MASOFAVIY TAʼLIM KATTA QULAYLIK YaRATDI

COVID-19 koronavirus pandemiyasi tarqalishiga qarshi mamlakatimizda Prezidentimiz boshchiligida koʻplab chora-tadbirlar ishlab chiqilib, amaliyotga joriy etilmoqda. Shu yil 16-martdan eʼtiboran barcha oʻquv maskanlari, maktab va maktabgacha taʼlim muassasalari faoliyati vaqtinchalik toʻxtatildi. Ammo oʻquvchilar oʻqishni masofadan turib davom ettirib, mavzularni oʻrganishdi.

Shuni quvonch bilan aytamanki, darslarning televideniye orqali onlayn tashkil qilinishi nafaqat oʻqituvchi va oʻquvchilarning, balki barcha fuqarolarimizning kayfiyatini koʻtardi. Vahimaga aslo oʻrin qolmadi. Har bir oʻquvchi uyida bilim olishiga sharoit yaratildi. Ayni paytdagi vaziyatda masofaviy taʼlim olishning oʻzi katta qulaylik hisoblanadi.

Men ham belgilangan telekanallar orqali efirga uzatilayotgan ingliz tili darslariga qoʻshimcha ravishda ijtimoiy tarmoqlarda mashgʻulotlar olib bordim. Fan boʻyicha oʻrganish jarayonida oʻquvchilar duch kelayotgan muammolarni bartaraf etishda koʻmaklashish uchun ularga puxta va aniq tushunchalar berdim.

May oyida oʻtkazilishi kerak boʻlgan ingliz tili fan oyligini masofadan turib davom ettirib, moslashtirgan holda bir qancha oʻzgartirishlar kiritdik. Oʻquvchilar bilan savol-javoblar tashkil qildik. Testlarni onlayn tarzda olib borib, javoblari asosida oʻquvchilarning bilimlarini baholadik. Yaxshi natija koʻrsatgan oʻquvchilarni esa ragʻbatlantirib bordik.

Biz oʻqituvchi va oʻquvchilar koronavirus pandemiyasiga qarshi kurashish uchun uyda qolib, masofadan taʼlimni davom ettirish bilan birga oʻquvchilarga koronavirusdan himoyalanish, karantin qoidalariga qatʼiy amal qilish boʻyicha tushuntirishlar ham berib, shu bilan birga ularni ruhlantirib bordik. Oʻquvchilarimiz ham butun dunyoni tashvishga qoʻygan bu sinovli vaziyatda tushkunlikka tushmagan holda oʻqishni davom ettirishdi va yaxshi baho olishga harakat qilishdi.

Albatta, biz birga kurashsak, har qanday ofatni birga yengamiz! Bu pandemiya tez orada yurtimizdan ketishiga ishonamiz. Hamjihatlik bilan tez orada bu sinovli kunlardan oʻtib, doimiy farovon hayotimizga qaytamiz.

Uyda qoling! Stay home!

Zamira Otajonova,

36-sonli maktab oʻqituvchisi.