Qoraqalpogʻiston Respublikasi Vazirlar Kengashi Raisi Qahramon Sariyev tumanimizdagi 56-maktabga tashrif buyurdi

Bugungi kunda mamlakatimizda taʼlim tizimi tubdan isloh qilinib, taʼlim sifatini oshirishga alohida eʼtibor qaratilmoqda, soha rivoji uchun barcha sharoit va imkoniyatlar yaratilmoqda. Bu borada amalga oshirilayotgan keng qamrovli chora-tadbirlar natijasida yoshlarning bilim olishga boʻlgan qiziqishi tobora ortib bormoqda. Maktab bitiruvchilarini oliy taʼlimga qamrab olish koʻrsatkichi yildan yilga ortayotganligi, yoshlarimizning ilm-fan sirlarini egallashga boʻlgan intilishlarining kuchayib borayotganligi fikrimizning isbotidir.

Amudaryo tumanida 2020-2021-yilgi oʻquv yilida umumtaʼlim maktablarini tamomlagan bitiruvchilarining oliy  oʻquv yurtlariga oʻqishga kirish koʻrsatkichi yanada ortdi. Tuman Xalq taʼlimi boʻlimiga qarashli 56-sonli umumtaʼlim maktabi bu borada eng ilgʻor taʼlim maskanlaridan hisoblanadi. Xususan, 2020-2021 oʻquv yilida maktabning 11-sinfini jami 77 nafar bitiruvchi tamomlagan boʻlib, shundan 55 nafari, yaʼni 71,2 foizi OTMga qabul qilindi. Maktabning Texnologiya fani yoʻnalishidagi 11-“B” variativ sinfining 25 nafar bitiruvchilaridan barchasi, yaʼni 100 foizi OTMga oʻqishga kirdi. Bunday yuqori natijalarni qoʻlga kiritishda maktab maʼmuriyati hamda oʻqituvchilarning hissasi beqiyos, albatta.

Joriy yilning 6-sentyabr sanasida Qoraqalpogʻiston Respublikasi Vazirlar Kengashi Raisi Qahramon Sariyev, Qoraqalpogʻiston Respublikasi Xalq taʼlimi vaziri Rustem Reimov, tuman hokimi Sultonboy Yoʻldoshev hamda tegishli masʼullar 56-sonli maktabdagi “Birinchi qoʻngʻiroq” tadbiriga tashrif buyurdilar. Tashrif chogʻida mutasaddilar maktab maʼmuriyati hamda oʻqituvchilarini tumanda taʼlim-tarbiya tizimini rivojlantirishga qoʻshayotgan tengsiz hissalari uchun minnatdorchilik bildirdilar hamda maktab bitituvchilarining oliy taʼlimga oʻqishga kirishda erishgan yuqori natijalari bilan qizgʻin tabrikladilar. Tadbir mobaynida maktabning qator ilgʻor oʻqituvchilari oʻz kasbiga masʼuliyat bilan yondashayotganliklari,        yoshlarga sifatli taʼlim-tarbiya berib, ularning qobiliyat va imkoniyatlariga qarab toʻgʻri yoʻnalish berayotganliklari, shu orqali mamlakatimizda taʼlim sohasi rivojiga qoʻshayotgan hissalari uchun qimmatbaho esdalik sovgʻalari bilan taqdirlandilar.

Tadbir mobaynida Qoraqalpogʻiston Respublikasi Vazirlar Kengashi Raisi Qahramon Sariyev 56-maktab direktori Orzigul Xudayberganovaga, maktabning Texnologiya fani yoʻnalishidagi variyativ sinflarining sinf rahbarlari Azimboy Saparboyev hamda Xushnud Charshamovlarga Qoraqalpogʻiston Respublikasi “Xalq taʼlimi aʼlochisi” koʻkrak nishoni va qimmatbaho sovgʻalarni topshirdi.

Aytish kerakki, 2020-2021-oʻquv yilida maktabning Texnologiya fani yoʻnalishidagi 11-“B” variativ sinfnining 25 nafar bitiruvchilarining 100 foizi, 11-“V” variativ sinfning 25 nafar bitiruvchilarining 22 nafari, yaʼni 88 foizi oliy taʼlim muassasalariga oʻqishga qabul qilingan.

Maktab bitiruvchilarining Oliy oʻquv yurtlariga oʻqishga kirish koʻrsatkichlari yildan yilga ortib bormoqda. Xususan, 2018-2019-oʻquv yilida maktabning 11-sinfini tamomlagan 33 nafar bitiruvchidan 7 nafari, yaʼni 20 foizi OTMga oʻqishga kirgan boʻlsa, maktabda 2019-2020 oʻquv yilida 10-11-sinflarda Texnologiya yoʻnalishi boʻyicha variativ sinflar tashkil etilishi hisobiga bu koʻrsatgich 44,7 foizni tashkil etgan. Variativ sinflardagi bitiruvchilarning 88 foizi Oliy taʼlim muassasalariga oʻqishga qabul qilingan.

Tadbir mobaynida mutasaddilar maktab kutubxonasiga koʻplab badiiy, ilmiy adabiyotlar sovgʻa qildilar hamda maktabning 1-sinf oʻquvchilariga oʻquv qurollari jamlanmalarini topshirdilar. Masʼullar maktab jamoasining kelgusida yangi marralarni egallashlarida muvaffaqiyatlar tiladilar. Shundan soʻng “birinchi qoʻngʻiroq” chalinib, yangi oʻquv yili boshlab yuborildi.

Tuman hokimligining Axborot xizmati.