vazifalar fan boʻyicha oʻquv-metodik ishlarni jonlantirish, oʻqituvchilar ijodiy faoliyatlarini kuchaytirish, izlanuvchan, ijodkor oʻqituvchilarni aniqlash, ularning tajribalarini oʻrganish va targʻibot qilish, taʼlim jarayonida qoʻllayotgan uslublarini takomillashtirishdan iboratdir.

Ushbu masʼuliyatli vazifalarni amalga oshirish barcha taʼlim sohasi fidoyilaridan katta kuch-gʻayrat hamda shijoat talab qiladi. Shuningdek, fan oyliklari doirasida amalga oshirilishi lozim boʻlgan vazifalarni bajarish jarayonida fan oʻqituvchilari oʻrtasida oʻzaro hamjihatlik va hamkorlik aloqalari ham mustahkamlanadi.

Charos Arslonova.