TAʼLIM-TARBIYaDA USTOZ VA MURABBIYLARNING HISSALARI BEQIYoS

Bugungi kunda mamlakatimizda taʼlim-tarbiya tizimining sifati va samaradorligini oshirish, bogʻcha tarbiyalanuvchilari, oʻquvchi va talaba yoshlarda zamonaviy bilim va koʻnikmalarni shakllantirish, taʼlim tizimlari hamda ilm-fan sohasi oʻrtasida yaqin hamkorlik va integratsiyani, taʼlimning uzviyligi va uzlyuksizligini taʼminlash borasida tizimli ishlar amalga oshirilmoqda.

Shuningdek, taʼlim-tarbiya va ilm-fan sohalarini yanada takomillashtirish, jamiyatimizda oʻqituvchi va pedagog xodimlar, ilmiy va ijodkor ziyolilarga boʻlgan hurmat-eʼtiborni yanada oshirish, oʻquvchilarning kasbiy mahoratini rivojlantirish, tizimda xususiy sektor ishtirokini kengaytirish borasida samarali ishlar qilinmoqda.

Amudaryo tumani Xalq taʼlimi boʻlimi bugungi kunda mamlakatimizda taʼlim-tarbiya sohasi rivojini yanada jadallashtirish yuzasidan olib borilayotgan chora-tadbirlar ijrosini taʼminlash borasida  samarali faoliyat yuritmoqda.

Hozirda tuman Xalq taʼlimi boʻlimiga qarashli jami 86 ta taʼlim muassasasi mavjud bolib, shundan 82 ta umumtaʼlim maktablari, 1 ta boshlangʻich maktab, 2 tasi  ixtisoslashtirilgan maktab, 1 ta “Barkamol avlod” maktabi faoliyat olib bormoqda. Ularda jami 4206 nafar oʻqituvchilar farzandlarimizga taʼlim-tarbiya berib kelmoqda.

Oʻqituvchilarning 68,4 foizi ayol oʻqituvchilar boʻlib, jami pedagog xodimlarning 123 nafari oliy toifali, 511 nafari birinchi toifali, 1114 nafari ikkinchi toifali, 1873 nafari mutaxassis oʻqituvchilardan iborat.

Joriy yilda umumtaʼlim muassasalarining moddiy-texnik bazasini mustahkamlash borasida samarali ishlar qilinmoqda. Investitsiya dasturiga binoan 35-sonli maktabda 4 mlrd. 667 mln. soʻmlik kapital rekonstruktsiya va mukammal taʼmirlash ishlari, “Obod qishloq” va “Obod mahalla” dasturlariga binoan 5 ta maktablarda 9 mlrd. 842 mln. soʻmlik qurilish-taʼmirlash ishlari, mahalliy byudjet mablagʻlari hisobidan 28-sonli umumtaʼlim maktabida 609 mln. soʻmlik joriy taʼmirlash ishlari amalga oshirildi. Ayni paytda tumanimizda faoliyat yuritayotgan barcha umumtaʼlim maktablarida zamon talablariga mos ravishda taʼlim berish uchun barcha sharoitlar yetarli.

Tuman Xalq taʼlimi boʻlimi tomonidan yangi oʻquv yiliga tayyorgarlik yuzasidan samarali ishlar tashkil etildi. Yangi 2021-2022 oʻquv yili hamda kuz-qish mavsumiga tayyorgarlik ishlari boʻyicha 65 ta taʼlim muassasalariga rejadagi 1675 tonna koʻmir mahsulotlari toʻliq yetkazib berildi. Umumtaʼlim maktablari yangi oʻquv yiliga tayyor holatga keltirildi.

2020-2021 oʻquv yilida 30-sonli va 40-sonli umumtaʼlim maktablari Xalqaro tadqiqotlarga yoʻnaltirilgan tayanch maktab qilib belgilanib, oʻquv yili boshida barcha maktablardan 2 nafardan trener-oʻqituvchilar tayyorlandi. Xalqaro tadqiqotlarga yoʻnaltirilgan tayanch maktablarning ularga biriktirilgan maktablar bilan ishlash mexanizmi ishlab chiqildi hamda seminar-treninglar tashkil etildi.

Umumtaʼlim maktablarini 2020-2021-oʻquv yilida jami 2978 nafar oʻquvchi 11-sinfni bitirgan boʻlib, 9 nafar bitiruvchilarimiz oltin, 8 nafar bitiruvchilarimiz kumush medal bilan muvaffaqiyatli tamomladilar. Sohada tashkil etayotgan samarali ishlar natijasida umumtaʼlim maktablarini tamomlagan yoshlarimizning oliy taʼlimda oʻqishga qiziqishlari yildan yilga ortib bormoqda.

Joriy yilgi bitiruvchi oʻquvchilardan 2103 nafari oliy taʼlim muassasalariga hujjat topshirgan boʻlsa, ularning 574 nafari kirish imtihonlarida yuqori natijalarni qoʻlga kiritib, oliy taʼlimda oʻqish hamda talaba boʻlish baxtiga muyassar boʻlishdi.

Bunday natijaga erishishimizda, shubhasiz, taʼlim maskanlarida mashaqqatli mehnat qilayotgan ustoz va murabbiylarimizning hissasi beqiyos. Shu fursatdan foydalanib, mashaqqatli va sharafli kasb egalari - ustoz va murabbiylarni yaqinlashib kelayotgan 1-oktyabr – kasb bayramlari bilan samimiy muborakbod etamiz!

Akmal Ismailov, tuman Xalq taʼlimi boʻlimi mudiri.