Ustoz nomini sharaflab

Oʻtmishni xotirlab, ajdodlar ruhini qadrlab yashamoq insoniy fazilatlardan biri sanaladi. Shunday insonlar boʻladiki, hayotga yashinday chaqnab keladi, olovday yonib yashaydi. Avlodlar xotirasida mangu iz qoldiradi. Inson qadri uning uzun yoki qisqa umr kurishi bilan emas, balki uning qaysidir sohadagi munosib xizmatlari bilan baholanadi.

Biz eslamoqchi boʻlgan qadrli inson Kamolboy Aminov ibtidosi va intihosi oraligʻi bir yashin chaqnashichalik qisqa fursatni oʻz ichida qamragan umrning har bir lahzasi bebaho ekanligini bilib yashadi. U 1921-yilning bahor faslida (sanasi aniq emas) Qipchoq qishlogʻining, "Chunoq” ovulida dunyoga keldi. Boʻlajak maʼrifatparvarning otasi Aminboy bobo dehqonchilik va hunarmandchilik bilan shugʻullanardi. Halol mehnatning nonini yeb oʻsayotgan bolakay ilm izlab sobiq Alisher Navoiy nomidagi boshlangʻich maktabga qadam tashladi. U umumiy oʻrta taʼlimni sobiq Krupskaya nomidagi (hozirgi 11-sonli) maktabda oʻqib tugatdi.

Zehni teran, bilimga tashna Kamolboy Toʻrtkoʻl tumanidagi Pedagogika bilim yurtida, uni tugatgach, Nukus pedagogika institutining tarix-geografiya boʻlimida tahsil oldi.

1941-yilda boshlangan Ikkinchi jahon urushi Kamolboy Aminovning oʻz oldiga qoʻygan ezgu maqsadlarini amalga oshirishiga xalaqit berdi. Elparvar va shijoatli yigit Vatan himoyasi uchun jangga otlandi. Jang paytida ogʻir yarador boʻlib, gospitalda davolandi va yana frontga joʻnadi. Urushdan eson-omon, koʻksiga orden taqib qaytgan Kamolboy oʻzi savod chiqargan A.Navoiy nomli maktabda oʻz mutaxassisligi boʻyicha tarix va geografiya fani oʻqituvchisi sifatida ish faoliyatini boshladi. Tez orada jamoa orasida hurmat qozondi va maktab ilmiy boʻlim mudiri lavozimiga tayinlandi. Oʻziga nisbatan talabchanlik hissi uni yana taʼlim olishga undadi. 1948 yilda Nukus Davlat pedagogika institutining rus tili va chet tili fakultetiga (sirtqi boʻlimiga) oʻqishga kirdi. Oʻqishni tugatgach, bilim va malakasi oshgan mutaxassis 1958-yilda Amudaryo tuman xalq maorifi boʻlimida maktablar noziri lavozimiga ishga tayinlandi. 1962-yilda tuman xalq taʼlimi boʻlimi mudiri lavozimida faoliyat boshladi.

Afsuski, oʻlim yosh tanlmaydi. 1965-yil 19-sentyabr kuni maorif sohasining jonkuyari, 3 nafar qiz, bitta oʻgʻil farzandning otasi Kamolboy Aminov avtohalokat tufayli vafot etdi.

Har bir xalqning va insonning baxti - xotirlaganda yuragi gʻurur va iftixorga toʻladigan ajdodlarining bor ekanligida. Kamolboy Aminovga munosib boʻla olgan avlodlari bugungi kunda taʼlim sohasida faoliyat yuritib kelmoqdalar. Aziz ustozning ishlarini kelini Dilbaroy, nevarasi, 62-sonli umumtaʼlim maktabi direktori Bahrom Boltaboyev, tuman XTMFMTTEBda uslubchi lavozimida ishlovchi nevara kelini Gulnora Oʻrozboyevalar davom qildirib, ustozning nomini sharaflab yashashmoqda.

Dilbar Oʻrazaqova,

75-sonli umumtaʼlim maktabning boshlangʻich taʼlim oʻqituvchisi.