TUMANIMIZDAGI 4 TA MAKTABDA YaNGI OʻQUV YILI BOShLANDI

Joriy yilning 7-sentyabri tuman Xalq taʼlimi  tizimidagi maktablar oʻqituvchilari, oʻquvchilari va ularning ota-onalari uchun unutilmas kun boʻlib qolsa, ajab emas. Shu kuni qariyb olti oy oldin yurtimizda koronavirus infektsiyasiga chalingan ilk bemor qayd etilganligi munosabati bilan kasallikning tarqalib ketishining oldini olish maqsadida oʻrnatilgan karantin cheklovlariga muvofiq faoliyati toʻxtatilgan umumiy oʻrta taʼlim maktablarida yangi 2020-2021 oʻquv yilining ilk anʼanaviy shakldagi darslari boshlandi.

Kasallikni bartaraf etish borasidagi amalga oshirilgan harakatlar natijasida Oʻzbekiston Respublikasiga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash boʻyicha Respublika maxsus komissiyasi qaroriga muvofiq 5-sentyabrdan boshlab, ota-onalarning fikrlari va mahalliy deputatlar kengashlari takliflariga muvofiq  maktabgacha taʼlim tashkilotlari va umumtaʼlim maktablarining anʼanaviy hamda masofaviy shakldagi faoliyatiga ruxsat berilgan edi.

Shu munosabat bilan 3-sentyabr kuni tuman Xalq taʼlimi boʻlimiga qarashli 11-sonli umumiy oʻrta taʼlim maktabida yangi oʻquv yilini joylarda qay tartibda olib borish boʻyicha amaliy oʻquv-seminari boʻlib oʻtgan, unda ishtirokchilarga anʼanaviy shaklda oʻqishni davom ettirishda mutaxassislar tomonidan belgilangan sanitariya normalari va talablari haqida keng tushunchalar berilgan edi.

Xoʻsh, pandemiya sharoitida maktablarda anʼanaviy taʼlim jarayoni qay tarzda tashkil qilinadi?

Pandemiya sharoitida umumtaʼlim maktablarida taʼlim-tarbiya jarayonini tashkil etishning vaqtinchalik belgilangan tartibiga koʻra, dars mashgʻulotlari ertalab soat 8:00 dan kech soat 17:30 gacha tashkil qilinadi.

Bolalarning bir vaqtda toʻplanib qolishlarining oldini olish maqsadida darslarning boshlanishi tabaqalashtirilgan holda amalga oshiriladi. Yaʼni 1-4-sinflar oʻquvchilari maktabga soat 8:00 gacha, 5-8-sinflar oʻquvchilari soat 8:30 gacha hamda 9-11-sinflar oʻquvchilari kelishi soat 9:00 gacha  alohida eshiklardan ijtimoiy masofa saqlab, tana haroratini oʻlchagan holda amalga oshiriladi. Darslar “Sinf sistemasi”da olib boriladi, yaʼni barcha darslar bir sinf uchun bir xonada olib boriladi. Boshlangʻich sinf oʻquvchilari sinf rahbarlari tomonidan maktabning asosiy darvozasi yonida kutib olinadi hamda kuzatiladi. Ota-onalarning maktabga kirib-chiqishi taʼqiqlanadi.

Darslar oraligʻidagi tanaffuslar vaqtida qoʻngʻiroq chalinmaydi, sinf xonalari koʻchadagi havo haroratidan kelib chiqqan holda shamollatib boriladi. Albatta, oʻqituvchilar, oʻquvchilar tibbiy niqobda boʻlishi talab etiladi.

7-sentyabr kuni tumanimizdagi anʼanaviy tarzda oʻquv yilini boshlash uchun yetarli sharoitlarga ega 21-sonli, 11-sonli, 52-sonli va 4-sonli maktablarda tajriba-sinov tariqasida yangi oʻquv yilining ilk darslari boshlandi. Buning uchun 5-sentyabr kuni mazkur maktablar oʻqituvchilari pandemiya sharoitida qanday qoidalar asosida faoliyat yuritishlari xususida oʻqitilib, tayyorgarlikdan oʻtkazildi.

