YaNGI MAKTABGAChA TAʼLIM TAShKILOTI BINOSI FOYDALANIShGA TOPShIRILDI
Farzand tarbiyasi eng dolzarb hamda hech qachon oʻz dolzarbligini yoʻqotmaydigan masallardan biridir. Bunda maktabgacha taʼlimning ahamiyatini hech narsa bilan oʻlchab boʻlmaydi.
Keyingi yillarda maktabgacha taʼlim sohasida amalga oshirilgan islohotlar natijasida Oʻzbekiston Respublikasi maktabgacha taʼlim tizimini 2030-yilgacha rivojlantirish kontseptsiyasi tasdiqlandi. Shu asosda maktabgacha taʼlimni yangi sifat darajasiga olib chiqish, sohada xususiy sektorning ishtirokini kengaytirish, bolalarni maktabgacha taʼlim bilan qamrab olish darajasini oshirish boʻyicha tizimli ishlar qilinmoqda.
Chunki maktabgacha taʼlim sohasi uzluksiz taʼlim tizimining birlamchi boʻgʻini hisoblanib, sogʻlom va barkamol bolani tarbiyalash va maktabga tayyorlashda muhim ahamiyat kasb etadi.
Tumanimizda ham Maktabgacha taʼlim tashkilotlari soni yildan-yilga oshib borayotgani ham buning yorqin dalilidir. Hozirgi vaqtda tumanda 50 ta davlat, 4 ta davlat-xususiy sherikchilik asosidagi, 57 ta oilaviy nodavlat maktabgacha taʼlim tashkilotlari faoliyat koʻrsatmoqda. Ularning jami soni 111 tani tashkil qiladi.
Shu yilning 1-iyun kuni tumanimizda davlat maktabgacha taʼlim tashkilotlari soni yana bittaga koʻpaydi. Toshyop ovuli hududida 2020-yilda Invistitsiya dasturi doirasida qurilishi boshlangan, umumiy qiymati 2 mlrd. 685 mln. soʻmni tashkil qilgan 51-sonli maktabgacha taʼlim tashkiloti binosi qurilishi tugallanib, foydalanishga topshirildi.
Muassasa ishga tushirilishiga bagʻishlangan tantanada tuman hokimi, oʻrinbosarlari, sektor rahbari, maktabgacha taʼlim tizimi xodimlari, ovul faollari qatnashdilar.
Tuman hokimi Sultonboy Yoʻldoshev, tuman Davlat soliq inspektsiyasi boshligʻi Aydos Seyitov, Toshyop ovul fuqarolar yigʻini raisi Gulshod Sobirova, taʼlim faxriysi, ovul faoli Karimboy Rajabovlar soʻzga chiqib, ovul ahlini farzandlari uchun ana shunday muhtasham bolalar maskani qurilib, ishga tushirilishi munosabati bilan qutladilar.
Shundan soʻng ramziy tasma kesilib, tantana ishtirokchilari bino ichkarisiga kirdilar va bu yerda bolajonlarning yayrab-quvnab ulgʻayishlari, taʼlim-tarbiya olishlari uchun yaratilgan sharoitlar bilan tanishdilar.
Muassasa 90-oʻringa moʻljallangan boʻlib, bolajonlar uchun barcha qulayliklar yaratilgan, musiqa, rus va ingliz tillari toʻgaraklari, sport mashgʻulotlari oʻtkaziladigan xonalar zarur qoʻllanmalar, koʻrgazmali qurollar, zamonaviy sport buyumlari bilan toʻliq jihozlangan.
Tumanimiz koʻrkiga koʻrk bagʻishlab turgan muhtasham binoni qurishda “Mangʻit servis” masʼuliyati cheklangan jamiyati rahbari va quruvchilari jonbozlik koʻrsatib, 1-iyun – Xalqaro bolalarni himoya qilish kuniga bolajonlarga munosib sovgʻa tayyorladilar.
Muassasa tarbiyalanuvchilari ijrosidagi shoʻx qoʻshiq, rasmlar, ifodali oʻqilgan sheʼrlar tadbir ishtirokchilariga zavq bagʻishladi.
Aytish joizki, tumanimizda 3-7 yoshgacha boʻlgan bolalar soni 16 ming 682 nafarni tashkil etib, shundan 11 ming nafari maktabgacha taʼlim tashkilotlariga qamrab olingan. Yaʼni qamrab olish koʻrsatgichi 66 foizni tashkil qiladi. Yil yakuniga qadar bu koʻrsatkichni 67,4 foizga yetkazish rejalashtirilgan.
Yangidan qurilib, foydalanishga topshirilgan mazkur maktabgacha taʼlim tashkiloti binosi ham ovul bolajonlarining yayrab ulgʻayishi va taʼlim-tarbiya olishida muhim ahamiyat kasb etishi shubhasiz.
Oygul Rajabova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
