HAYDOVChILIK KURSIDA OʻQIYoTGAN 50 NAFAR YoShGA TOʻLOV MABLAGʻINING 75 FOIZI QOPLAB BERILDI

Yurtimizda yoshlarni qoʻllab-quvvatlash, ularning hayotdan oʻz oʻrinlarini topishlariga yaqindan koʻmak berish maqsadida turli chora-tadbirlar amalga oshirilmoqda. Bu boradagi samaradorlikni oshirish maqsadida Prezident Farmonlari, hukumat qarorlari qabul qilinib, ijrosi taʼminlanishiga alohida eʼtibor qaratilmoqda.

Oʻzbekiston Respublikasi Vazirlar Mahkamasining 2021-yil 28-aprel kungi qarori ham shular jumlasidandir. Mazkur qaror bilan “Yoshlar daftari”ga kiritilgan yoshlarni tadbirkorlik, kasb-hunar, haydovchilik va qayta tayyorlov kurslarida oʻqitish xarajatlarining 75 foizigacha qismi “Yoshlar daftari” jamgʻarmasi mablagʻlari hisobidan qoplab berilishi belgilab qoʻyilgan. Shunga koʻra roʻyxatdagi yoshlarning tadbirkorlikka oʻqitish xarajatlari bazaviy hisoblash miqdorining 4 baravaridan ortiq boʻlmagan qismi, kasb-hunarga va haydovchilik kurslarida oʻqitish uchun sarflangan xarajatlarning bir oydan ikki oygacha, ikki oydan ortiq muddatli oʻquv kurslari uchun tegishli miqdori qoplab beriladi.

Amudaryo tumanida ham mazkur qaror ijrosini taʼminlash maqsadida “Yoshlar daftari”ga kiritilgan yoshlar oʻquv kurslariga jalb etilib, turli kasb-hunarga oʻqitilmoqda. Oʻquv kurslarini muvaffaqiyatli tugatgan va sertifikat olgan yoshlarga bazaviy hisoblash miqdorining 25 baravaridan koʻp boʻlmagan miqdorda isteʼmol kreditlari ajratilishiga koʻmaklashilmoqda. Uyushmagan yoshlarning maʼnaviy dunyoqarashini shakllantirish, shu jumladan ularni xorijiy tillar, kompyuter savodxonligi, sport, madaniyat va kitobxonlik toʻgaraklariga jalb qilish choralari koʻrilmoqda.

Hozirgi kunda tumandagi Mudofaaga koʻmaklashuvchi “Vatanparvar” tashkiloti tomonidan tashkil etilgan oʻquv kurslarida haydovchilik guvohnomasini olishga oʻqiyotgan 50 nafar yoshlar uchun toʻlov mablagʻining 75 foizi, yaʼni 78 mln. 750 ming soʻm mablagʻ Hukumatning 2021-yil 11-martdagi “Yoshlarni ijtimoiy qoʻllab-quvvatlash boʻyicha qoʻshimcha chora-tadbirlar toʻgʻrsida”gi qarori asosida “Yoshlar jamgʻarmasi” hisobidan qoplab berilmoqda. 

Oʻquv-sport texnika klubida “V” va “VS” toifali haydovchilar tayyorlash, 30 soatlik qayta tayyorlash boʻyicha faoliyat tashkil etilgan. Klub oʻquv xonalari zamonaviy oʻqitish vositalari, kompyuterlar, interaktiv doskalar bilan jihozlangan. Mashgʻulotlar 4 nafar oliy maʼlumotli mutaxassis oʻqituvchilar tomonidan olib boriladi.

Amaliy boshqarishni oʻrgatish uchun tashkilotda 3 ta neksiya, kobalt, 4 ta spark, 3 ta matiz, 2 ta damas, 4 ta GAZ 52, 1 ta GAZ 53 va “Isuzu” rusumli avtomobillar mavjud. Ushbu texnikalar yordamida amaliy mashgʻulotlar oʻtkaziladi. Oʻquv-sport texnika klubida mehnat bozorida talab katta boʻlayotgan avtoelektrik, gaz va elektr payvandchisi, akkumulyatorchi, dvigatellarni taʼmirlovchi usta va traktorchi yoʻnalishlari boʻyicha kurslar tashkil etish maqsadida xonalar zarur vositalar bilan jihozlandi.

Haydovchilik guvohnomasini olishga oʻqiyotgan yoshlar oʻzlarining kasb egallashlariga koʻmaklashgan, toʻlov mablagʻining 75 foizini “Yoshlar jamgʻarmasi” hisobidan qoplab bergan davlatimizga, masʼullarga katta minnatdorchilik bildirishdi.

O. Xudoyberganova.