21-sonli maktab uch qavatli, ulkan muhtasham  binoga ega. Bu yil 573 nafar oʻquvchilarga 67 nafar malakali  oʻqituvchilar taʼlim-tarbiya berishadi. Maktabda oʻquvchilar orasida  koronavirus infektsiyasi tarqalib ketmasligi uchun barcha chora-tadbirlar amalga oshirilgan. Maktab  binosining mavjud 3 ta eshigi oldiga dizenfektsion toʻshama qoʻyilgan. Har bir sinfxonaga bolalar tibbiy niqoblarini almashtirganda, qoʻllarini antiseptik  dokalar bilan artganda  ishlatgan vositalarini tashlashlari uchun axlat qutisi qoʻyildi va tez-tez tozalab turiladi.

Ertalab oʻquvchilarning tana haroratini oʻlchab, maktabga qabul qilish uchun  2 ta masofadan harorat oʻlchash asbobi bilan taʼminlandi. Oʻquvchilarning ertalab tana haroratini oʻlchash uchun hamshira tayinlandi. Oʻquvchilarning bir joyda toʻplanib qolishining oldini olish uchun har qavatda 2 tadan, har smenada 6 ta sinf oʻqitilishi yoʻlga qoʻyildi. Ular maktab binosining 3 ta eshiklaridan kirib kelishadi.

Ilk oʻquv yili boshlangan kun maktab oʻqituvchilari, oʻquvchilari uchun shodiyonaga aylanib ketdi.

- 2019-2020 oʻquv yilining oxirgi choragini  sharoit taqozosiga koʻra masofaviy tarzda davom ettirgan edik. Oʻquvchilarimiz oʻzlashtirishda orqada qolishmadi. Biroq anʼanaviy shaklda, jonli muloqot tarzida dars oʻtishning afzalligi koʻp. Ustoz-shogird oʻrtasida jonli muloqot oʻrnatiladi, oʻquvchilar jamoa bilan ishlashga, bir-biridan qolishmay bilim olishga oʻrganishadi. Shuning uchun ham bugun bizning quvonchimiz cheksiz, taassurotlarimni soʻz bilan ifodalay olmayman, – deydi maktab direktori oʻrinbosari Dilnoza Hayitboyeva.

52-sonli maktabda 382 nafar ilmga chanqoq oʻquvchilar taʼlim-tarbiya olishmoqda. Tugallangan oʻquv yilining oxirgi choragini ular ham masofaviy tarzda davom ettirishgan edi. Ularga taʼlim-tarbiya berayotgan 41 nafar oʻqituvchilar darslarini onlayn shaklda davom ettirib, oʻquvchilarining mashgʻulotlarini puxta oʻzlashtirishlariga harakat qilishgan edi.

7-sentyabr kuni mazkur maktabda 2020-2021 oʻquv yili ham anʼanaviy, ham masofaviy tarzda boshlandi. Ikki smenada taʼlim oladigan oʻquvchilardan birinchi smenada 168 nafari anʼanaviy, 39 nafari onlayn taʼlim shaklida oʻqishga jalb etildi. Ikkinchi smenada esa 174 oʻquvchining 145 nafari anʼanaviy, 29 nafari onlayn taʼlim shaklida yangi oʻquv yilini boshlashdi. Albatta, bunda ota-onalarning xohish-istaklari inobatga olindi.

Tuman markazidan 27 kilometr olisda, Namuna mahallasida joylashgan mazkur maktabda yaratilgan sharoitlar tuman Sanitariya-epidemiologiya osoyishtalik markazi mutaxassislari tomonidan oʻquvchilar anʼanaviy shaklda taʼlim olishlari uchun barcha talablarga javob beradi, deya baholangan.

Ulugʻ maʼrifatparvar bobomiz Mahmudxoʻja Behbudiy “Dunyo imoratlari ichida eng ulugʻi maktabdir” degan edilar.

Ha, jamiyatni harakatlantiruvchi kuch – insonlar hayoti qay tarzda kechishi ularga maktabda qanday taʼlim-tarbiya berilganiga bogʻliq. Demakki maktab – bu hayot-mamot masalasi, kelajak masalasi. Shu boisdan ham keyingi yillarda maktab taʼlimiga, oʻqituvchilar nufuzini oshirishga, ularni moddiy-maʼnaviy qoʻllab-quvvatlashga ulkan eʼtibor qaratilmoqda.

Koronavirus pandemiyasi tufayli umumiy oʻrta taʼlim duch kelgan muammolar, oʻylaymizki, oʻqituvchilarning yosh avlodni barkamol insonlar qilib tarbiyalashdek ezgu maqsadlariga toʻsiq boʻlolmaydi.

Oygul RAJABOVA.