Qoraqalpogʻiston Respublikasi prokurori oʻrinbosari ishtirokida sayyor qabullar oʻtkazildi

28-sentyabr kuni Amudaryo tumani 2-sektor hududidagi qator ovul va mahallalarda Qoraqalpogʻiston Respublikasi prokurori oʻrinbosari Oybek Shomuratov, tuman prokurori Javlon Muftullayevlar sayyor qabul oʻtkazdilar. Sayyor qabulda tumandagi korxona-tashkilotlar rahbarlari, 2-sektorga biriktirilgan ishchi guruh aʼzolari, ovul va mahalla fuqarolar yigʻinlari masʼullari, “Ayollar daftari”ga kiritilgan xotin-qizlar, “Yoshlar daftari”ga kiritilgan yoshlar hamda aholi vakillari ishtirok etdilar.

Oʻrta qalʼa ovulida oʻtkazilgan sayyor qabulda aholi tomonidan yoʻllangan 9 ta turli mazmundagi murojaatlar qabul qilindi. Xususan, qabul jarayonida yurtdoshlarimiz tomonidan kurash sport turini rivojlantirish uchun imtiyozli  kredit ajratilishida, uyi yoniga ichimlik suvi tarmogʻi tortish va shu hududda bolalar bogʻchasi tashkil etilishida, 64-maktab uchun qoʻshimcha bino qurish, maktab oldidagi yoʻlga piyodalar oʻtish yoʻlagi chizish va yoʻl belgilarining oʻrnatilishida, ichki yoʻllarni taʼmirlash va ichimlik suvi quvurini tortishda, mahalla hududida dorixona tashkil etilishida, elektr energiyasi taʼminotidagi kamchiliklarni bartaraf qilish uchun  yangi transformator oʻrnatishda amaliy yordam berishni soʻrab murojaat qilishdi. Murojaatlardagi masalalar tegishli masʼullar tomonidan oʻrganilib, hal qilishga amaliy yordam beriladigan boʻldi.

Shu kabi sayyor qabullar tumanimizdagi Bogʻ, Arna boʻyi, Farovon, Yangiobod mahallarida hamda Amir Temur ovulida ham oʻtkazildi. Xususan, Bogʻ mahallasida oʻtkazilgan aholi bilan ochiq muloqot jarayonida 7 nafar fuqarolar tomonidan murojaatlar yoʻllandi. Jumladan, fuqarolardan Bogʻ yop arna kanalining 2,5 km qismini qazishda, Qilichboy yoʻliga yoʻl belgilari va piyodalar oʻtish joyi belgisini oʻrnatishda, ichki yoʻllarni taʼmirlashda va yangi transformator oʻrnatishda, kredit ajratilishida, qishloq vrachlik punktini qayta tashkil etish va dorixona ochishda amaliy yordam soʻralgan murojaatlar yoʻllandi.  Ushbu murojaatlar ham tegishlicha oʻrganilib, hal etiladigan boʻldi.

Shuningdek, Arna boʻyi mahallasida oʻtkazilgan sayyor qabul jarayonida aholi vakillarinining 15 ta murojaatlari qabul qilindi. Murojaatlardagi masalalar turli yoʻnlishlarda boʻlib, mahallada yashovchi yurtdoshlarimiz mahalla hududida dorixona faoliyatini yoʻlga qoʻyishda, simyogʻochlarni almashtirishda, koʻchasiga elektr energiyasi liniyasi tortishda, Oʻrta qalʼa ovuliga olib chiqadigan yoʻlni taʼmirlashda, 27-sonli umumtaʼlim maktabga qadar piyodalar yoʻlakchasini qurishda hamda ushbu maktab oldidagi yoʻlga tosh toʻshash masalasida, taʼlim krediti olishda, 33-sonli bolalar bogʻchasiga ichimlik suvi taʼminotini oʻrnatishda, tadbirkorlik uchun yer maydoni ajratilishida, karate bilan shugʻullanish uchun sport zali va tatami olishda, uyini taʼmirlashda, chorvachilik bilan shugʻullanish uchun yer ajratilishida  amaliy yordam soʻrab murojaat qilishdi.

Murojaatlardagi masalalarning baʼzilari qabul jarayonining oʻzida tegishli masʼullarni biriktirgan holda hal etiladigan boʻldi. Ijrosi maʼlum vaqt talab etadigan murojaatlar oʻrganilib, ijobiy hal etishlari uchun mutasaddi tashkilotlarga topshiriqlar berildi.

Ulugʻbek Allaberganov, tuman prokurori yordamchisi.