Noyabr – xorijiy tillar fan oyligi

Har yili 36-sonli umumtaʼlim maktabida  umumtaʼlim fanlari oyliklari katta taassurotlar bilan, juda qiziqarli oʻtadi. “Noyabr – xorijiy tillar fan oyligi” doirasidagi tadbirlar ham bir oy davomida maktab oʻquvchilari uchun yanada qiziqarli dars-mashgʻulotlar, sinflararo bellashuvlar, bilimdonlar bahslari orqali biri-biridan zavqli lahzalarga boy tarzda oʻtdi.

Fan oyligi doirasidagi tadbirlar va dars-mashgʻulotlarda oʻquvchilar ingliz va rus tillarida diktantlar, insholar yozishdi. Krossvord va testlar yechishdi, xorij yozuvchilarining asarlarini oʻqib, sheʼrlar yodlashdi. Har doimgidan koʻproq amaliy mashqlar bajarishdi. Maktabning yosh, isteʼdodli rassomlari “Zolotaya osen” mavzusida  peyzaj janridagi rasmlarni chizishdi. Xorijiy tillar oʻqituvchilari Nodira Soliyeva, Zohida Bekmurodova, Raʼno Ahmedova, Nasiba Ahmedova, Muhabbat Tursunboyeva, Xosiyat Rajabova, Rayhon Oʻrozboyeva, Zamira Otajonova, Dildor  Xolmenova, Dilnura Boboniyozova, Shahlo Iskandarova, Mohiraxon Egamberganova hamda Madinaxon Fayzullayevalar  maktabda “Xorijiy tillar fan oyligi”ning muvaffaqiyatli oʻtishini taʼminladilar. Oʻquvchilarning rus va ingliz tillarini puxta oʻzlashtirishlarini taʼminlash maqsadida amalga oshirilgan barcha tadbirlarga bosh-qosh boʻldilar.

Joriy yilning 21-noyabr sanasida fan oyligining yakuniy bosqichiga bagʻishlangan bayramona tadbir oʻtkazilib, unda fan oyligi davomida amalga oshirilgan barcha amaliy mashgʻulotlar, ochiq darslar, turli mavzulardagi koʻrik-tanlovlar, adabiy-maʼrifiy hamda musiqiy kechalar, seminar-treninglar umumlashtirildi. Yaʼni, uchta tilda, xorijiy tillar oʻqituvchilari tomonidan tayyorlangan stsenariy asosida fan oyligining yakuniy bosqichi oʻtkazildi.

Tadbirni maktabimizning eng bilimdon oʻquvchilari, fanlar olimpiadalari va bilimlar bellashuvi tanlovlarining faol ishtirokchilari F.Habiyeva oʻzbek, Sh.Ibodullayeva rus, K.Qoʻchqorova ingliz tillarida mohirlik bilan boshqarishdi. Maktab direktorining oʻquv-tarbiyaviy ishlari boʻyicha oʻrinbosari S.Qutlimurodov hamda maʼnaviy-maʼrifiy masalalar boʻyicha direktor oʻrinbosari B.Xoʻjamurodovlar maktabda “Xorijiy tillar fan oyligi” muvaffaqiyatli oʻtgani bilan barchani tabrikladilar.

Tadbirni 3-«A» sinf oʻquvchilari oʻzlarining quvnoq rus xalq raqslari bilan boshlab berishdi. 1-sinf oʻquvchisi N.Yangiboyev esa ingliz tilida sheʼr oʻqidi.

Tadbir davomida 11-sinf oʻquvchisi Z.Sharipova buyuk rus yozuvchisi M.Gorkiyning hayoti va ijodi haqida yoddan, erkin hikoya qildi. Uning M.Gorkiy ijodi va faoliyatini puxta oʻrganib, sof rus tilida, hech bir xatosiz hikoya qilganidan barcha mamnun boʻldi. Shuningdek, 10-sinf oʻquvchisi A.Jadigerova K.Simonovning  “Jdi menya” sheʼrini nihoyatda taʼsirli qilib yoddan aytib berdi.

Oʻquvchi-yoshlardan D.Rahimboyeva esa Sergey Yeseninning tarjimai holini M.Rahimboyeva esa A.S.Pushkinning “Uznik” sheʼrini juda chiroyli oʻqib berishdi.

Bundan tashqari, 5-sinf oʻquvchilari ijrosidagi  “Katyusha” raqsi, 4-sinf oʻgʻil bolalari talqinidagi oʻzbek mumtoz ashulasining ingliz tilida yangragani barchada faxrlanish tuygʻusini uygʻotdi. Kichkintoylar ijrosidagi masxarabozlik oʻyinlari, 5-sinf oʻquvchilari talqinidagi “Drujba”, 6-sinf oʻquvchilari mahorat bilan ijro etgan “Ti moryachka – ya moryak”, 8-sinf oʻquvchilari ijrosidagi inglizcha raqslar, ayniqsa, 6-sinf oʻquvchisi R.Baynazarov ijrosidagi zamonaviy raqs, 8-sinf qizlari talqinidagi “Selena gomez” inglizcha raqs, rassom qizlarimiz tomonidan ijod etilgan kuz manzaralarini aks ettiruvchi rasmlar namoyishi tadbirga ajoyib, betakror fayz bagʻishladi.

Tinchlik, baxt-saodat, ezgulikni, doʻstlikni oʻzida mujassam etib,  hilpirab turgan Oʻzbekiston bayrogʻi ostida nihoyasiga yetgan “Xorijiy tillar fan oyligi” doirasidagi tadbirlarimizning yakuniy bosqichi barchaga olam-olam zavq bagʻishladi. Oʻquvchilarning xorijiy tillarni oʻrganishga boʻlgan ixlosini yanada oshirib, bu boradi bilim va koʻnikmalari mustahkamlandi.

Tadbir yakunida maktab direktori Q.Nurimbetov faol oʻquvchilarga faxriy yorliqlar topshirdi.

Nasiba Ahmedova, 36-sonli maktabning rus tili va adabiyot fani oʻqituvchisi.