“AYoLLAR DAFTARI”GA KIRITILGAN XOTIN-QIZLARGA TIKUV MAShINALARI BERILDI

Prezidentimiz tomonidan joriy yil 26-fevral kuni xotin-qizlarning muammolarini hal qilish va ularni ijtimoiy qoʻllab-quvvatlash masalalari muhokamasi yuzasidan yigʻilishi oʻtkazilgan edi. Unga koʻra ayollar bandligini taʼminlash, ularni tadbirkorlikka jalb etish, moliyaviy qoʻllab-quvvatlash borasida bir qator vazifalar belgilandi.

Mamlakatimiz aholisining qariyb yarmi – 17 millioni xotin-qizlardir. Ularning manfaatlarini taʼminlash, jamiyat hayotidagi oʻrnini mustahkamlash davlatimiz ijtimoiy siyosatining muhim yoʻnalishlaridan biri hisoblanadi. Qizlarning sifatli taʼlim olishi, kasb egallab, ishli boʻlishi uchun katta imkoniyatlar yaratilgan. Ayollarning tadbirkorligi, tashabbuslari qoʻllab-quvvatlanayapti. Oʻtgan yili 585 mingga yaqin xotin-qizlarning bandligi taʼminlandi. Shundan 36 mingdan ortiq ayollar esa kasb-hunarga oʻqitildi.

Joriy yilda 6-iyul kuni tuman Mahalla va oilani qoʻllab-quvvatlash boʻlimi binosida “Ayollar daftari”ga kiritilgan xotin-qizlarning muammolarini tizimli ravishda hal etish va ularni ijtimoiy qoʻllab-quvvatlash maqsadida “Ayollar daftari” roʻyxatida turgan boquvchisini yoʻqotgan, ijtimoiy himoyaga muhtoj 40 nafar ayollar uchun jamgʻarma hisobidan tikuv mashinalari berildi. Tadbir ochilishida soʻz olgan tuman hokimi Sultonboy Yoʻldashev ayollar bandligini taʼminlash maqsadida tumanda koʻplab ishlar amalga oshirilayotganini, jumladan, 40 nafar xotin-qizga tikuv mashinasi berilganini, bu esa ularning bandligini taʼminlash uchun vosita boʻlib xizmat qilishini taʼkidladi.

Qoraqalpogʻiston Respublikasi Mahalla va oilani qoʻllab-quvvatlash Vazirining birinchi oʻrinbosari Maryam Ahmedova, tuman hokimi Sultonboy Yoʻldashev, sektor rahbarlari J.Muftullayev, U.Xudayberganov, A.Seitovlar ishtirokida tikuv mashinalari oʻz egalariga topshirildi. Yigʻilishda ayollarni ish bilan taʼminlash, ijtimoiy qoʻllab-quvvatlash, ularga tibbiy va psixologik yordam qamrovini kengaytirish, oilaviy ajralishlarning oldini olish chora-tadbirlari muhokama qilindi.

Amudaryo tumanida ijtimoiy himoyaga, yordamga muhtoj xotin-qizlarni qoʻllab-quvvatlash maqsadida tuzilgan “Ayollar daftari”ga 1832 nafar yordamga muhtoj xotin-qizlar kiritilgan edi. Keyinchalik ijtimoiy, iqtisodiy, psihologik qoʻllab-quvvatlanib, bandligi taʼminlandi hamda 1832 nafar yordamga muhtoj ayol-qizlar “Ayollar daftari”dan chiqarildi. Shuningdek, xotin-qizlarni tadbirkorlikka jalb qilish uchun hudud banklari orqali kreditlar berilmoqda. Soʻnggi yillarda Mahalla va oilani qoʻllab-quvvatlash vazirligi rahbariyati boshchiligida, ishchi guruhi tuzilib, barcha hududlarda ayollarni qiynayotgan muammolar oʻrganilib chiqilmoqda.

Xotin-qizlar bandligini taʼminlash masalasiga alohida ahamiyat qaratildi. Ularni talab yuqori boʻlgan kasblar va tadbirkorlikka oʻqitish, shu asosda biznesini yoʻlga qoʻyishda moliyaviy qoʻllab-quvvatlash tartibini joriy etish tadbirning asosiy vazifasi etib belgilandi.

Tadbirda olib borilayotgan ishlarni tizimli amalga oshirish maqsadida, mamlakatimizda joriy etilgan ishsiz va boquvchisiz xotin-qizlar boʻyicha alohida roʻyxatlar shakllantirib, har biri bilan yangi tizim, yangicha tartibda manzilli ishlash muhimligi taʼkidlandi.

Sevara ISMOILOVA.