Sportchi qizlarga sport kiyimlari topshirildi

Bugungi kunda tumanimiz yoshlari orasida jismoniy tarbiya va sport bilan shugʻullanuvchilar soni tobora ortib bormoqda. Sportning deyarli barcha turlari rivojlanib, sportchilarimiz koʻplab musobaqalarda yuqori natijalarni qoʻlga kiritib kelmoqdalar. Nafaqat oʻgʻil bolalar, balki qizlarimizning ham sport va uning turlariga boʻlgan qiziqishlari yuqori. Sportning futbol turi boʻyicha Amudaryo tumani qizlar termajamoasi bugungi kunda Oʻzbekistondagi eng ilgʻor jamoalardan biri hisoblanib, bellashuvlarda sovrinli oʻrinlarni egallab kelishmoqda. Bularning barchasi tumanimizda sportni yanada rivojlantirish borasida olib borilayotgan tizimli ishlar samarasi, albatta.

Joriy yilning 5-iyul sanasida tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova hamda Xalq deputatlari tuman kengashi deputati, “Tamara Tekstil" masʼuliyati cheklangan jamiyati rahbari Tamara Yusupovalar futbolchi qizlarimiz bilan uchrashdilar. Xolimbeg ovulidagi sport maydonchasida tashkil etilgan uchrashuvda masʼullar sportchi qizlarning erishayotgan yutuqlari bilan samimiy tabriklab, ularni qiynayotgan muammolar bilan tanishdilar.

Uchrashuv mobaynida “Tamara Tekstil" masʼuliyati cheklangan jamiyatida ishlab chiqarilgan sport kiyimlari 20 nafar sportchi qizlarimizga Toshkent shahrida oʻtkaziladigan musobaqada kiyishlari uchun sovgʻa sifatida topshirildi.

Shu oʻrinda aytish kerakki, 16 yosh qizlar oʻrtasida tumanimiz qizlar futbol terma jamoasi shu kunga qadar qator musobaqalarda gʻoliblikni qoʻlga kiritib kelishmoqda.

Xususan, futbol boʻyicha 16 yosh qizlar orasida oʻtkazilayotgan Oʻzbekiston chempionati musobaqasida respublikaning "Aral samali" guruhi tarkibida tumanimizning sportchi qizlari Qoraqalpogʻiston Respublikasi va tumanimiz shaʼnini himoya qilishmoqda. Sportchi qizlarimiz ishtirokida “Aral samali” jamoasi “Navoiy” jamoasini 7:0 hisobida magʻlub qilgan. Shuningdek, “Aral samali” jamoasi Xorazm jamoasi bilan boʻlgan baxslarda 16:0 hisobida gʻolib boʻlgan. Qolaversa, sportchi qizlarimiz “Aral samali” jamoasining Buxoro jamoasini 7:2  hisobida magʻlub qilishida ham katta hissa qoʻshgan.

Tumanimiz faxriga aylangan sportchi qizlarimiz bilan suhbat mobaynida tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova bugungi kunda mamlaklatimizda yoshlarimizning har tomonlama barkamol avlod boʻlib yetishishlari uchun yaratilayotgan shart-sharoitlar, jismoniy tarbiya va sportni yoshlar orasida ommalashtirish, sportga qiziquvchi va sport shugʻullanuvchilari sonini oshirish, sogʻlom turmush tarzini yaratish borasida olib borilayotgan keng qamrovli islohotlar xususida soʻz yuritdi.

Shuningdek, suhbat chogʻida masʼullar futbolchi qizlarning qiziqishlari, kelgusida orzu-maqsadlari, rejalari bilan oʻrtoqlashdilar, samimiy muloqot yakunida sportchi qizlarning oldindagi musobaqalarida katta omad hamda muvaffaqiyat tiladilar.

Charos Arslonova.