MAHALLA VA OILANI QOʻLLAB-QUVVATLASh BOʻLIMI MASʼULLARI TOMONIDAN SAYYoR QABUL OʻTKAZILDI

Joriy yilning 12-iyul sanasida Amudaryo tumanining Choykoʻl ovul fuqarolar yigʻinida kengaytirilgan yigʻilish oʻtkazilib, unda Amudaryo tuman Mahalla va oilani qoʻllab-quvvatlash boʻlimining faoliyati, shuningdek, murojaatlar bilan ishlash va ijro intizomi boʻyicha amalga oshirilayotgan ishlar oʻrganildi hamda atroflicha muhokama qilindi.

Oʻrganish jarayonida Oʻzbekiston Respublikasi Mahalla va oilani qoʻllab-quvvatlash vazirligi Xotin-qizlar muammolari bilan ishlash boʻlimi bosh mutaxassisi Guljahon Asqarova, Qoraqalpogʻiston Respublikasi Mahalla va oilani qoʻllab-quvvatlash vazirligi masʼullari ishtirok etdi.

Mahalla va oilani qoʻllab-quvvatlash vazirligi mutasaddilari Amudaryo tuman Mahalla va oilani qoʻllab-quvvatlash boʻlimi tomonidan amalga oshirilayotgan va istiqboldagi rejaviy tadbirlar hamda oʻtkazilayotgan tadbirlarning mahalla aholisi hayotida tutgan oʻrni, ijobiy samarasi bilan qiziqib, amalga oshirilgan har bir ishni tahlil qildilar. Shu bilan birga aniqlangan muammo va kamchiliklarni bartaraf etish boʻyicha oʻz taklif hamda tavsiyalarini berdilar.

Shundan soʻng, masʼullar tomonidan Choykoʻl ovul fuqarolar yigʻini binosida fuqarolar uchun sayyor qabul tashkil etildi. Sayyor qabulda Choykoʻl, Toʻlqin ovul fuqarolar yigʻini hamda Oybek nomli, Bosuv mahallalari fuqarolar yigʻini aholisi ishtirok etdi.

Qabul davomida kelib tushgan 19 ta murojaatning 12 tasi masʼullar tomonidan mufassal oʻrganilib, joyida ijobiy hal etildi. Shu bilan birga aholini qiynab kelayotgan muammolar masʼullar tomonidan tinglanib, zarur tushuntirish va tavsiyalar berildi. Murojaatlarning 7 tasi tegishliligi boʻyicha idora-tashkilotlarga havola etilib, nazoratga olindi.

Shuningdek, tadbirda tumanning turli hududlarida yashovchi va “Ayollar daftari” roʻyxatiga kiritilgan 30 nafar ayol-qizlar bilan oshkora va samimiy muloqotlar oʻtkazildi. “Ayollar daftari”dan chiqishni xohlovchi bir guruh ayol-qizlarning rejalari, orzulari, ezgu niyatlari ham oʻrganildi. Kasb-hunar oʻrganishga, oʻz tadbirkorlik faoliyatini boshlashga qiziquvchi ayollarga alohida tushuntirishlar va tavsiyalar berildi.

Tadbir davomida  30 nafar “Ayollar daftari” roʻyxatiga kiritilgan ayol-qizlarga “Ayollar jamgʻarmasi” mablagʻlari hisobidan esdalik sovgʻalari hamda tikuv mashinalari berildi. Shuningdek, tadbirda tuman mahalla va oilani qoʻllab-quvvatlash boʻlimi rahbariyati va boʻlim xodimlari oldida turgan dolzarb vazifalar ham tilga olinib, boʻlim hayotiga oid boshqa masalalar ham atroflicha muhokama etildi va masʼullar tomonidan kerakli maslahatlar berildi.

Boʻlib oʻtgan yigʻilish va sayyor qabul jarayonida ishtirok etgan Choykoʻl, Toʻlqin ovullari hamda Oybek nomli va Bosuv mahallasi aholi vakillarining ogʻzaki murojaatlariga ham masʼullar atroflicha javob berdilar.

Robiya YOʻLDOShEVA.