Tumanimizdagi 1-sonli maktabgacha taʼlim tashkiloti - namunali taʼlim-tarbiya maskani

Mamlakatimizda yosh avlodning taʼlim-tarbiya olishlariga aʼlohida eʼtibor qaratilib, keng qamrovli islohotlar amalga oshirilmoqda. Ertamiz egalarining har tomonlama yetuk, barkamol boʻlib voyaga yetishida bogʻcha yoshidan sifatli taʼlim-tarbiya olishlari muhim ahamiyatga ega ekanligi inobatga olinib, maktabgacha taʼlim tizimini yanada rivojlantirish borasida tizimli ishlar qilinmoqda.

Amudaryo tumanidagi 1-sonli davlat maktabgacha taʼlim tashkiloti farzandlarimizning sifatli boshlangʻich taʼlim-tarbiya olishlarida namuna koʻrsatib kelayotgan tashkilotlardan biri hisoblanadi. Navoiy mahallasida joylashgan mazkur tarbiya maskani binosi 1992-yilda barpo etilgan. Hozirda 260-oʻringa moʻljallangan tarbiya maskanida 15 ta guruhlarda bolajonlar taʼlim-tarbiya olishmoqda. Mazkur guruhlarning 13 tasi asosiy hamda 2 tasi qisqa muddatli guruhlar boʻlib, ayni paytda jami 350 nafar bolalar tarbiyalanmoqda.  Shularning 300 nafari asosiy guruhlardagi, 50 nafari qisqa muddatli guruhlardagi tarbiyalanuvchilar hisoblanishadi.

Hozirda maktabgacha taʼlim tashkilotida jami 76 nafar xodimlar faoliyat yuritmoqdalar. Ularning 37 nafari pedagog, 39 nafari texnik xodimlar hisoblanadi. Ushbu pedagog xodimlarning 15 nafari oliy maʼlumotli, 22 nafari oʻrta maxsus maʼlumotga ega. Shuningdek, 2019-yilda 2 nafar pedagoglar – Oydin Kazakova va Hamida Haytbayevalar  ikkinchi malaka toifasiga ega boʻldilar.

Maʼlumot tariqasida keltirish joizki, tumanimizda joriy yilning iyul oyi holatiga jami 117 ta maktabgacha taʼlim tashkilotlari mavjud boʻlib, shundan, 51 tasi davlat, 4 tasi davlat-xususiy sherikchilik asosidagi va 62 tasi nodavlat oilaviy maktabgacha taʼlim tashkilotlari hisoblanadi.

Bugungi kunga qadar tumanda 3-7 yoshgacha boʻlgan, yaʼni maktabgacha taʼlim yoshidagi bolalar soni 16 ming 682 nafarni tashkil qiladi. Shundan davlat maktabgacha taʼlim tashkilotlariga 9 ming 466 nafar, davlat xususiy sherikchilik asosidagi maktabgacha taʼlim tashkilotlariga 285 nafar, oilaviy nodavlat maktabgacha taʼlim tashkilotlariga 1 ming 520 nafar bolajonlar qamrab olingan. Jami maktabgacha taʼlim tashkilotlariga qamrab olingan bolalar soni 11 ming 271 nafar boʻlib, qamrov koʻrsatkichi 67,6 foizni tashkil qiladi.

Maktabgacha taʼlim tashkilotlarida bolalarga taʼlim-tarbiya berishda Oʻzbekiston Respublikasining “Maktabgacha taʼlim va tarbiya toʻgʻrisida”gi Qonuni, Oʻzbekiston Respublikasi Vazirlar Mahkamasining “Maktabgacha taʼlim va tarbiyaning davlat standartini tasdiqlash toʻgʻrisida”gi qaroriga asoslangan holda samarali ishlar olib borilmoqda. Qolaversa, “Ilk qadam” davlat oʻquv dasturi hamda 6 yoshdan 7 yoshgacha boʻlgan bolalarni maktab taʼlimiga tayyorlash boʻyicha “Ilm yoʻli” variativ dasturi asosida tizimli ishlar amalga oshirilmoqda.

1-sonli davlat maktabgacha taʼlim tashkilotida taʼlim-tarbiya jarayoning toʻgʻri tashkil etilishi hamda mehnatkash, masʼuliyatli va izlanuvchan xodimlarning samarali xizmatlari natijasida katta yutuqlar qoʻlga kiritilmoqda.

Jumladan, 1-iyun “Xalqaro bolalarni himoya qilish” kuniga bagʻishlab tumanimizdagi maktabgacha taʼlim-tashkilotlari oʻrtasida “Oʻzbekiston – umumiy uyimiz” mavzusida oʻtkazilgan asfaltga rasm chizish boʻyicha koʻrik-tanlovning tuman bosqichida 1-sonli davlat maktabgacha taʼlim tashkiloti tarbiyalanuvchilari faol ishtirok etdilar hamda faxrli 1-oʻrinni egalladilar.

Shuningdek, tuman Maktabgacha taʼlim boʻlimi tomonidan tashkil etilgan “Yilning eng yaxshi tarbiyachisi” kasbiy koʻrik-tanlovining tuman bosqichida “Eng yaxshi ijodkor tarbiyachi” nominatsiyasi boʻyicha mazkur tarbiya maskani tarbiyachisi Mohira Bozorboyeva faol ishtirok etib, tanlovning Respublika bosqichiga yoʻllanmani qoʻlga kiritgan.

Maktabgacha taʼlim tashkilotida taʼlim-tarbiya jarayoni toʻgʻri yoʻlga qoʻyilgan boʻlib, har bir bolaning individual imkoniyatlarini, qobiliyatlarini, xohish-istaklarini, ehtiyojlarini hisobga olgan holda taʼlim hamda tarbiya berilmoqda.

Shuningdek, tarbiya maskanidagi mashgʻulotlar xorijiy mamlakatlar tajribasi, ilm-fan yutuqlarini oʻrgangan holda hamda ilgʻor pedagogik texnologiyalar va zamonaviy axborot-kommunikatsiya texnologiyalarini joriy etgan holda tashkil qilinadi. Bu kabi samarali ishlar natijasida farzandlarimiz har tomonlama yetuk, barkamol, Vatan taraqqiyotiga munosib hissa qoʻshadigan avlod boʻlib voyaga yetishlari shubhasiz.

Charos Arslonova, tuman hokimligining Axborot xizmati rahbari.