ShOGIRDLARIDAN MINNATDOR USTOZ

Insonning hayotda oʻz oʻrnini topishi, turmushdagi mashaqqatlarni sabr-bardosh bilan yengib oʻtishida unga eng toʻgʻri yoʻlni koʻrsatuvchi zot – ota-onadan keyin oʻqituvchi-ustozdir. Hali hayot tashvishlaridan mutlaqo bexabar, idrokidagi begʻubor olam quvonchlari bilan yashayotgan bolajonlar ongida dunyoviy tasavvurlar uygʻotib, moʻʼjizalar sari yetaklaguvchi oʻqituvchi va murabbiylar siymosi shuning uchun ham har bir inson uchun aziz, mukarram.

Kuyuk koʻpirlik Aminboy Rahimov oʻqituvchilik kasbiga mehr qoʻyganida endigina oq-qorani taniy boshlagan begʻubor bola edi. 5-sonli maktablararo oʻquv-ishlab chiqarish kombinati direktori vazifasida ishlovchi otasi Ozodboy aka Rahimovning ilm haqidagi suhbatlari, ustozlarining mehr bilan dars oʻtishlariga yuragida havas uygʻongan Aminboy umumtaʼlim maktabida aʼlo baholarga oʻqidi. Ayniqsa, fizika-matematika fanlari uning jon-u dili edi. Maktabni tugatib, 1983-yilda Nizomiy nomidagi Toshkent davlat Pedagogika institutiga umumtexnika fanlari va mehnat taʼlimi yoʻnalishi boʻyicha oʻqishga kirdi. Talabalik davrida harbiy xizmat burchini ado etib, 1990-yilda institutni muvaffaqiyatli tugatdi.

Ilk mehnat faoliyatini otasiga shogird sifatida, 5-sonli maktablararo oʻquv-ishlab chiqarish kombinati oʻqituvchisi boʻlib ishlashdan boshlagan A.Rahimov, mana 30-yildirki, 19-sonli umumtaʼlim maktabida oʻquvchilarga taʼlim-tarbiya berishdek sharafli vazifani ado etib kelmoqda. U 12-yil davomida maktabda oʻquvchilarga fizika fanidan saboq berdi, bir vaqtning oʻzida maktab direktorining maʼnaviy-maʼrifiy ishlar boʻyicha oʻrinbosari vazifasida ham faoliyat yuritdi. A.Rahimov tahsilini olgan sobiq oʻquvchilari orasida turli soha fidoyilari, taniqli iqtisodchilar, bugungi kunda ustoz-murabbiylar darajasiga erishgan oʻqituvchilar, shifokorlar bor. Ayni paytda AQShda, Xalqaro Valyuta jamgʻarmasida iqtisodchi boʻlib ishlayotgan Botir Boltaboyev erishayotgan yutuqlar haqida A.Rahimov doim faxrlanib soʻzlaydi.

Ustoz faxri, shogirdidan minnatdorlik tuygʻusi – uning oʻz kasbiy faoliyatining eng yuqori choʻqqisidir. A.Rahimov uchun shundan ulugʻroq mansab va martaba yoʻq. Oilada esa biri-biridan aqlli, tarbiyali farzandlarning otasi, namunali xonadonning ibratli aʼzosi. Hayotda hamisha eng yaqin doʻst va maslahatgoʻy otasi Ozodboy ogʻa katta xonadonga, nevara-chevaralariga bosh-qosh.

Aminboyning oʻgʻli Elbek Toshkent Davlat Axborot texnologiyalari Universitetini muvaffaqiyatli tugatdi, qizi Maftunaxon esa NDPI 2-bosqich talabasi. Umr yoʻldoshi Feruzaxon Kaziyeva mehr-muhabbatli uy bekasi, fidoyi umr yoʻldosh.

Ayni kunlarda Qoraqalpogʻiston xalq taʼlimi aʼlochisi A.Rahimov va 19-sonli umumtaʼlim maktabi jamoasining quvonchlari cheksiz. Bu yilgi bitiruvchi yoshlarning koʻpchiligi OTMlar talabasi boʻlishdi. Garchi maktabda darslar onlayn tarzda olib borilayotgan boʻlsa-da, oʻquvchilar juda faol.

Biz jonkuyar va fidoyi ustoz Aminboy Rahimovni oʻqituvchi va murabbiylar kuni bilan samimiy tabriklaymiz. Yosh avlod kelajagi yoʻlidagi ishlarida yutuqlar tilaymiz.

Robiya YOʻLDOShEVA.