ChEGARA DAXLSIZLIGI AHOLIGA HAM BOGʻLIQ

Maʼlumki, tumanimiz Turkmaniston davlati bilan chegaradosh. Ushbu hududlarda aholining Oʻzbekiston Respublikasi Davlat chegarasi toʻgʻrisidagi qonunini aholiga keng targʻib etish – chegaraoldi hududida tinchlik-osoyishtalik saqlanishini taʼminlaydi.

Shu maqsadda joriy yilning 27-oktyabrida 3-Chegarani qoʻriqlash vzvodi komandiri Elyor Joʻraboyev, oʻrinbosari Fazliddin Mahamadiyevlar chegara hududda joylashgan Uyshin mahalla fuqarolari bilan Davlat chegarasi toʻgʻrisida qonunni targʻib etish, fuqarolar tomonidan davlat chegarasi buzilishining oldini olish maqsadida suhbat oʻtkazdi.

Tadbirda Elyor Joʻraboyev  va Fazliddin Mahamadiyevlar aholiga Oʻzbekiston Respublikasining Davlat chegarasi toʻgʻrisidagi qonuni talablarini, ayniqsa, chegaraoldi hududda yashovchi aholi chuqur bilishi, amal qilishi lozimligi haqida gapirdi. Taʼkidlandiki, Oʻzbekiston Respublikasining Davlat chegarasi toʻgʻrisidagi Qonuni mamlakatimiz Davlat chegarasini belgilash, oʻzgartirish, himoya qilish va qoʻriqlash sohasidagi munosabatlarni tartibga solishga xizmat qiladi.

Davlat chegaralarini belgilash va oʻzgartirish paytida Oʻzbekiston Respublikasi milliy xavfsizlikni taʼminlash zaruratidan kelib chiqadi va davlatlarning suvereniteti, hududiy yaxlitligi, davlat chegaralari daxlsizligi va buzilmasligini oʻzaro hurmatlash, chegara maslalarini tinch yoʻl bilan hal etish, chet el davlatlari bilan har tomonlama, teng huquqlilik va oʻzaro manfaatdorlik asosida hamkorlik qilish, qoʻshni davlatlarning ichki ishlariga aralashmaslik, kuch ishlatmaslik va kuch bilan tahdid qilmaslik printsiplariga amal qilinadi. Shuningdek, ushbu Qonunda Davlat chegarasini belgilash va oʻzgartirish, Davlat chegarasiga belgi qoʻyish, Davlat chegarasi rejimini belgilash kabi munosabatlarning huquqiy asoslari  kabi koʻpgina masalalar qamrab olingan.

Shuningdek, Davlat chegarasi orqali tovarlar, boshqa mol-mulk va hayvonlarni olib oʻtish qonun hujjatlarida hamda Oʻzbekiston Respublikasining xalqaro shartnomalarda belgilangan joylarda, yaʼni belgilangan oʻtkazish punktlari orqali amalga oshiriladi.

Ushbu qonunning 15-moddasida Davlat chegarasini Davlat chegarasi orqali oʻtkazish punktlaridan boshqa joydan yoki oʻtkazish punktlari orqali boʻlsa-da, bu boradagi  qoidalarni buzgan holda har qanday  usul bilan kesib oʻtish, kesib oʻtishga urinish Davlat chegarasini buzish hisoblanadi, deb koʻrsatilgan.

Maʼruzalarda chegaraoldi hududlarida boʻlishda chegara daxlsizligiga  rahna  solmaslik, chegaraoldi hududlarida joylashgan harbiy muxandislik-texnik inshootlarga va toʻsiqlarga shikast yetkazmaslik, chegarani buzib oʻtishga urinmaslik lozimligi, buningdek holatlar sodir etilsa, amaldagi qonun-qoidalarga muvofiq maʼmuriy va jinoiy javobgarlikka tortishga asos boʻlishi taʼkidlandi.

Shuningdek, qoʻshni davlatlar chegaralarida keyingi vaqtlarda sodir etilayotgan koʻngilsiz holatlarga xolisona baho berildi. Soʻngra aholini qiziqtirgan savollarga tegishli javoblar berildi.

Oʻtkazilgan tadbir chegaraoldi hududida istiqomat  qiluvchi aholiga chegaralarimiz daxlsizligini saqlashga oid koʻpgina bilimlarini singdirgani bilan ahamiyatli boʻldi.

Shuningdek, shu kuni Qilichboy ovulida joylashgan 9202 “K” harbiy qism masʼullari Doʻrman ovulida yashovchi, pandemiya tufayli iqtisodiy nochor ahvolga tushib qolgan Rustam Husainovning oilasida boʻlib, turmush tarzi bilan tanishdilar va kundalik ehtiyoj uchun ishlatiladigan oziq-ovqat mahsulotlarini hadya etdilar.

Ushbu oiladagilar oʻzlariga koʻrsatilgan eʼtibordan va gʻamxoʻrlikdan nihoyatda mamnun boʻldilar. Shunday qiyin vaziyatda hol-ahvol soʻrab kelgan hamda roʻzgʻor uchun zarur boʻlayotgan un, tuxum, yogʻ, makaron va boshqa mahsulotlarni keltirib bergan, eng muhimi el-yurt tinchligi, osoyishtaligini asrayotgan harbiylarga katta minnatdorchilik bildirdilar.

Oygul RAJABOVA.