XITOY OVULIDA “MEHNATI ELDA AZIZ USTOZIM” DEB NOMLANGAN BAYRAM TADBIRI OʻTKAZILDI

Tumanimizda Ustozlar va murabbiylar kuni keng miqyosda, tantanali ravishda nishonlandi. Ayniqsa, taʼlim maskanlarida ushbu bayram munosabati bilan turli tadbirlar oʻtkazildi.
Xitoy ovulida ham 85- va 2-sonli umumtaʼlim maktablari oʻqituvchi va oʻquvchilari ishtirokida “Mehnati elda aziz ustozim” deb nomlangan badiiylashtirilgan bayram kechasi oʻtkazildi. Kechada taʼlim maskanlarida faoliyat koʻrsatib kelayotgan ustoz-murabbiylar, sohada koʻp yillar mehnat qilgan faxriylar va boshqalar qatnashishdi.
Bayram kechasini 85-sonli umumtaʼlim  maktabining ona tili va adabiyoti fani oʻqituvchisi Mohira Erdonova kirish soʻzi bilan ochdi va boshqarib bordi. Ikkala maktab oʻquvchilari tomonidan ham bayramga qizgʻin tayyorgarliklar koʻrilgani kecha boshlanishidayoq namoyon boʻlib, barchaning koʻngliga zavq bagʻishladi. Ayniqsa, 5-,6-,7-,8-sinf oʻquvchilarining ustozlar haqida turli xalq tillarida ijro etgan sheʼrlari barchaga juda manzur boʻldi.
Qoraqalpoq tili fani oʻqituvchisi Qurbonoy Duysenboyeva, faxriy oʻqituvchi Tursunboy Abdullayevlar barchani umumxalq bayrami bilan muborakbod etib, ustoz va murabbiylar shaʼniga iliq fikrlar bildirdilar. Kecha davomida 7-sinf oʻquvchi qizlari ijro etgan ommaviy raqs, 9-sinf qizlari ijrosidagi “Mustazod” raqslari barchaga xushkayfiyat bagʻishladi.
Mehnat faxriysi, shifokor Tojiboy hoji Bozorboyev barchani  bayram bilan tabriklab, Xitoy ovulidan yetishib chiqqan taniqli insonlar haqida soʻzladi. Bu insonlar ham shu maktablar partalarida oʻtirib, ustozlaridan chuqur bilim olganlari, bugungi kunda olamga mashhur insonlar boʻlib yetishganligini faxr bilan aytib oʻtdi.
Shundan soʻng, 7-sinf oʻquvchi-qizlari “Sumbula” qoʻshigʻiga raqs ijro etib, musiqa va sanʼat sohasida ham iqtidorlarini shakllantirishayotganini namoyon etishdi.
Bayram kechasida tumanda faoliyat olib borayotgan yosh ijodkorlarning “Jayxun ilhomlari” nodavlat notijorat tashkiloti raisi Oʻrozali Reyimov ham soʻzga chiqib, soha fidoyilarini tabrikladi. Mamlakatimizda yosh avlodning kelajakda ongli, bilimli, zukko boʻlib yetishishlariga barcha imkoniyatlar yaratib qoʻyilganligi, bu borada ustoz-murabbiylarning mehnatlari beqiyos ekanligiga alohida toʻxtalib oʻtdi.
Kecha davomida 9-sinf oʻquvchilari ijro etgan “Beshta muhim tashabbus” qoʻshigʻi ham barchaga manzur boʻldi. Qoʻshiq orqali oʻquvchilar mamlakatimiz yoshlarining har tomonlama yetuk insonlar boʻlib kamolga yetishida naqadar ulkan maqsadlar olgʻa qoʻyilganligini faxr bilan bayon etishdi. Darhaqiqat, beshta tashabbus ijrosini taʼminlash bilan yosh avlod barcha koʻzlagan choʻqqilarini zabt etishiga aslo shubha yoʻq.
Oʻquvchi-qizlar maktab sahnasida inglizcha qoʻshiq va raqs ijro etishib, maktabda faqat chet tillarni oʻrganibgina qolmay, qardosh xalqlarning musiqasi, sanʼati, madaniyati bilan ham tanish ekanliklarini yana bir bor namoyish etdilar.
Tadbirda boshlangʻich sinf oʻqituvchisi Zebo Soburova ham ustozlar haqida samimiy soʻzlar aytib, oʻzining chuqur ehtiromini koʻrsatdi. Shundan soʻng, 2-sonli umumtaʼlim maktabining ijodiy-madaniy masalalar boʻyicha targʻibotchisi, faxriy oʻqituvchi Ahmad Nafasov barchani bayram bilan qutlab, “Ustozlarga” deb nomlangan sheʼrini oʻqib berdi.
Bayram kechasi kuy-qoʻshiqlar, tabriklar bilan mazmunli oʻtdi.

(Maxsus muxbirimizdan)