TUMAN MATBUOTI – BETIMSOL MAʼNAVIYaT TARFIBOTChISI

Insoniyat paydo boʻlibdiki, axborotga boʻlgan tashnalik uni bir zum ham tark etgan emas. Imo-ishora, buyumlar vositasida biri-biriga yangiliklarni yetkazishga harakat qilgan insonlar zamonlar oʻtishi bilan axborotga boʻlgan tashnalikni qondiruvchi yangi-yangi vositalarni ixtiro etishdi. Daraxtlarga, devorlarga, hayvonlar terisiga bitilgan ilk xabarnomalar ibtidoiy jamiyatning taraqqiyotini taʼminladi, yozuv paydo boʻlishi bilan birmuncha madaniy-maʼrifiy xususiyatga ega matbuot shakllandi.

Oʻzbek zaminida esa XVasr oʻrtalarida zamonaviy jurnalistikaga asos solindi. Salkam 600-yildirki, oʻzbek matbuoti ijod va tafakkurning taʼsirchan muhitida shakllanib, el-u xalqimizning manfaati, kelajagini koʻzlab, amalga oshirilgan va amalga oshirilayotgan jamiki ezgu ishlarning ilhomchisi boʻlib xizmat qilmoqda. Bu borada gap ketganida yaratuvchanlik va farovonlikni har qadamda taʼmin etish uchun zarur boʻlgan davlat boshqaruvi hamda xalq oʻrtasidagi oʻzaro hamkorlikni taʼminlashda tumanimizda faoliyat olib borayotgan ommaviy axborot vositalari, tom maʼnoda jonkuyarlik va fidoyilik timsollariga aylanib ulgurganini mamnuniyat bilan eʼtirof  etgimiz keladi. Oʻzining 87 yillik tarixiga ega, 1934-yildan beri zamon talabidan kelib chiqib, turli nomlarda chop etilib kelinayotgan tuman gazetasi - “Taraqqiyot koʻzgusi” va uning ilova nashri “Mening oilam” tumanda va Respublika miqyosida eng namunali va oʻqishli, shu bilan birga oʻz davriyligini yoʻqotmagan matbuot nashri sifatida xalq qalbidan munosib joy oldi. Gazeta tahririyati va uning ishchan tashabbuskor ijodiy jamoasi fidoyiligi tufayli bugungi kunda tahririyat huzuridagi “Jayxun ilhomlari” NNT, 2012-yilda Qoraqalpogʻistonda birinchilardan boʻlib, internet tarmogʻida mustaqil OAV sifatida oʻz faoliyatini boshlagan www.amunews.uz veb sayti oʻzining ming-minglab muxlislariga, xolis kuzatuvchilariga ega.

Mamlakatimizda koʻplab tuman va shahar gazetalari tahririyatlari oʻtish davri qiyinchiliklari, iqtisodiy taqchilliklar sababli oʻz davriyligini taʼminlay olmay qolgan bir sharoitda, cheksiz iftixor va mamnuniyat bilan qayd etamizki, Amudaryo tumanida nafaqat bosma nashrlar, balki tom maʼnoda Amudaryo tuman matbuoti shakllandi va taraqqiyot bosqichiga kirdi.

Anʼanaviy axborot vositalari boʻlmish “Taraqqiyot koʻzgusi” va uning ilovasi “Mening oilam” gazetalari televideniye, internet jurnalistikasi mahsuli boʻlmish www.amunews.uz veb sayti milliy axborot maydonida tobora mustahkam oʻrin egallab, zamon talablari asosida yangilanib bormoqda.

Bugungi kunda oʻz faoliyatini muvaffaqiyatli tarzda amalga oshirayotgan tuman OAVlarining jamiyat hayotidagi oʻrni va taʼsirini, samaradorligini yanada oshirish, media tarmoqlarining moddiy-texnik bazasini mustahkamlash, yangilash, texnik-texnologik jihatdan modernizatsiya qilish, iqtidorli jurnalist kadrlar safini oshirish, soha xodimlarining mehnatini moddiy, maʼnaviy ragʻbatlantirish borasida keng qamrovli ishlar amalga oshirilmoqda.

