Maktabgacha taʼlim sohasi tobora rivojlanmoqda

Maktabgacha taʼlim sohasida misli koʻrilmagan oʻzgarishlarni bugun har bir yurtdoshimiz sezib, kuzatib turibdi. Taʼlimning poydevori hisoblangan maktabgacha taʼlim tizimiga davlat tomonidan katta eʼtibor qaratilib, soha rivoji uchun keng qamrovli islohotlar amalga oshirilmoqda. Qator qonunlar, farmon va qarorlar qabul qilinib, taʼlim-tarbiyaning asosi boʻlgan maktabgacha taʼlim tobora taraqqiy etib bormoqda. Maktabgacha taʼlim tashkilotlari soni kun sayin ortib, ularga bolalarni qamrab olish darajasi oshmoqda.

Tumanimizda barpo etilayotgan taʼlim-tarbiya maskanlari zamonaviy koʻrinish kasb etmoqda. Eski binolar oʻrniga yangilari qurilmoqda, baʼzilari qayta rekonstruktsiya qilinib, bolajonlarimizning sifatli taʼlim-tarbiya olishlari uchun barcha imkoniyat hamda shart-sharoitlar yaratilmoqda. Shuningdek, sohada xususiy sektorning ulushi ham yil sayin ortib bormoqda. Tadbirkorlar oʻz mablagʻlari va bank kreditlari evaziga zamonaviy binolar qurib, soha rivojiga munosib hissa qoʻshmoqdalar. Tosh yop ovuli xududida joylashgan davlat-xususiy sherikchilik asosidagi “Zebo” maktabgacha taʼlim tashkiloti fikrimizning yaqqol dalilidir. 

Mazkur nodavlat maktabgacha taʼlim tashkilotining loyiha qimati 2 milliard 956 million 845 ming soʻm boʻlib, shundan 2 milliard 227 million soʻm “Oʻzsanoatqurilishbank” tamonidan ajratilgan imtiyozli kredit mablagʻlaridir. Ushbu mablagʻlar hisobidan Tosh yop ovuli hududida yangi, zamonaviy koʻrinishga ega, barcha qulaylik, sharoitlar yaratilgan, 100-oʻrinli taʼlim-tarbiya dargohi bunyod etildi. Ushbu tashkilot bunyod etilishi bilan 14 ta yangi ish oʻrni yaratildi.

Aytish kerakki, davlatimiz rahbarining “Maktabgacha taʼlim tizimini yanada ragʻbatlantirish va rivojlantirish chora-tadbirlari toʻgʻrisida”gi qarori asosida maktabgacha taʼlim tizimini tubdan isloh qilish va takomillashtirish, maktabgacha taʼlim tashkilotlarini davlat tomonidan boshqarishning samarali tizimini yaratish hamda uning moddiy-texnika bazasini mustahkamlash borasida tizimli ishlar qilinmoqda. Ushbu qaror bilan maktabgacha taʼlim tizimini yanada takomillashtirish boʻyicha dastur tasdiqlanib, uning doirasida maktabgacha taʼlim tashkilotlari faoliyatini tizimli tashkillashtirish, qurish, rekonstruktsiya qilish va mukammal taʼmirlash borasidagi ishlar olib borilmoqda.

Shuningdek, Oʻzbekiston Respublikasi Prezidentining “2020-2022-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qaroriga asosan 2020-yilgi investitsiya dasturi asosida Amudaryo tumani Tosh yop ovuli hududida joylashgan 13-sonli maktabgacha taʼlim tashkiloti filiali binosini rekonstruktsiya hisobidan yangidan qurish ishlari sifatli tarzda yakuniga yetkazildi.

Bino 90-oʻringa moʻljallangan boʻlib, umumiy qiymati 2 mlrd. 685 mln. 600 ming soʻmlik qurilish ishlari bosh pudratchi «MANGIT-SERVIS» masʼuliyati cheklangan jamiyati tomonidan amalga oshirildi.

Zamonaviy koʻrinishga ega mazkur 2 qavatli bino foydalanishga topshirilishi bilan Amudaryo tumani hokimining 2021-yil 3-dekabr kungi “Maktabgacha taʼlim tashkilotiga yuridik shaxs maqomi berish toʻgʻrisida”gi qaroriga asosan ilgari filial sifatida ish yuritgan mazkur muassasaga 51-sonli maktabgacha taʼlim tashkiloti sifatida mustaqil yuridik shaxs maqomi berildi. Bugungi kunda 51-sonli maktabgacha taʼlim tashkilotida 3 ta asosiy guruh tashkil qilingan boʻlib, ushbu guruhlarga hududdagi 90 nafar bolalar qamrab olingan va taʼlim-tarbiya olmoqdalar.

Aytish kerakki, bugungi kunda Amudaryo tumanida maktabgacha taʼlim tashkilotlarining umumiy soni 115 tani tashkil qiladi. Shundan 51 tasi davlat, 4 tasi davlat-xususiy sherikchilik asosidagi va 60 tasi oilaviy nodavlat maktabgacha taʼlim tashkilotlari hisoblanadi. Mazkur taʼlim-tarbiya muassalariga bolajonlarni qamrab olish koʻrsatkichi yil sayin ortib bormoqda. Bugun tumanimizdagi maktabgacha taʼlim tashkilotlariga qamrab olingan bolalar soni 11 ming 211 nafar boʻlib, qamrov koʻrsatkichi 67,2 foizni tashkil etadi. Joriy yilning yakuniga qadar ushbu koʻrsatkichni 67,4 foizga yetkazish rejalashtirilgan.

Charos Arslonova, tuman hokimligining Axborot xizmati rahbari.