“Oila – muqaddas, farzand – aziz!” shiori ostida targʻibot tadbiri oʻtkazildi

Amudaryo tumanida joriy yil 8 oy holatiga 92 ta oilaviy ajrashishlar qayd etilgan boʻlib, oʻtgan yilning shu davriga nisbatan 42 taga oshgan. Bu kabi salbiy holatlarning oldini olish, oilalarda maʼnaviy-axloqiy muhitni yanada yaxshilash, oilaviy ajrashishlarga barham berish, yoshlarda oilaga boʻlgan maʼsuliyatni yanada oshirish bugungi kuning muhim masalasi boʻlib qolmoqda.

Shu bois, mahallalarda istiqomat qilayotgan oilalarda umuminsoniy va milliy, oilaviy qadriyatlarni mustahkamlash, farzandlarni yuksak odob-axloq tamoyillari asosida tarbiyalash, ularning ongi va qalbini gʻoyaviy tahdidlardan himoya qilish, sogʻlom turmush tarzini targʻib qilish maqsadida Oʻzbekiston Respublikasi Prezidentining 2020-yil 18-fevraldagi Farmoni ijrosini taʼminlashga qaratilgan keng qamrovli ishlar amalga oshirilmoqda.

Jamiyatning betakror ijtimoiy tuzilmasi hisoblangan mahalla institutini aholining chinakam maslakdoshi va koʻmakdoshiga aylantirish, jamiyatda “Obod va xavfsiz mahalla” tamoyilining toʻlaqonli va samarali joriy etilishiga har tomonlama koʻmaklashish, oila institutini mustahkamlash boʻyicha, eng avvalo, “Sogʻlom oila – sogʻlom jamiyat” gʻoyasini hayotga tadbiq etish maqsadida joriy yilning 25-avgustidan 25-sentyabrigacha “Oila - muqaddas, farzand - aziz!” shiori ostida targʻibot oyligi oʻtkazilmoqda.

Targʻibot oyligi doirasida Beruniy nomli mahalla fuqarolar yigʻinida “Oila - muqaddas, farzand - aziz!” shiori ostida oʻtkazilgan tadbirda ham oilalarda maʼnaviy-axloqiy muhitni yanada yaxshilash, oilaviy nizolarning oldini olish, yoshlarda oilaga boʻlgan maʼsuliyatni oshirish, boy ilmiy-madaniy merosimiz, qadimiy urf-odat va anʼanalarimizni asrash, tarbiyaviy, maʼnaviy-maʼrifiy, ruhiy-axloqiy, iqtisodiy-huquqiy munosabatlarga asoslangan ijtimoiy birlik hisoblanmish oila muqaddasligini targʻib qilish, har bir ota-onaning farzand tarbiyasidagi burch va maʼsuliyatlarini oshirish maqsadida targʻibot tadbiri oʻtkazildi.

Unda Mahalla va oilani qoʻllab-quvvatlash boʻlimi bosh mutaxassisi Gavxar Chimbaychiyeva, tuman Ichki ishlar boʻlimi xotin-qizlar masalalari boʻyicha katta inspektori Gavhar Utemuratova, tuman xalq taʼlimi boʻlimi psixologi Tatyana Pirlapesova, 27-sonli maktab psixologi Mavluda Toʻrayeva, Beruniy nomli, Olmazor, Gulzor, Oybek nomli va Boʻston mahallalari fuqarolar yigʻinlari raislarining oila va xotin-qizlar masalalari boʻyicha oʻrinbosarlari va mazkur mahallalar xotin-qizlari, “Ayollar daftari”da roʻyxatga olingan, psixologik koʻmakka muhtoj  ayol-qizlar ishtirok etdilar.

Targʻibot tadbirida tuman Mahalla va oilani qoʻllab-quvvatlash boʻlimi bosh mutaxassisi Gavhar Chimbaychiyeva soʻzga chiqib, tumanda 8 oy yakunlariga koʻra, oilaviy ajrashishlar soni koʻpaygani oʻta ayanchli holat ekanligini va buning oldini olishda mahallalardagi Oilaviy qadriyatlarni mustahkamlash komissiyalarining faoliyatini yanada jonlantirish lozimligi, sud yoki fuqarolik holati dalolatnomalarini yozish organidan nikohdan ajratishga ariza bilan murojaat qilgan er-xotinlarni yarashtirish uchun tegishli choralarni koʻrish zarurligi haqida alohida toʻxtalib oʻtdi.

Shundan soʻng, tuman Ichki ishlar boʻlimi katta inspektori, podpolkovnik Gavhar Utemuratova mahallalarda oilaviy nizolar, yoshlar tarbiyasiga eʼtiborsizlik holatlari, fuqarolar, ayniqsa, yoshlarning turli yot gʻoyalar taʼsiriga tushib qolishi, ichkilikbozlik hamda giyohvandlik illatlariga berilishi, turli koʻrinishlardagi huquqbuzarliklarning sodir etilishi  - oilalar barbod boʻlishining asosiy sabablaridan biri ekanligi haqida toʻxtalib, oilalar mustahkamligini taʼminlashda mahalla va oila hamkorligi, keng jamoatchilik eʼtibori juda muhimligini taʼkidladi.

Shuningdek, tadbirda tuman Xalq taʼlimi boʻlimi psixologi Tatyana Pirlapesova, 27-sonli umumtaʼlim maktabi psixologi Mavluda Toʻrayevalar ham muzokaralarda ishtirok etishib, namunali oilalarning farzand tarbiyasi borasidagi tajribalarini hamda oila aʼzolari oʻrtasidagi ibratli munosabatlarini ommalashtirish, yigit va qizlarni oilaviy hayotga tayyorlash, yosh oilalarni har tomonlama qoʻllab-quvvatlashga koʻmaklashish, oilaning muqaddasligi haqida soʻz yuritishib, oilaviy munosabatlar buzilishining oldini olish toʻgʻrisida oʻz fikr-mulohazalarini bildirdilar.

Targʻibot oyligi doirasida boʻlib oʻtgan mazkur tadbirda 27-sonli maktab psixologi Mavluda Toʻrayeva ota-onalarning farzand tarbiyasidagi psixologik bilimlarini oshirish, farzand tarbiyasiga yetarli eʼtibor bermayotgan ota onalarga yordam koʻrsatishni amalga oshirish boʻyicha mashgʻulotlar olib bordi va zarur yoʻl-yoʻriqlar koʻrsatdi.

Risolat IBRAGIMOVA.