“YoSh AL XORAZMIYLAR” BELLAShDI

Mamlakatimizda taʼlim-tarbiya sohasida amalga oshirilayotgan islohotlarni umutaʼlim maktablarida izchil ijrosini taʼminlashga alohida eʼtibor qaratilmoqda. Pedagoglarning malakasini oshirish, har bir fan oyliklarini sifatli va samarali tashkil etish, oʻquvchilarning nazariy bilimlarini amaliyotda mustahkamlash, ularni komil inson qilib voyaga yetkazish eng asosiy vazifa sifatida belgilanganligi sababli bu boradagi chora-tadbirlar samarali tashkil etilmoqda.

Tumanimizning barcha maktablarida boʻlgani kabi 52-sonli maktabda ham aniq fanlar oyligi munosabati bilan turli tadbirlar oʻtkazildi. Oʻqituvchilarning taʼlimga doir yangi pedagogik texnologiyalarni qoʻllay olish mahoratini oshirish, darslar samaradorligiga erishish borasidagi tajribalarini ommalashtirish borasida namunaviy ochiq darslar oʻtkazildi. Oʻquvchilarning aniq fanlar boʻyicha bilimdonligini oshirish maqsadida qoʻshimcha darslar ham oʻtildi. Oylik doirasidagi tadbirlarga oʻquvchilarning bilimlarini sinovdan oʻtkazuvchi bellashuv xotima yasadi.

“Yosh Al Xorazmiylar” deb nomlangan ushbu bellashuvda maktabning 10-11-sinflari oʻquvchilari orasidagi eng bilimdon, eng zukko 5 nafar oʻquvchi aniq fanlar boʻyicha olgan bilimlari yuzasidan oʻzaro bellashdilar.

Shunisi eʼtiborliki, bugungi tezkor va axborot-kommunikatsion texnologiyalari davrida qaysi sohani olib qaramang, aniq hisob-kitob ilmi talab etiladi. Bu oʻz navbatida maktabdan boshlab, aniq fanlar asoslarini puxta oʻzlashtirib borishlariga erishishni taqazo etadi. Buni chuqur his qilgan ustoz-murabbiylar oʻz ishiga yana ham masʼuliyat bilan yondoshayotgani oʻtkazilayotgan tadbirlarda ham aniq namoyon boʻlmoqda.

Mazkur bellashuvda ishtirok etgan oʻquvchilar maktab aniq fanlar uslubbirlashmasi tomonidan ishlab chiqilgan beshta shart boʻyicha oʻzaro baxs olib bordilar.

Bellashuv tezkor savollarga javob berishdan boshlandi. Bunda oʻquvchilar maʼlum vaqt ichida qogʻozga yozilgan savollarga jamoa boʻlib fikrlashib, javoblar berishdi.

Sanoq tizimiga oid mantiqiy amallarni bajarish sharti ham oʻquvchilarga unchalik qiyinchilik tugʻdirmadi. Topishmoqlarning javobini topish sharti – ayniqsa, juda qiziqarli boʻldi. Bunday tarzdagi amaliy topshiriqlar oʻquvchilarning aniq fanlar boʻyicha dars mashgʻulotlarini qanday oʻzlashtirayotganini koʻrsatib berdi.

Bellashuvning oxirgi shartida oʻquvchilar uyga vazifa tariqasida berilgan topshiriq ijrosini  taqdim etdilar.

Bellashuv davomida oʻquvchilar gʻoliblik uchun ahil jamoaga aylanib qizgʻin kurash olib bordilar.

Natijalar ularning aniq fanlarni puxta oʻzlashtirishga, qoʻshimcha qoʻllanmalarni ham oʻqib, oʻrganib bilim doirasini kengaytirishga harakat qilishayotganini koʻrsatdi.

Oʻquvchilarga bu borada yana ham kengroq motivatsiya berish, sohaga oid yangiliklardan xabardorligini oshirish maqsadida oʻtkazilgan bellashuv gʻoliblari maktab maʼmuriyati tomonidan ragʻbatlantirildi.

Mazkur maktabda mehnat qilib kelayotgan ustoz-oʻqituvchilar zimmalaridagi bu kabi zalvorli, ammo sharafli vazifalarni masʼuliyatni unutmagan holda amalga oshirishmoqda. Yosh avlodni el-yurt rivojiga munosib hissa qoʻshadigan insonlar qilib tarbiyalash uchun bor kuch va imkoniyatlarini safarbar etishmoqda.

O.RAJABOVA.