TUMAN DAVLAT ARXIVIDA MILLIY ARXIV FONDIGA DOIR HUJJATLAR TOʻPLANMOQDA

Mamlakatimizda davlatimiz tomonidan yaratib berilgan imkoniyatlar va sharoitlar natijasida arxiv hujjatlarini qamrab olish imkoniyati kengaytirilib, davlat arxivlarida saqlanayotgan hujjatlarning soni ortmoqda. Tizimning moddiy-texnik bazasi ham bosqichma-bosqich rivojlantirilmoqda. Davlat arxivlari barcha sharoitlar bilan taʼminlanib, internet tarmogʻi mavjud zamonaviy kompyuter texnikalari bilan jihozlanmoqda.

Bugungi kunda «Oʻzarxiv» agentligi tizimida hujjat ayirboshlash elektron hujjat aylanishi tizimi orqali yuritilib, saqlanayotgan axborot resurslari boʻyicha elektron bazalarni yaratish, hujjatlarini raqamlashtirish ishlari amalga oshirilmoqda.

Amudaryo tumani Davlat arxivida ham aholining moddiy va maʼnaviy hayotini aks ettirgan, tarixiy-ilmiy va madaniy ahamiyatga ega boʻlgan milliy arxiv fondi hujjatlarini toʻplash ishlariga alohida eʼtibor qaratilib, boyitib borilmoqda. Arxiv fondida 2006-yildan 2021-yilning hozirgi davriga qadar sovet va mustaqillik davrlariga tegishli 220 ta fond va ularda milliy arxiv fondi tarkibga kiruvchi doimiy saqlanadigan 20 min 417 ta hujjatlar, shaxsiy tarkibga oid 14 ming 606 ta, jami 35 ming 23  hujjatlar saqlanmoqda.

Mazkur yilda reja doirasida milliy arxiv fondidagi hujjatlarning saqlovini taʼminlash boʻyicha 60 ta hujjatlarda taʼmirlash, 75 ta hujjatlarda muqovalash va tikish ishlari olib borildi. Arxiv ishi, davlat saqlovidagi arxiv hujjatlarini saqlanish holati, arxiv muassasalarida zamonaviy axborot-komunikatsiya texnologiyalarini joriy qilish, moddiy-texnika bazasini yaxshilash boʻyicha 2021-yilning oʻtgan davrida bitta zamonaviy kompyuter, bir dona qogʻoz shaklidagi hujjatlarni raqamlashtirib, elektron hujjatga aylantiruvchi uskuna xarid qilindi. Ushbu texnologiyalar yordamida 2021-yilning shu davriga qadar milliy arxiv fondi hujjatlaridan 10 ming 500 ta kadr elektron nusxa yaratildi.

Milliy arxiv fondi hujjatlarining davlat hisobi ilmiy maʼlumotlar apparatini tashkil etish va rivojlantirish, fondlar va hujjatlarni qabul qilish boʻyicha 2021-yilning oʻtgan davri davomida  doimiy va shaxsiy tarkibga oid 7 fondga 1232 ta hujjat qabul qilindi. Davlat arxivida saqlanayotgan hujjatlarning mavjudligini va xatlovini tashkil qilish boʻyicha 2021-yilning oʻtgan davri davomida 700 dan ortiq hujjatlarning mavjudligi tekshirildi.

Undan tashqari, shu paytga qadar tuman Davlat arxivida saqlanayotgan hujjatlar doirasi fuqarolarning ijtimoiy huquqiy va mavzuli soʻrovlaridan jami 2081 ta murojatlar kelib tushdi. Shulardan 2056 ta murojaat koʻrib chiqildi va barchasiga ijobiy javoblar berildi, tushuntirish ishlari olib borildi. Murojaatlar tahlil qilinganida, mavzuli soʻrovlardan jami 564 ta tushganligi aniqlandi va barchasiga tegishli javoblar qaytarildi.

Amudaryo tumani Davlat arxivi hisobiga 2021-yilning shu kuniga  qadar pullik koʻrsatiladigan  xizmatlar boʻyicha hujjatlarni tartibga keltirish, arxiv sohasiga oid normativ hujjatlarni tayyorlash, hujjatlarni depozitar saqlovga qabul qilish, mavzuli soʻrovlar va boshqa yoʻnalishlar boʻyicha 75 mln. soʻm mablagʻ kiritildi. Ushbu mablagʻlar sohaning asosiy yoʻnalishlariga sarf qilinib kelinmoqda.

Arxivlarda oʻtgan davrga tegishli boʻlgan ijtimoiy-siyosiy va shaxsiy tarkibga oid hujjatlar saqlanadi. Ushbu hujjatlar, ayniqsa, uzoq yillardan beri saqlanayotganlari namlik va harorat uzluksiz nazoratda boʻlgan shinam xonalarda saqlanishi kerak. Shu bois, tuman Davlat arxivi zamonaviy va barcha imkoniyatlarga ega boʻlgan binoda joylashtirilgan. Yetarlicha sharoitda xizmat qilayotgan tuman Davlat arxivining kelgusi yilgi rejalariga arxivda saqlanyotgan hujjatlarni mobil stellajlar bilan taʼminlash, kadrlar malakasini oshirish, barcha hujjatlarning elektron tarzidagi nusxalarini yaratib borish kabilar kiritilgan.

B. Jumaniyozov, tuman Davlat arxivi direktori.