“Keksalar haftaligi” doirasida “Diydor shirin” mavzusida tadbir boʻlib oʻtdi

Davlatimiz rahbarining tashabbusi bilan mamlakatimizda keksa avlod vakillarini har tomonlama qoʻllab-quvvatlash, ularning jamiyat, oilalar va mahallalarda tinchlik va osoyishtalikni taʼminlash, shuningdek, yosh avlodni xalqimizning koʻp asrlik anʼanalarini hurmat qilish ruhida tarbiyalash ishidagi rolini oshirishga qaratilgan keng koʻlamli islohotlar amalga oshirilmoqda.

Mamlakatimizda, Vazirlar Mahkamasining 2019-yil 27-sentyabrdagi Qarori bilan har yili oktyabr oyining birinchi haftasi “Keksalar haftaligi” etib belgilandi. Unga koʻra, ushbu haftalikni keng nishonlash va yuqori saviyada oʻtkazish, shuningdek, “Keksalarni eʼzozlash, ularga hurmat-ehtirom koʻrsatish - xalqimizga xos ezgu fazilat” degan gʻoya ostida joriy yilning 4-10-oktyabr kunlari barcha hududlarda “Keksalar haftaligi”ni yuqori saviyada tashkil etish va oʻtkazish belgilangan.

Shu munosabat bilan 4-oktyabr kuni Amudaryo tumani Mahalla va oilani qoʻllab-quvvatlash boʻlimida bir guruh nuroniylar, tuman “Nuroniylar” jamoatchilik Kengashi raisi va aʼzolari, “Buvijonlar” maktabi raisi va aʼzolari hamda hududlardagi “Keksalar maslahati” guruhi raislari ishtirokida “Diydor shirin” mavzusida diydorlashuv tadbiri boʻlib oʻtdi.

Tadbir doirasida yurtimiz va tumanimiz ravnaqi, yoshlar tarbiyasi, shuningdek, hududlarda oshirilayotgan islohotlarda faol qatnashayotgan nuroniylar Oʻzbekiston faxriylarining ijtimoiy faolligini oshirish va qoʻllab-quvvatlash “Nuroniy” jamgʻarmasi hamda tuman hokimligi tomonidan berilgan tashakkurnomalar va pul mukofotlari bilan taqdirlandilar.

Tadbirda ishtirok etgan nuroniylar oʻzlari bosib oʻtgan hayot yoʻllari va bugungi davr hamda tarixiy kunlar haqidagi xotiralarini yodga oldilar. Xususan, tadbir ishtirokchilari bugungi dorilomon kunlar oʻz-oʻzidan kelmagani, mustaqillikdan avval ham, mustaqillikka  erishilgandan soʻng ham bugungi keksa  avlod vakillari juda katta qiyinchiliklarni boshidan kechirganlarini, oʻsib kelayotgan yosh avlod ularning fidoyi mehnatlari qadriga yetishlari zarurligini taʼkidladilar.

Soʻzga chiqqan nuroniylar bugungi kunga shukronalik keltirib, yurtimiz tinchligi, yoshlarga yaratilayotgan sharoitlar haqida havas bilan gapirib, “Yangi Oʻzbekistonni barpo etishda nuroniylarning oʻrni” mavzusida barcha joylarda maʼnaviy-maʼrifiy tadbirlarni tashkil etish va oʻtkazish kerakligini taʼkidladilar.

Bahodir Baltabayev, tuman Mahalla va oilani qoʻllab-quvvatlash boʻlimi boshligʻining oʻrinbosari, xalq deputatlari tuman Kengashi deputati