YoSh AVLOD TARBIYaSIGA EʼTIBOR – KELAJAKKA POYDEVOR

Muhtaram Prezidentimiz oʻz faoliyatining dastlabki kunlaridanoq yosh avlodni tarbiyalashning birinchi va asosiy boʻgʻini boʻlgan Maktabgacha taʼlim sifatiga, samaradorligiga alohida eʼtibor qaratdilar. Mamlakatimizda Maktabgacha taʼlim tizimini zamon talablari darajasiga koʻtarish, bogʻcha yoshidagi bolalarni tarbiya maskanlariga toʻliq qamrab olish yuzasidan amaliy ishlar boshlab yuborildi.

Tuman Maktabgacha taʼlim boʻlimi tomonidan ham bu borada manzilli ishlar amalga oshirilmoqda.

Ayni paytda tumandagi maktabgacha taʼlim yoshidagi (3-7 yoshli) bolalar 16682 nafarni tashkil qiladi. MTBga qarashli 117 ta maktabgacha taʼlim tashkilotlarining 51 tasi davlat, 4 tasi davlat-xususiy sherikchiligi asosidagi nodavlat MTT, 62 tasi oilaviy maktabgacha taʼlim tashkilotlari hisoblanadi.

Mazkur maktabgacha taʼlim tashkilotlariga 11271 nafar bolalar qamrab olingan boʻlib, ularda 803 nafar pedagog-xodimlar faoliyat yuritib kelmoqda. Shundan 349 nafari oliy maʼlumotli, 454 nafari oʻrta maxsus maʼlumotli boʻlib, 725 nafari davlat maktabgacha taʼlim tashkilotlarida, 78 nafari nodavlat maktabgacha taʼlim tashkilotlarida faoliyat yuritishadi.

Maktabgacha taʼlim tashkilotlaridan 100 nafar pedagog-xodimlar attestatsiyadan muvaffaqiyatli oʻtib, 16 nafari ikkinchi malaka toifasiga ega boʻlishdi.

MTTlarning moddiy-texnik bazasi ham mustahkamlanmoqda. Xususan, 51 ta davlat maktabgacha taʼlim tashkilotlari kompyuter texnikasi bilan toʻliq taʼminlangan hamda yuqori tezlikdagi internet tarmogʻiga ulangan.

Maktabgacha taʼlim tashkilotlarida bolalarga taʼlim-tarbiya berish jarayonida Oʻzbekiston Respublikasi Vazirlar Mahkamasining Qarorlari Oʻzbekiston Respublikasi Maktabgacha taʼlim vazirligining buyrugʻi, “Ilk qadam” davlat oʻquv dasturi va 6 yoshdan 7 yoshgacha boʻlgan bolalarni maktab taʼlimiga tayyorlash boʻyicha “Ilm yoʻli” variativ dasturi asosida amalga oshirilmoqda.

MTTlarda taʼlim va tarbiyaning samarali shakllari hamda usullarini oʻquv-tarbiya jarayoniga joriy etish maqsadida milliy madaniy-tarixiy qadriyatlarni aks ettiruvchi va bolalikdan kitob oʻqishga qiziqish uygʻotuvchi oʻquv-metodik, didaktik materiallar, rivojlantiruvchi oʻyin va oʻyinchoqlar, badiiy adabiyotlar bilan taʼminlash maqsadida 42 xildagi jami 4200 toʻplamdan iborat didaktik kartochkalar, 400 ta toʻplam, kichik, oʻrta, katta va tayyorlov guruhlariga moʻljallangan mavzuli rejalashtirish ish jurnallari, maktabga chiqadigan 6-7 yoshlilar uchun 5900 dona ish daftarlari, 6 nomdagi 163 ta rus va oʻzbek tilidagi metodik va didaktik qoʻllanmalar, 21 nomdagi 1995 ta har xil plakatlar barcha MTTlarga yetkazib berildi.

Shuningdek, sogʻlom turmush tarzini keng tatbiq etish va ommaviy sportni yanada rivojlantirish maqsadida maktabgacha taʼlim tashkilotlari xodimlari, hatto  5-6 yoshli bolajonlar oʻrtasida ham sportning shashka, stol tennisi musobakalari tashkil etilib, tarbiyalanuvchilarning asfaltga va qogʻozga rasm chizish koʻrik-tanlovlari oʻtkazilib kelinmoqda. Bunday koʻrik-tanlovlar orqali bolajonlar mustaqil fikrlovchi, oʻz orzusini amalga oshirishda intiluvchan boʻlib voyaga yetadilar.

Saida Sodiqova,

tuman Maktabgacha taʼlim boʻlimi mudirasi.