OILA – Muqaddas, unda avlodlar dunyoga keladi

Har bir fuqaro jamiyatdagi qonun-qoidalarga boʻysungan holda unga rioya etib, hurmat qilmogʻi lozim. Xususan, har bir odam oʻz hayotidagi fuqarolik holatlarini oʻz vaqtida qayd qildirmogʻi ham shular jumlasidandir. Chunki, tugʻilishni, qonuniy nikohni yoki boshqa holatlarni oʻz vaqtida qayd qildirmaslik keyinchalik ulkan tashvishlarni keltirib chiqarishi tayin.

Afsuski, buningdek noxush holatlar koʻpaymoqda. Baʼzan yoshlarning havoyi orzulari bilan bunyodga kelgan oilalar hademay tanazzulga yuz tutmoqda.

Keyingi yillar statistikasiga nazar soladigan boʻlsak, oila buzilishi holatlari koʻproq yosh oilalarda yoki turmushning dastlabki yillarida boʻlayotganiga guvoh boʻlamiz. Bu oʻz-oʻzidan ravshanki, qizlarning hali ham jismonan, ham maʼnan voyaga yetmay turib, boylikka, obroʻsiga havas qilib turmush qurayotganligi oqibatidir.

Oʻzaro mehr-muhabbat, ishonch va hurmat oʻrniga shunchaki havas bilan qurilgan oilalarning afsuski, umri qisqa boʻlmoqda.

Joriy yilning oʻtgan yetti oyi davomida tumanimizda 80 ta holatda oilaviy ajrashish, 116 ta otalikni belgilash, 28 ta yolgʻiz onalik holatlari qayd etilgan.

Bu raqamlarni shunchaki sanash mumkin emas. Balki uning zamiridagi muammolarni chuqur oʻrganib, kelgusida sodir boʻlishining oldini olishga harakat qilish juda muhim. Boisi,  oila – muqaddas. Muqaddasligi shundaki, unda avlodlar dunyoga keladi va ular erkin, ota-onasi bagʻrida bexavotir ulgʻaymogʻi lozim. 30 yillik qutlugʻ dovonni bosib oʻtgan mamlakatimiz ravnaqi har birimizga bogʻliq ekanligini unutmaylik. Bundan xulosa shuki, har bir fuqaro oʻz oilasining mustahkamligi va baxtiyorligini taʼminlashga masʼuldir.

Nabira OʻNGAROVA,

tuman FHDYo boʻlimi xodimi.