Ochiq oʻquv mashgʻulotlari oʻquvchilarning fanga boʻlgan qiziqishlarini yanada oshirmoqda

Bugungi kunda yurtimizda taʼlim sohasining yanada rivojlanishiga katta eʼtibor qaratilmoqda. Yoshlarning ilm-fan choʻqqilarini egallashi, fanlarni chuqurroq oʻrganib, bilim marralarini zabt etishlari uchun keng imkoniyat hamda sharoitlar yaratilmoqda. Bu borada oʻqituvchi hamda murabbiylarning oʻrni beqiyos ekanligi inobatga olinib, ularning jamiyatdagi mavqeini yanada yuqori pogʻonaga koʻtarish ham bugungi kundagi ustuvor vazifalardan biriga aylandi.

Kelajagimiz egalarini bilimli, yuksak salohiyatli qilib tarbiyalash, ularga ilm-fan sirlarini chuqurroq oʻrgatish maqsadida taʼlim jarayonida qoʻllaniladigan innovatsion pedagogik texnologiyalarning ahamiyati katta. Zero, har bir oʻqituvchining dars jarayonida zamonaviy pedagogik texnologiyalardan foydalangan holda taʼlim berishi bugungi kunning talabi hamdir. Oʻz navbatida oʻqituvchining pedagogik mahoratini namoyon qilishi uchun va oʻquvchilarning ilm-fanni oʻrganishga boʻlgan qiziqishini yanada oshirish maqsadida ochiq darslar tashkil qilish ham taʼlim sifatini oshirishga xizmat qiladi.

Tumanimizdagi 16-sonli ixtisoslashtirilgan davlat umumtaʼlim maktabining aniq fanlarga yoʻnaltirilgan 9-“A” sinfida matematika fanidan innovatsion pedagogik texnologiyalar asosida ochiq oʻquv mashgʻuloti tashkil qilindi.  

Mashgʻulotni maktabning matematika fani oʻqituvchilari Feruza Yusupova hamda Gʻayrat Rahimovlar tashkil qildilar. “Cheksiz kamayuvchi geometrik progressiya” mavzusidagi ochiq dars oʻquvchilarning matematika faniga boʻlgan qiziqishlarni oshirish, fan yuzasidan oʻquvchilarda yangi bilim, koʻnikma va malakalarni hosil qilish hamda ularning egallagan bilimlarini tekshirish, sinovdan oʻtkazish maqsadida oʻtkazildi. Fan oʻqituvchilaridan yangi uslublarni oʻrganish, tajriba almashish, dars jarayonining oʻtkazilishini kuzatish maqsadida ushbu ochiq oʻquv mashgʻulotiga maktabning maʼnaviy-maʼrifiy ishlar boʻyicha direktor oʻrinbosari Rahima Saparboyeva, matematika fani oʻqituvchisi Sharofat Jumaniyozovalar tashrif buyurishdi.

Sinfning 1-guruhida dars fan oʻqituvchisi Gʻayrat Rahimov tomonidan noanʼanaviy tarzda, innovatsion pedagogik texnologiyalar, interaktiv metodlardan foydalanilgan holda tashkil etildi. PISA testlar bilan oldingi oʻtilgan mavzular boʻyicha bilimlar takrorlandi hamda bu bilan 2021-yilda yurtimizda xalqaro baholash mezonlari – PISA testlar orqali oʻquvchilarning bilimini baholash sinovlariga tayyorgarlik koʻrish vazifasi ham qamrab olindi.

Yangi mavzu boʻyicha bilimlar smart doska orqali interaktiv slaydlar vositasida taqdim etildi. Shuningdek, yangi bilimlarni mustahkamlashda “yashirin soʻz” metodidan hamda darsni mustahkamlash bosqichida olingan bilimlarni nazorat qilishning innovatsion usuli boʻlgan onlayn sinov testlaridan foydalanildi. Oʻquvchilar sinov testlarini onlayn tarzda kompyuterda topshirishdi. Dars davomida yangi mavzu boʻyicha oʻquvchilarning yangi bilimlar olishiga, matematik fikrlashi, dunyoqarashi hamda fanga boʻlgan qiziqishi yanada oshishiga erishildi.

Sinfning 2-guruhida fan oʻqituvchisi Feruza Yusupova tomonidan dars smart hamda markerli doskalar orqali interfaol dars taqdimotlari yordamida oʻtkazildi. Darsda “Bltis-savol” metodi bilan oldingi darslar takrorlandi. Bu guruhda ham darsni mustahkamlash bosqichida oʻquvchilar sinov testlarini onlayn tarzda kompyuterda topshirishdi va ularning bilimlari baholab borildi.

Dars davomida fan oʻqituvchilari tomonidan belgilab qoʻygan taʼlimiy, tarbiyaviy va rivojlantiruvchi maqsadlarga erishildi. Tajribali hamda yuqori bilimga ega boʻlgan bu oʻqituvchilar tomonidan tashkil qilingan ochiq darsda oʻquvchilar  mavzu yuzasidan yangi bilimlarni yangicha metodlar orqali egallashga va oʻzlashtirishga muvaffaq boʻldilar. Ochiq dars juda qiziqarli oʻtdi.

Charos Arslonova.