Ayniqsa, televideniye dasturlarining davriyligini taʼminlashga qaratilayotgan eʼtibor tufayli 2010-yilning sentyabr oyida haftasiga 3 kun, kuniga 2 soatdan iborat koʻrsatuvlar efirga uzatilgan boʻlsa, 2014-yilning 2-choragidan asosiy efir vaqti davomiyligi 12 soatdan 20 soatga yetkazildi. 2019-yilning yanvar oyidan esa analog tizimdan raqamli formatga oʻtilgach, Mangʻit, Nukus, Qoʻngʻirot, Moʻynoq shaharlaridagi raqamli televizion stantsiyalari orqali koʻrsatuvlar kuniga 18 soat efirga uzatilmoqda.

Ayni paytda Amudaryo televideniyesi oʻz koʻrsatuvlari bilan Qoraqalpogʻiston Respublikasi, Xorazm viloyati, hatto qardosh Turkmaniston Respublikasining ayrim tumanlari xonadonlariga kirib bordi.

Shuni mamnuniyat bilan qayd etish joizki, Amudaryo televideniyesining ijtimoiy tarmoqlardagi sahifalari orqali tumanimiz hayotiga oid yangiliklar bilan tanishish istagida boʻlgan obunachilar safi kun sayin oshib bormoqda. Jurnalistika sohasiga katta qiziqish bilan kirib kelayotgan iqtidorli ijodkor yoshlar tomonidan tayyorlanib, efirga uzatilayotgan “Zamin” informatsion dasturi, “Xabar.uz”, “Yangiliklar” dasturlari, shuningdek, “Kun mavzusi”, “Odoblar xazinasi”,  “Koʻngil mulki” kabi adabiy-badiiy hamda madaniy-maʼrifiy mavzulardagi koʻrsatuvlar, jonli ijrodagi kontsert dasturlari allaqachon oʻz muxlislarini topgan.

“Taraqqiyot koʻzgusi” va uning ilovasi “Mening oilam” gazetalari, amunews.uz veb sayti, Amudaryo televideniyesi birlashgan tahririyatlari ijodiy jamoalari tomonidan amalga oshirilayotgan keng qamrovli maʼnaviy-maʼrifiy ishlar tufayli bugungi kunda Amudaryo tumani matbuoti jadal rivojlanibgina qolmay, yetuk va iqtidorli ijodkor yoshlar pleyadasi ham yetishib kelayotgani koʻngillarga quvonch bagʻishlaydi. Ustoz-shogird anʼanasini  intellektual mulk sifatida qadrlaydigan ijodiy jamoa tomonidan har yili Oliy Majlis huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondining grant loyihalari muvaffaqiyatli tarzda amalga oshirilib kelinayotgani bois, amudaryolik ijodkor yoshlarning ilk sheʼriy va nasriy toʻplamlari tahririyat qoshidagi “Taraqqiyot koʻzgusi” gazetasi nashriyoti orqali chop etilib, ommaga taqdim etilmoqda.

Ayni paytda “Taraqqiyot koʻzgusi” va uning ilovasi “Mening oilam” gazetalari 2635 nusxada chop etilib, obunachilariga oʻz vaqtida tarqatilmoqda. “ATV” telekanali koʻrsatuvlarining sifat va salmogʻi tobora oshib, qamrov hududi kengayib bormoqda.

Bir soʻz bilan aytganda, tumanimizda bosma nashrlar, televideniye,  internet jurnalistika sohasi ham jadal rivojlanib, qamrov auditoriyasi kengayib, xalqimizni yangi marralar sari ruhlantirish, oʻsib kelayotgan yosh avlodni istiqlol gʻoyalariga sadoqatli, vatanparvar insonlar qilib tarbiyalashda qudratli targʻibotchi sifatida har bir qalbdan munosib joy olgan va bu har bitta amudaryolikning betimsol maʼnaviy boyligidir.

Robiya YOʻLDOShEVA.