VAZIRLAR MAHKAMASINING YaNGI QARORI MAZMUN-MOHIYaTI TUShUNTIRILDI

Shu yil 3-avgustda Vazirlar Mahkamasining “Voyaga yetmaganlarga ijtimoiy-huquqiy yordam koʻrsatishni yanada takomillashtirish chora-tadbirlari toʻgʻrisida” qarori eʼlon qilindi. Ushbu qarorga koʻra Voyaga yetmaganlarga ijimoiy-huquqiy yordam koʻrsatish markazlari toʻgʻrisidagi nizom tasdiqlandi.

17-avgust kuni Voyaga yetmaganlar ishlari boʻyicha Amudaryo tumani idoralararo komissiyasi  tomonidan mazkur qaror mazmun-mohiyatini tushuntirish, tegishli vazifalarni belgilab olish maqsadida yigʻilish tashkil etildi. Tuman Ichki ishlar boʻlimi binosida oʻtkazilgan ushbu yigʻilishda Voyaga yetmaganlar ishlari boʻyicha Amudaryo tumani idoralararo komissiyasi masʼul kotibi Jahongir Xolmurodov, tuman Aholi bandligiga koʻmaklashish markazi direktori Farhod Ahmadov, tuman Ichki ishlar boʻlimi masʼullari va profilaktika inspektorlari, fuqarolar yigʻinlari raislari qatnashishdi.

Yigʻilishni tuman Ichki ishlar boʻlimi boshligʻi oʻrinbosari Baxtiyor Oʻrozov olib bordi. Soʻzga chiqqan masʼullar yangi qaror asosida shu yil 1-sentyabrdan qarovsiz qolgan bolalar bilan ishlashda yangicha tizim joriy etilishi va bu borada tegishli vazifalar koʻrsatib oʻtilgani xususida soʻz yuritishdi. Qaror mazmun-mohiyati slayd koʻrinishida namoyish etilib, har bir bandi boʻyicha batafsil tushunchalar berildi.

Yigʻilishda taʼkidlanganidek, qarorga koʻra endilikda voyaga yetmagan shaxsning qarovsiz qolganligini aniqlashda voyaga yetmaganlar masalalari boʻyicha inspektor-psixologlar taʼlim muassasalarida, profilaktika inspektorlari xizmat hududida, mahalla raislari oilalarda oʻrganish ishlarini oʻtkazadi. Ijtimoiy xavfli oilalardagi bolalarni aniqlash va ular bilan ishlash uchun mahalla raislari masʼul hisoblanadi. Bolaning qarovsiz qolgani davlat organlari, NNT va fuqarolar tomonidan aniqlanganida profilaktika inspektoriga xabar beriladi. Shundan soʻng, qarovsiz qolgan bolalar ijtimoiy-huquqiy yordam koʻrsatish markaziga joylashtiriladi.

Yigʻilish davomida profilaktika inspektorining bu boradagi vazifalari, tayyorlanadigan hujjatlar, qarovsiz va nazoratsiz qolgan voyaga yetmagan bolalarni markazga qabul qilish tartibi toʻgʻrisida keng tushunchalar berildi.

Tartibga koʻra markaz boshligʻi hududiy jamoat xavfsizligi xizmati boshligʻini qarovsiz bolani qabul qilganlik toʻgʻrisida xabardor qiladi. Sogʻliqni saqlash muassasasi 3 soatda Markazga kelib, bolani tibbiy tekshiruvdan oʻtkazadi. Markaz 48 soatda bola shaxsini, oilaviy muhit va qarovsiz qolganlik sababini oʻrganadi va ijobiy xulosa boʻlsa ota-onasiga yoki oʻrnini bosuvchi shaxslarga beradi. Markaz ota-onasiga topshirilgan bolaning oʻqishi, xulqi, oilaviy muhitini 1-yil monitoring qiladi. Monitoringda bolaning ijtimoiy xavfli holatda qolishi aniqlansa, bolani 48 soatdan koʻp 30 kundan koʻp boʻlmagan vaqda Markazda saqlash uchun sudga iltimosnoma kiritiladi.

Undan tashqari,  qarovsiz bolalar ixtisoslashtirilgan taʼlim muassasasiga joylashtirilib, oʻqishi davomida xulq-atvori nazorat qilinadi. Bolalar ixtisoslashtirilgan taʼlim muassasasini tugatganidan soʻng, ular bandligi ham taʼminlanadi. Shuningdek, hududiy jamoat xavfsizligi xizmati bolaning professional yoki OTMga oʻqishga kirishiga koʻmaklashadi.

Yigʻilish davomida profilaktika inspektorlari, fuqarolar yigʻinlari raislari oʻzlarini qiziqtirgan savollar bilan murojaat qilib, batafsil javoblar oldilar.

Jahongir Xolmurodov, Voyaga yetmaganlar ishlari boʻyicha Amudaryo tumani idoralararo komissiyasi masʼul kotibi.