TUMAN GAZETASINING BIRINChI MUHARRIRI

Darhaqiqat, tumanimizdagi barcha jurnalistlarning ustozi, tajribali jurnalist va muharrir Sobir Yusupov tuman matbuotida oʻzidan oʻchmas iz qoldirdi. Agar hayot boʻlganlarida bu yil tabarruk yuz yoshini birgalikda nishonlagan boʻlardik.

Rahmatli ustozim Sobir Yusupov Xitoy qishlogʻida tugʻilib, taʼlim-tarbiya olgan, yoshligidan matbuotga, jurnalistikaga juda qiziqqan. U 1940-yildan oldin “Sotsializm yoʻli” tuman gazetasida ishlay boshlagan. Oddiy xodimlikdan muharrirlik darajasiga yetishgan. Yurtimizni fashistlardan ozod etishda ham ishtirok etgan. Urushdan yarador boʻlib qaytgach, yana “Sotsializm yoʻli” gazetasida jurnalistlik faoliyatini davom ettirgan.

1957-yilning dekabr oyi oxirida Xorazm viloyatining Mangʻit va Qoraqalpogʻiston Respublikasiga qarashli Qipchoq tumanlari birlashtirilgan, oʻsha paytda Sobir Yusupov Qipchoq tumani vakili sifatida yangi tumanga nom tanlash hayʼatida qatnashgan. Yoʻldosh Fayzullayev esa Mangʻit tumani vakili boʻlgan. Rahmatli Yoʻldosh Fayzullayev suhbatlarning birida “tumanga Amudaryo deb nom berishni S.Yusupov taklif etdi” degandilar.

1958-yilning yanvar oyidan boshlab, yangi tumanda “Amudaryo haqiqati” degan gazeta tashkil etilib, uning birinchi muharriri ustozimiz Sobir Yusupov boʻlganlar. Men ustoz bilan 1958-yilning fevral oylarida tahririyatda tanishganman. Ustoz menga maqola va sheʼrlar yozish boʻyicha maslahatlar berar, xabar, maqolalarimni gazetada yoritib, ragʻbatlantirar edi, 1960-yildan tuman gazetalari tugatilib, tumanlararo gazeta “Kommunizm gʻalabasi” chiqa boshladi. Bu  davrlarda ustoz partiya va kasaba uyushma tashkilotlarida ishladi.

1965-yilning iyul oyidan tuman gazetalari qayta tashkil qilindi. Shu yili Sobir Yusupov yana “Amudaryo haqiqati” gazetasi muharriri boʻlib ishlay boshladi. Ustoz meni 1966-yil yanvar oyida gazetaga ishga taklif etdi. Dastlab adabiy xodim, keyinchalik boʻlim mudiri vazifalarida birgalikda ishlaganmiz.

Ustoz Sobir Yusupovning shogirdlari juda koʻp edi. Tursunboy Davlatboyev, Sobir Qutlimurodov, Nurilla Xudoyorov, Qodir Ollamurodov, Yoʻldosh Ernazarov, Jumamurod Erimmatov, Gulnora Matyoqubova, Safo Matchonov, Tursunboy Sultonov, Qurbonboy Ollamurodov, Ollambergan Jumaniyozov, Guljon Kenjaboyeva, Bibihojar Doʻsniyozovalar Sobir Yusupovda saboq olgan, munosib shogirdlari edilar.

1975-yilda ustoz Sobir Yusupovni tuman partiya tashkilotiga ishga olishdi, u yerda targʻibot boʻlimi mudiri oʻrinbosari boʻlib ishladi. Keyinchalik pensiyaga chiqdi. 1985-87-yillarda, yaʼni vafot etguniga qadar yana “Amudaryo haqiqati” gazetasida maxsus muxbir boʻlib, samarali ishladi.

Qadrdon ustozimiz maqolalar yozish bilan birgalikda sheʼrlar ham yozardi, shu boisdan u gazetaga muharrirlik qilgan paytda “Adabiyot sahifasi” oyda ikki-uch marta chiqardi. Tayyorlab berilgan sheʼr va hikoyalar gazetaning barcha sonlarida yoritilib turilardi. 1985-87-yillarda gazetada ustozning juda koʻp tuyuqlari yoritildi, shu jumladan, sheʼrlari ham. Yoritilgan ijod namunalari ikki kitob qilib bosishga yetadi, chamamda. Bularning bari ustozdan qolgan oʻchmas izlardir. Shuningdek, u Toʻxta momomiz bilan uzoq yashab farzandlar, nevaralar koʻrishdi. Ayni kunda chevaralari ham jamiyatimizning faol aʼzolaridan biri. Nevarasi Zumrad Bekatova esa ayni kunda Oʻzbekiston Respublikasi Oliy Majlisi Qonunchilik Palatasi deputati boʻlib, elimizga xizmat qilmoqda.

Ushbu maqolani yozishdan maqsad, ustoz ruhiga yana bir marta ehtirom koʻrsatmoq, zamondoshlarining, shogirdlarining u haqdagi xotiralarini gazetada yoritilishiga turtki boʻlishdir. Biz uchun qadrli boʻlgan ustozimizning 100 yillik yubiley tadbirini kuz oylarida oʻtkazish niyatimiz bor.

Ilohim, ruhingiz shod, iymoningiz hamroh, oxiratingiz obod boʻlsin, Ustoz!

Saʼdulla XOʻJANIYoZOV,

faxriy jurnalist.