“ZAKOVAT” INTELLEKTUAL OʻYINI BILIMDONLAPNI ANIQLADI

Oʻquvchilarning fanlar boʻyicha olgan nazariy bilimlarini amaliyot bilan bogʻlash, bilim, koʻnikma va malakalarini shakllantirish maqsadida fan oyliklari doirasida turli tadbirlar rejalashtiriladi.

Aniq fanlar oyligi munosabati bilan 16-sonli maktabda ham turli tadbirlar, ochiq darslar, koʻrgazmalar, oʻquv seminarlari va festivallar tashkil etildi. Oʻquvchilarning matematik fikrlash qobiliyatini rivojlantirish maqsadida turli xil bellashuvlar, noanʼanaviy ochiq darslar oʻtkazildi. Qolaversa, kompyuter savodxonligini oshirish maqsadida tashkil etilgan “Kompyuter bilimdonlari” musobaqalarida ham oʻquvchilarning fanga boʻlgan qiziqishlari yanada ortdi.

Fan oyligi yakunida oʻquvchilarning mazkur fanlardan olgan bilimlarini sinovdan oʻtkazuvchi “Zakovat” intellektual oʻyini ham boʻlib oʻtdi. Bu tadbirni oʻtkazishdan maqsad oʻquvchilarning bilimi va tafakkurini sinovdan oʻtkazish orqali ularning yangi ilm choʻqqilarini zabt etishga undashdir.

Matematika va informatika fanlari oʻqituvchilari Oʻtkir Xudoyberganov, Nargiza Ibodullayeva, Muhabbat Xidirova, Muxtor Habibullayev, Maxsuda Olimovalar hamkorlikda tashkil etgan bu oʻyinda maktabning 8-9-sinflari oʻquvchilari ishtirok etdilar.
Ularga oʻyinda xalqaro “PISA” va “PIRLS” baholash dasturlariga muvofiq tuzilgan mantiqiy hisoblashga doir misol va masalalar berildi.

Aytish joizki, kelgusi oʻquv yilidan ushbu Xalqaro baholash dasturini amaliyotga joriy qilish yuzasidan mamlakatimiz taʼlim tizimida koʻpgina chora-tadbirlar amalga oshirilmoqda. Dastur haqida toʻrt nomdagi metodik qoʻllanmalar chop etilib, tumanimizdagi barcha maktablarga tarqatildi. Jarayonga tayyorgarliklar koʻrish yuzasidan aniq vazifalar belgilab berildi.

Bundan tashqari, oʻqituvchilarda bu borada amaliy koʻnikmalarni shakllantirish maqsadida seminarlar  ham oʻtkazilmoqda. Aytish mumkinki, ushbu dasturlar oʻquvchilarning ijodiy va mantiqiy fikrlash koʻnikmalarini rivojlantirishga, shu orqali taʼlim sifatini oshirishga xizmat qiladi.

“Zakovat” intelektual oʻyinida savollar mazkur dasturlar test savollari asosida tuzilganligi bilan ahamiyatli boʻldi.

Oʻyinda ishtirok etgan jamoalar bellashuvi qiziqarli va murosasiz kechdi. Oʻyin davomida oʻquvchilar savollarga belgilangan muddat ichida aniq va toʻla javob berishga intilishdi. Maktabning aniq fanlar uslub birlashmasi raisi Feruza Yusupova boshchiligida aniq fanlar oʻqituvchilari tuzib chiqqan savollar yechimi oʻquvchilarga unchalik qiyinchilik tugʻdirmadi. Pedagogik jamoaning jamiyatga, xalqimizga sadoqat bilan xizmat qiladigan bilimdon, zakovatli avlodni tarbiyalash borasida amalga oshirgan samarali mehnati oʻquvchilarning topqirliklarida, bilimdonliklarida yaqqol namoyon boʻldi. Intellektual oʻyin oʻquvchilarni aniq fanlarni yana ham qunt bilan oʻrganishga qiziqishlarini oshirgani bilan ahamiyatli boʻldi.

Ishtirokchilarning  mahorati, bilimini hakamlar hayʼati odilona baholab bordilar. Yana shuni ham taʼkidlash joizki, buningdek bellashuvlar fan oʻqituvchilari darsi samaradorligini ham belgilab beradi.

O.PAJABOVA.