Gulzor mahallasi hududida 27 mlrd soʻmlik 5 ta koʻp qavatli uy-joylar qurilmoqda

Bugungi kunda tumanimizda katta qurilish hamda bunyodkorlik ishlari amalga oshirilib, tumanimiz shahar-u qishloqlari, koʻchalari koʻrkiga koʻrk qoʻshilmoqda hamda ular zamonaviy qiyofa kasb etmoqda. Insonlarning turmush tarzini yaxshilash borasidagi bunyodkorlik va obodonlashtirish ishlari kishi koʻzini quvontiradi.

Maʼlumot tariqasida keltirish joizki, tuman hududida 2021-yilda jami 112 ta obʼektda loyiha qiymati 87 mlrd 591,4 mln soʻmlik qurilish-taʼmirlash ishlari olib borilishi rejalashtirilgan boʻlib, bugungi kunda barcha obʼektlarning tender savdolari oʻtkazilib, qurilish-taʼmirlash ishlari olib borilmoqda.

Xususan, aholini uy-joy bilan taʼminlash borasida Gulzor mahallasi hududida qiymati 27 mlrd 260 mln. soʻmlik jami 5 ta 5 qavatli, har biri 30 xonadonga moʻljallangan koʻp qavatli uy-joylar qurilmoqda. Shundan 3 tasi “Qishloq qurilish invest” injiniring kompaniyasi buyurtmachiligida, 2 tasi tadbirkorlar hisobidan jami 150 xonadonga moʻljallangan uy-joylarni qurish boʻyicha pudratchi tashkilotlar tomonidan fundament ishlari olib borilmoqda.

“Amudaryo maxsus-qurilish” masʼuliyati cheklangan jamiyati tumanimizda qurilish ishlarini jadal surʼatlarda amalga oshirishda eng ilgʻor pudratchi tashkilotlardan biri hisoblanadi. Mazkur puratchi tashkilot 2009-yilda tashkil etilgan boʻlib, tashkilot tomonidan hozirgi kunga qadar qator yirik qurilish ishlari amalga oshirilgan. Jamiyatda hozirda 46 nafar doimiy ishchilar faoliyat olib bormoqda. Shundan 7 nafar haydovchi, 3 nafar elektro-payvandchi, 2 nafar santexnik, shuningdek, ombor mudiri, hisobchi, muhandis, mexanik, usta quruvchilar kabi ishchilar qurilish va bunyodkorlik ishlarida qatnashib kelmoqdalar.

Ayni paytda pudratchi tashkilot tomonidan Boʻston mahallasi Qipchoq koʻchasidagi zamonaviy koʻp qavatli turar joy binosining qurilish ishlari qizgʻin pallaga kirgan. Loyiha smeta qiymati 7 mlrd 859 mln soʻm boʻlgan mazkur qurilish obektida gʻisht terish ishlari yakunlanib, tom qismi yopilgan, yana bir qanotda gʻisht terish ishlari jadal surʼatlarda olib borilmoqda. 5 qavatli 48 xonadonga moʻljallangan binoning 1-qavatida 12 ta doʻkonlar tashkil etilishi rejalashtirilgan.

Hozirda 15 nafar yollanma ishchilar qurilish ishlarini oʻz vaqtida yakunlash uchun tinimsiz mehnat qilmoqdalar. Koʻp qavatli turar joy binosining qurilish ishlari 2022-yilning mart oylarida yakunlanishi hamda binoni Navroʻz bayrami arafasida foydalanishga topshirilishi rejalashtirilmoqda.

Shuningdek, “Amudaryo maxsus-qurilish” masʼuliyati cheklangan jamiyati tomonidan Gulzor mahallasida yangi tartibdagi 5 qavatga moʻljallangan koʻp xonali turar joy binosining qurilish ishlari ham amalga oshirilmoqda. Loyiha smeta qiymati 5 mlrd 557 mln soʻm boʻlib, shundan 2 mlrd. 200 mln soʻm kredit mablagʻi hisobidan, qolgan qismi tadbirkorning oʻz mablagʻi hisobidan amalga oshirilmoqda.

Ayni paytda 30 xonadonga moʻljallangan ushbu koʻp xonali uy-joy binosining 1-qavatida gʻisht terish ishlari olib borilmoqda. Qurilish ishlariga jami 22 nafar gʻisht teruvchi ustalar jalb qilingan. Quruvchilar uchun barcha zarur sharoitlar yaratilgan boʻlib, usta-quruvchilarga 2 mahal issiq ovqat beriladi. Mazkur koʻp xonali turar-joy binosi 2022-yilning aprel oylarida qurilishi yakunlanib, foydalanishga topshirilishi rejalashtirilmoqda.

Aytish kerakki, bu kabi qurilish va bunyodkorlik ishlari natijasida aholi turmush tarzi, yashash sharoitlari tobora yaxshilanib, insonlarning uy-joy bilan bogʻliq boʻlgan muammolari bartaraf qilinishiga xizmat qiladi.

Tuman hokimligining Axborot xizmati.