TAʼLIMGA EʼTIBOR – KELAJAKKA EʼTIBOR

Prezidentimiz tomonidan taʼlim sohasiga berilayotgan yuksak eʼtibor, davlatimiz tomonidan oʻqituvchilarga, ustoz degan sharafli kasb egalariga boʻlgan hurmat-ehtiromning  yanada kuchaytirilishi bizni juda ham ruhlantirib yubordi. Shu oʻrinda aytish joizki, taʼlimda boʻlayotgan yangilanishlar oʻz navbatida biz – taʼlim sohasi xodimlariga katta bir masʼuliyat yuklamoqda.

Prezidentimizning Murojaatnomasida aytib oʻtilganidek, bu yil oliy taʼlimga qabul parametrlari 2016-yilga nisbatan 2,5 barobarga oʻsishi va  oliy taʼlim bilan qamrab olish darajasi 9 foizdan 25 foizga yetkazilishi – kelajagimiz egalari boʻlgan yoshlarimizga boʻlgan katta imkoniyatlar boʻldi desak mubolagʻa boʻlmaydi. Ehtiyojmand oilalarning mingga yaqin qizlari ilk bor oliy oʻquv yurtlariga alohida davlat grantlari asosida qabul qilinishi esa, Oliy taʼlim olish imkoni boʻlmagan, iqtisodiy jihatdan qiynalayotgan yoshlarni davlatimiz tomonidan qoʻllab quvvatlanishining natijasidir.

Prezidentimiz olgʻa surgan, taʼlim sifatini chekka qishloqlarda ham  poytaxtdagidek yuqori darajaga yetkazish gʻoyasi, olis hududlarga borib faoliyat koʻrsatish istagida boʻlgan oʻqituvchilarning qoʻllab-quvvatlanishi, taʼlim sohasi xodimlariga berilayotgan yuksak ishonchning natijasidir. Bu ishonch va yaratilayotgan imkoniyatlar hamda qoʻllab quvvatlashlar – biz oʻqituvchilarga  oʻz kasbimizga boʻlgan masʼuliyatimizni yanada chuqur his qilishni talab etadi.

Endi biz oddiy oʻquv dasturlari va  metodik qoʻllanmalar bilan emas, balki xalqaro mezonlarga moslashtirilgan oʻquv dasturlari va metodik qoʻllanmalar orqali taʼlim berishga oʻtmoqdamiz. Kelgusi oʻquv yilidan boshlangʻich sinflarda davlat taʼlim standartlari oʻrniga xorijiy tajriba asosida, bolalarga ortiqcha yuklama bermaydigan “Milliy oʻquv dasturi” ning joriy qilinishi, biz oʻylaymizki, maktab taʼlimi va tarbiyasini olgan yoshlarning kelajakda rivojlangan davlatlar yoshlari bilan raqobatlashishdan tap tortmaydigan kelajak egalarining yanada koʻpayishiga zamin yaratadi.

Yalgʻashboy Shomurodov, 26-sonli maktab direktori, Oʻzbekiston xalq taʼlimi aʼlochisi.