ChEGARA DAXLSIZLIGINI SAQLASh MAVZUSIDA TADBIR OʻTKAZILDI

Oʻzbekiston Respublikasining Davlat chegarasi toʻgʻrisidagi Qonuni mamlakatimiz Davlat chegarasini belgilash, oʻzgartirish, himoya qilish va qoʻriqlash sohasidagi munosabatlarni tartibga solishga xizmat qiladi.
Davlat chegaralarini belgilash va oʻzgartirish paytida Oʻzbekiston Respublikasi milliy xavfsizlikni taʼminlash zaruratidan kelib chiqadi va davlatlarning suvereniteti, hududiy yaxlitligi, davlat chegaralari daxlsizligi va buzilmasligini oʻzaro hurmatlash, chegara masalalarini tinch yoʻl bilan hal etish, chet el davlatlari bilan har tomonlama, teng huquqlilik va oʻzaro manfaatdorlik asosida hamkorlik qilish, qoʻshni davlatlarning ichki ishlariga aralashmaslik, kuch ishlatmaslik va kuch bilan tahdid qilmaslik printsiplariga amal qilinadi. Shuningdek, ushbu Qonunda Davlat chegarasini belgilash va oʻzgartirish, Davlat chegarasiga belgi qoʻyish, Davlat chegarasi rejimini belgilash kabi munosabatlarning huquqiy asoslari  kabi koʻpgina masalalar qamrab olingan.
Shuningdek, Davlat chegarasi orqali tovarlar, boshqa mol-mulk va hayvonlarni olib oʻtish qonun hujjatlarida hamda Oʻzbekiston Respublikasining xalqaro shartnomalarida belgilangan joylarda, yaʼni belgilangan oʻtkazish punktlari orqali amalga oshiriladi.
Ushbu qonunning 15-moddasida Davlat chegarasini Davlat chegarasi orqali oʻtkazish punktlaridan boshqa joydan yoki oʻtkazish punktlari orqali boʻlsa-da, bu boradagi  qoidalarni buzgan holda har qanday  usul bilan kesib oʻtish, kesib oʻtishga urinish Davlat chegarasini buzish hisoblanadi, deb koʻrsatilgan.
Maʼlumki, tumanimiz Turkmaniston davlati bilan chegaradosh. Ushbu hududlarda aholining Oʻzbekiston Respublikasi Davlat chegarasi toʻgʻrisidagi qonunini aholiga keng targʻib etish – chegaraoldi hududida tinchlik-osoyishtalik saqlanishini taʼminlaydi.
Shu maqsadda yaqinda Davlat xavfsizlik xizmatiga qarashli Chegarani qoʻriqlash vzvodi komandiri Elyor Joʻraboyev, xizmatchisi Fazliddin Mahamadiyevlar Bogʻ mahallasi fuqarolari bilan suhbat oʻtkazishdi.
Tadbirda Elyor Joʻraboyev aholiga Oʻzbekiston Respublikasining Davlat chegarasi toʻgʻrisidagi qonuni talablarini, ayniqsa, chegaraoldi hududda yashovchi aholi chuqur bilishi, amal qilishi lozimligi haqida gapirdi.
Maʼruzada chegaraoldi hududlarida boʻlishda chegara daxlsizligiga  rahna  solmaslik, chegaraoldi hududlarida joylashgan harbiy muhandislik-texnik inshootlarga va toʻsiqlarga shikast yetkazmaslik, chegarani buzib oʻtishga urinmaslik lozimligi, buningdek holatlar sodir etilsa, amaldagi qonun-qoidalarga muvofiq maʼmuriy va jinoiy javobgarlikka tortishga asos boʻlishi taʼkidlandi.
Shuningdek, qoʻshni davlatlar chegaralarida keyingi vaqtlarda sodir etilgan koʻngilsiz holatlarga xolisona baho berildi.
Tadbirda aholi “Hamroh” gazetasiga obuna boʻlishga, unda yoritilayotgan dolzarb va qiziqarli materiallarni oʻqib, maʼnaviyatini yuksaltirib borishga daʼvat etildi. Soʻngra aholini qiziqtirgan savollarga javoblar berildi.
Oʻtkazilgan tadbir chegaraoldi hududida istiqomat  qiluvchi aholiga chegaralarimiz daxlsizligini saqlashga oid koʻpgina bilimlarini singdirgani bilan ahamiyatli boʻldi.

O.RAJABOVA.