XOTIRA XIYoBONIDA “YaNGI OʻZBEKISTONNI BIRGALIKDA QURAMIZ” ShIORI OSTIDA KATTA TADBIR OʻTKAZILDI

Yurtimizda Vatanimiz mustaqilligining 30 yillik bayramini munosib nishonlash uchun qizgʻin tayyorgarlik koʻrilmoqda. Bayram arafasida xalqimizga koʻtarinki kayfiyat, bayramona ruh bagʻishlash maqsadida barcha hududlarda turli tadbirlar tashkil etilmoqda. Tadbirkorlar va ishbilarmonlar harakati – Oʻzbekiston Liberal-demokratik partiyasi tomonidan ham respublikamizning barcha hududlarida mustaqilligimizning oʻttiz yilligi hamda partiya gʻoyalari targʻibotiga bagʻishlangan “Yangi Oʻzbekistonda erkin va farovon yashaylik” shiori ostida ommaviy tadbirlar oʻtkazib kelinmoqda.
Amudaryo tumanidagi Xotira xiyobonida ham “Yangi Oʻzbekistonni birgalikda quramiz” shiori ostida katta tadbir oʻtkazildi.
20-avgust kuni Oʻzbekiston Liberal-demokratik partiyasi tuman Kengashi tomonidan taniqli sanʼatkorlarni jalb qilgan holda aholiga bayramona kayfiyat ulashish, O‘zLiDeP gʻoya va maqsadlarini aholi keng qatlami ongiga singdirish maqsadida tashkil etilgan ushbu tadbirda Oʻzbekiston Oliy Majlisi Qonunchilik palatasi deputati Muxtor Ibragimov, O‘zLiDeP Qoraqalpogʻiston Respublikasi Kengashi apparat rahbari Sharaf Oʻtemisov, tuman hokimi Sultonboy Yoʻldashev, partiya faollari, deputatlar ishtirok etishdi.

Soʻzga chiqqan masʼullar yurtimizda keyingi besh yilda amalga oshirilayotgan islohotlar natijasi bugun shaharlarimizda, uzoq qishloqlarimizda oʻz aksini topayotganini, Prezidentimiz rahbarligida amalga oshirilayotgan ushbu oʻzgarishlar jarayonlarida Oʻzbekiston Liberal-demokratik partiyasi ham oʻzining munosib ulushini qoʻshib, faol ishtirok etib kelayotganini alohida taʼkidlashdi.
Undan tashqari, mustaqillik tufayli erishilgan yutuqlar, yangilanayotgan Oʻzbekistonda “Xalq boy boʻlsa, davlat ham boy va qudratli boʻladi” tamoyilini hayotga joriy etish orqali aholini tadbirkorlikka keng jalb etish, biznes yuritish shartlarini yengillashtirish, oilaviy tadbirkorlik va kasanachilik, hunarmandchilikni ragʻbatlantirish uchun yaratilgan yangi imkoniyatlar borasida toʻlqinlanib gapirisharkan, tadbir ishtirokchilarini O‘zLiDeP bilan birga boʻlishga, yangi Oʻzbekistonni birgalikda qurishga chorlab qolishdi.
Ushbu tadbirda ishtirok etgan partiya faoli, Mahalla va oilani qoʻllab quvvatlash boʻlimi boshligʻi oʻrinbosari Muqaddas Beknazarova hamda boshqalar soʻzga chiqib, oʻtgan besh yil Qoraqalpogʻiston Respublikasi hayotida ham mislsiz oʻzgarishlarga boy boʻlganini eʼtirof etishdi. Shu yillar davomida qurilgan oʻnlab yangi ijtimoiy obʼektlar, soni tobora oshib borayotgan tadbirkorlik subʼektlari, zamonaviy va shinam uy-joylar, nafaqat amudaryoliklar, balki butun Qoraqalpogʻiston hayotidagi ulkan voqea – Amudaryo daryosi ustiga qurila boshlagan zamonaviy koʻprik, avtomobil va temir yoʻllarini cheksiz gʻurur, faxru-iftixor bilan tilga olishdi.
Tadbirda Tadbirkorlar va ishbilarmonlar harakati – Oʻzbekiston Liberal demokratik partiyasi atributlari va shiorlari osib qoʻyilgan sahnada katta ekranda partiyaning faoliyatiga oid, hududdagi ijtimoiy-iqtisodiy oʻzgarishlarga bagʻishlangan videoroliklar namoyish etildi. Partiya shiorlari yozilgan pannolar, O`zLiDeP ramzi tushirilgan bayroqlar, sharlar, liboslar maydonga bayramona ruh bagʻishladi.
Tadbir mobaynida “Yangi Oʻzbekistonni birgalikda quramiz”, “Yangi Oʻzbekiston: birgalikda yuksalish  sari”, “Yangi Oʻzbekistonda erkin va farovon yashaylik!” shiorlari baralla yangradi.
Ochiq maydonda oʻtkazilgan tadbirda tuman Madaniyat boʻlimi havaskorlari tomonidan namoyish etilgan musiqiy dastur, sanʼatkorlar ijrosidagi Vatan madhiga bagʻishlangan qoʻshiqlar, dilrabo raqslar tuman aholisini yanada xushnud etdi.

Ozoda Xudoyberganova.